لندن: (ویب ڈیسک) پاکستانی فاسٹ بولر نسیم شاہ کندھے کی انجری کے باعث اگلے ماہ کے آخر تک کاؤنٹی چیمپئن شپ سے آؤٹ ہوگئے ۔
گلوسسٹرشائرکاؤنٹی کے مطابق نسیم شاہ گزشتہ دنوں کندھے کی انجری کا شکار ہوئے جس کی وجہ سے وہ اگلے ماہ تک کرکٹ نہیں کھیل سکیں گے۔
کاؤنٹی بیان کے مطابق وہ نسیم شاہ کی فٹنس پر پاکستان کرکٹ بورڈ سے رابطے میں ہیں۔
رپورٹس کے مطابق نسیم شاہ ایک ماہ برسٹل میں اپنی ری ہیب پر کام کریں گے جس کے بعد وہ ٹی ٹوئنٹی بلاسٹ کیلئے اپنی کاؤنٹی ٹیم کو دستیاب ہوں گے۔

لاہور: (ویب ڈیسک) پاکستان کرکٹ ٹیم کے دورہ نیدرلینڈز کا شیڈول جاری کردیا گیا ہے۔
پاکستان کرکٹ بورڈ( پی سی بی ) کے مطابق پاکستان اور نیدرلینڈز کے مابین دو طرفہ ون ڈے انٹرنیشنل سیریز اگست میں روٹرڈم میں کھیلی جائے گی۔ سیریز میں شامل تین ون ڈے انٹرنیشنل میچز 16، 18 اور 21 اگست کو کھیلے جائیں گے۔
واضح رہے کہ اس سے قبل یہ سیریز جولائی 2020 میں کھیلی جانی تھی لیکن کورونا وائرس کے باعث سیریز غیر معینہ مدت کے لیے ملتوی کر دی گئی تھی ، تینوں میچز آئی سی سی مینز کرکٹ ورلڈ کپ سپر لیگ کا حصہ ہیں۔
یاد رہے کہ دونوں ٹیمیں ون ڈے کرکٹ میں آخری مرتبہ آئی سی سی مینز کرکٹ ورلڈ کپ 2003 میں مدمقابل آئی تھیں۔
آئی سی سی مینز ورلڈ کپ سپر لیگ میں پاکستان نے اپنے 12 میں سے 6 میچز جیت رکھے ہیں جبکہ نیدرلینڈز کی ٹیم 10 میں سے صرف 2 میچز ہی جیت سکی ہے۔
ڈائریکٹر انٹرنیشنل پی سی بی ذاکر خان کا کہنا ہے کہ مجھے خوشی ہے کہ میزبان بورڈ کے تعاون سے وہ اس سیریز کو ری شیڈول کرنے میں کامیاب رہے ہیں۔ یہ سیریز نیدرلینڈز میں کرکٹ کے فروغ اور ترقی کے لیے بہت اہم ہے۔
انہوں نے کہا کہ قومی کرکٹ ٹیم کا سیزن 22-2021 شاندار رہا ہے، وہ پر اعتماد ہیں کہ قومی کھلاڑی بہترین کارکردگی کا تسلسل برقرار رکھتے ہوئے نیدرلینڈز کے فینز کو بہترین تفریح فراہم کریں گے۔

لندن: (ویب ڈیسک) یوکرین پر حملے کے باعث روس اور بیلاروس کے کھلاڑیوں کو ومبلڈن اوپن ٹینس میں نمائندگی سے محروم کر دیا گیا ہے۔
روسی گولہ باری کے اثرات کھیلوں پر بھی جاری ہیں، ٹینس سیزن کے دوسرے گرینڈ سلیم ’’ومبلڈن اوپن‘‘ حکام نے روس اور بیلاروس کے کھلاڑیوں کی شرکت پر پابندی عائد کر دی ہے۔
روس سے تعلق رکھنے والے عالمی نمبر ایک ڈینیئل میدویدف اور نمبر چار اریانا سیبالینکا کو میگا ایونٹ میں نمائندگی سے محروم کر دیا گیا ہے۔
واضح رہے کہ ومبلڈن کے گراس کورٹ پر ٹینس کا میلہ 27 جون سے 10 جولائی تک سجے گا۔

ریاض: (ویب ڈیسک) قومی ٹیم کے سابق فاسٹ بولر اور ہیڈ کوچ وقار یونس نے اہلیہ فریال وقار کے ساتھ عمرے کی سعادت حاصل کرلی۔
تفصیلات کے مطابق سابق فاسٹ بولر اور ہیڈ کوچ وقار یونس نے سماجی رابطے کی ویب سائٹ ٹویٹر پر اہلیہ کے ساتھ تصاویر شیئر کیں جن وہ مکہ مکرمہ اور مسجد نبوی میں موجود ہیں۔
وقار یونس نے تصویر شیئر کرتے ہوئے کیپشن میں لکھا کہ الحمدللہ، اللہ نے ہمیں اپنے گھر پر بلا لیا۔
قومی کرکٹر نے چند گھنٹوں قبل یہ تصاویر شیئر کی جس میں انہیں عمرہ ادا کرنے کے بعد مسجد نبوی میں بھی دیکھا جاسکتا ہے، تصویر میں ان کا بیٹا بھی موجود ہیں۔
وقار یونس کو عمرے کی سعادت حاصل کرنے پر مداحوں اور قومی کرکٹرز کی جانب سے مبارک باد دی جارہی ہیں۔
واضح رہے کہ اس سے قبل قومی ٹیم کے لیگ اسپنر شاداب خان نے بھی عمرے کی ادائیگی کی تصاویر شیئر کی تھیں، یاد رہے کہ رمضان المبارک کے مقدس ماہ میں متعدد کرکٹرز اور شوبز ستارے عمرے کی ادائیگی کے لیے سعودی عرب پہنچے ہیں۔

لاہور: (ویب ڈیسک) عمران خان کے جانے کے بعد پاکستان کرکٹ بورڈ (پی سی بی) کے چیئرمین رمیز راجہ کو عہدے سے ہٹائے جانے کا امکان ہے۔
خیال رہے کہ پاکستان کرکٹ بورڈ (پی سی بی) کے پیٹرن انچیف رہنے والے عمران خان کی حکومت ختم ہونے کے بعد یہ باتیں کی جارہی تھیں کہ چیئرمین رمیز راجہ کا عہدہ بھی ختم ہونے والا ہے۔
اس حوالے سے اب ذرائع نے بتایا ہے کہ نئی حکومت کے آنے کے بعد چیئرمین پی سی بی رمیزراجہ کو عہدے سے ہٹائے جانے کا امکان ہے، گورننگ باڈی کے اجلاس میں 2 نئے نام مانگ لئے گئے۔
ادھر رمیز راجہ پرعزم دکھائی دیتے ہیں اور کام جاری رکھنے کا اشارہ ملنے کا دعویٰ کرتے ہوئے کہا کہ میری چیئرمین شپ کو کوئی خطرہ نہیں۔