Yearly Archives: 2023

کھیل

میلبرن ٹیسٹ: پاکستان 98، آسٹریلیا کو جیت کیلئے 3 وکٹیں درکار

میلبرن: باکسنگ ڈے ٹیسٹ کے چوتھے روز چائے کے وقفے تک پاکستان نے دوسری اننگز میں 7 وکٹوں کے نقصان پر 219 رنز بنالیے، قومی ٹیم کو میلبرن ٹیسٹ میچ جیتنے مزید 98 رنز درکار ہیں۔

چوتھا روز

چوتھے روز کینگروز نے 6 وکٹوں کے نقصان پر 187 رنز سے اننگز کا آغاز کیا تاہم ایلکس کیری اور مچل اسٹارک 22 رنز کا اضافہ کرسکے اور207 کے مجموعے پر 7ویں وکٹ گرگئی، کپتان پیٹ کمنز 16 جبکہ نتھین لائن ایک رن بناکر پویلین لوٹے۔ ایلکس کیری نے 53 رنز کی اننگز کھیل کر آسٹریلیا کی برتری 317 رنز تک پہنچا دی۔
دوسری اننگز میں آسٹریلیا کی پوری ٹیم محض 84.1 اوورز میں 262 رنز بناکر آل آؤٹ ہوئی۔

پاکستان کو میلبرن ٹیسٹ میں کامیابی کیلئے 317 رنز درکار ہیں جبکہ گرین شرٹس نے 3 وکٹوں کے نقصان پر 133 رنز بنالیے ہیں۔ کپتان شان مسعود نے 60 رنز کی اننگز کھیلی جبکہ امام الحق اور عبداللہ شفیق بالترتیب 12 اور 4 رنز بناکر آؤٹ ہوئے۔ بابراعظم 41 اور سعود شکیل 24 رنز کے مہمان ثابت ہوئے۔ محمد رضوان 14 اور سلمان آغا 4 رنز بناکر کریز پر موجود ہیں۔

آسٹریلیا کی جانب سے پیٹ کمنز اور مچل اسٹارک نے 2، 2 جبکہ جوش ہیزل ووڈ نے ایک وکٹ حاصل کی۔

تیسرا روز

پاکستان نے پہلی اننگز میں 6 وکٹوں کے نقصان پر 194 رنز سے اننگز کا آغاز کیا تاہم محض 68 رنز کے اضافے کے بعد گرین شرٹس آل آؤٹ ہوگئے، آسٹریلیا کو پاکستان پر 54 رنز کی برتری حاصل تھی۔

وکٹ کیپر بیٹر محمد رضوان 42، شاہین شاہ آفریدی 21، حسن علی اور میر حمزہ 2،2 رنز بناکر آؤٹ ہوئے جبکہ 33 رنز بناکر ناٹ آؤٹ رہے۔

کینگروز کی جانب سے پیٹ کمنز نے 5، نتھین لائن نے 4 جبکہ جوش ہیزل ووڈ نے ایک وکٹ حاصل کی۔

آسٹریلیا کی میلبرن ٹیسٹ میں دوسری اننگز کا آغاز اچھا نہ رہا، اوپنر عثمان خواجہ اور ٹریوس ہیڈ صفر صفر پر پویلین لوٹے جبکہ ڈیوڈ وارنر 6، مارنوس لبوشین 4 رنز بناسکے۔ مچل مارش اور اسٹیو اسمتھ نے پانچویں وکٹ کی شراکت میں 153 رنز کی پارٹنرشپ قائم کی تاہم مارش 96 کے انفرادی اسکور پر وکٹ گنوا بیٹھے جبکہ اسٹیو اسمتھ 50 رنز کے مہمان ثابت ہوئے۔

پاکستان کی جانب سے شاہین آفریدی اور میر حمزہ نے 3،3 کھلاڑیوں کو آؤٹ کیا۔

دوسرا روز

آسٹریلیا نے 187 رنز 3 وکٹوں کے نقصان پر اننگز کا آغاز کیا تاہم صرف 131 رنز کے اضافے پر کینگروز کی اننگز سمٹ گئی۔ قومی ٹیم کے فاسٹ بولرز نے پہلے سیشن میں 7 کھلاڑیوں کو پویلین بھیجا، عامر جمال نے 3، شاہین آفریدی، میر حمزہ اور حسن علی کے 2-2 بیٹرز شکار کیے جبکہ سلمان علی آغا نے ایک وکٹ حاصل کی۔

پاکستان نے اپنی پہلی اننگز کا آغاز کیا تو اوپنر امام الحق 10 رنز بناکر پویلین لوٹے، عبداللہ شفیق اور کپتان شان مسعود نے دوسری وکٹ کیلئے 90 رنز کی پارٹنرشپ قائم کی تاہم عبداللہ 62 جبکہ شان 54 رنز بناکر آؤٹ ہوئے۔ بابراعظم ایک مرتبہ پھر ناکامی کی تصویر بنے نظر آئے اور محض ایک رن کے مہمان ثابت ہوئے۔ مڈل آرڈر بیٹر سعود شکیل 9، سلمان علی آغا 5 رنز بناسکے۔

محمد رضوان 29 اور عامر جمال 2 رنز بناکر کریز پر موجود ہیں۔

آسٹریلیا کی جانب سے پیٹ کمنز نے 3، نتھین لائن نے 2 جبکہ جوش ہیزل ووڈ نے ایک وکٹ حاصل کی۔

پہلا روز

میلبرن کرکٹ گراؤنڈ میں کھیلے جا رہے میچ میں قومی ٹیم نے ٹاس جیت کر آسٹریلیا کو بیٹنگ کی دعوت دی، آسٹریلوی اوپنرز کی جانب سے پہلی وکٹ کی شراکت میں 90 رنز بنائے گئے لیکن یہاں اوپنر ڈیوڈ وارنر 38 رنز بنا کر آؤٹ ہوگئے۔ اسکے بعد کینگروز کی دوسری وکٹ 108 رنز پر گری، یہاں عثمان خواجہ 42 رنز بنا کر پویلین لوٹ گئے۔

کھیل

میلبرن ٹیسٹ؛ شان مسعود نے عمران خان، کوہلی کو پیچھے چھوڑ دیا

قومی ٹیم کے ٹیسٹ کپتان شان مسعود نے آسٹریلیا میں مسلسل دو اننگز میں نصف سینچریاں اسکور کرکے نیا ریکارڈ بنالیا۔

میلبرن ٹیسٹ میچ کی پہلی اننگز میں کپتان شان مسعود نے 54 جبکہ دوسری اننگز میں 60 رنز بنائے اور یوں وہ 1983 میں عمران خان کے بعد آسٹریلیا میں ٹیسٹ میچ کی دونوں اننگز میں نصف سنچری بنانے کا کارنامہ انجام دینے والے پہلے پاکستانی کپتان بننے کا اعزاز حاصل کرچکے ہیں۔
اس سے قبل حنیف محمد نے 1964 میں یہ کارنامہ سرانجام دیا جب انہوں نے 104 اور 93 رنز کی اننگز کھیلی تھی جبکہ 1983 میں عمران خان نے 83 اور 72 رنز بناکر یہ اعزاز حاصل کیا تھا۔
قومی ٹیم کے اوپنر شان مسعود 2023 میں یہ کارنامہ سرانجام دیکر تیسرے پاکستانی کپتان بن چکے ہیں جبکہ آسٹریلیا میں 2014 میں ویرات کوہلی نے یہ اعزاز حاصل کیا تھا۔

واضح رہے کہ شان مسعود دوسری اننگز میں 60 رنز بنا کر پیٹ کمنز کا شکار بنے تھے۔ قومی ٹیم کو جیت کیلئے کینگروز نے 317 رنز کا ہدف دیا ہے۔

پاکستان

حج قرعہ اندازی، ریگولر اسکیم کے 63 ہزار سے زائد عازمین کامیاب

کراچی: وزیر مذہبی امور انیق احمد نے حج قرعہ اندازی کا اعلان کر دیا جب کہ 69 ہزار 438 درخواستوں میں سے ریگولر اسکیم کے 63 ہزار 805 خوش نصیبوں کو کامیابی کی نوید سنا دی۔

وزارت مذہبی امور میں پنجاب انفارمیشن ٹیکنالوجی بورڈ کے نمائندوں نے زوم میٹنگ میں شریک وزیر مذہبی امور کی اجازت سے کمپیوٹرائزڈ قرعہ اندازی کے فرائض سر انجام دیے۔

کراچی پریس کلب میں لائیو حج قرعہ اندازی کے موقع پر نگران وزیر مذہبی امور انیق احمد نے کہا کہ عازمین حج کو آسانیاں مہیا کریں گے، اس سال ایک لاکھ 89 ہزار سے زائد کا کوٹہ ملا جس میں سے 25 ہزار کا کوٹہ اوورسیز پاکستانیوں کیلیے سپانسر حج کے لیے مخصوص کیا گیا۔چاہتے ہیں کہ سب کو کامیاب کر دیا جائے لیکن کابینہ سے منظوری لینا ہو گی۔

انہوں نے کہا کہ حج اخراجات میں ایک لاکھ روپے تک کمی لائی گئی، فضائی کرائے میں بھی کمی کیلیے کوشاں ہیں، جس کا فرق عازمین کو لوٹایا جائے گا۔

انیق احمد نے کہا کہ اس سال اسلام آباد کیساتھ کراچی سے بھی روڈ ٹو مکہ پروگرام کے تحت عازمین کی امیگریشن کی جائیگی۔ اس سال پہلی مرتبہ اسکردو سے بھی پروازیں آپریٹ کرینگے۔پہلی مرتبہ شارٹ حج متعارف کرایا، 21/22 روز میں مناسک حج پورے کرکے واپسی ہوسکے گی۔

پاکستان

پٹرولیم مصنوعات کی قیمتوں میں معمولی ردوبدل متوقع

اسلام آباد: عالمی سطح پر برینٹ کی قیمتوں میں معمولی اضافے کے بعد نگران حکومت نئے سال کے پہلے ماہ جنوری 2024 کے پہلے ہاف میں پٹرولیم مصنوعات کی قیمتوں کو برقرار رکھ سکتی ہے۔

آئل انڈسٹری کے اندازوں کے مطابق پٹرول اور کیروسین آئل کی قیمتوں میں ایک روپے تک کمی ہو سکتی ہے جبکہ ہائی سپیڈ ڈیزل اور لائٹ ڈیزل کی قیمتوں میں 2 روپے تک اضافہ ہو سکتا ہے۔

او ایم سیز کے تخمینے ایکسچینج ریٹ اور موجودہ پٹرولیم لیوی اور جنرل سیل ٹیکس کی شرحوں میں صفر ایڈجسٹمنٹ پر مبنی ہیں۔حکومت پٹرول اور ایچ ایس ڈی پر 60 روپے فی لیٹر پی ایل اور جی ایس ٹی پر صفر کی شرح وصول کر رہی ہے۔

بین الاقوامی سطح پر برینٹ تیل کی قیمتیں 16 دسمبر 2023 سے 77.95 ڈالر سے 81.07 ڈالر فی بیرل کے درمیان رہیں۔ آخری جائزہ میں، حکومت نے ڈالر کے مقابلے میں 284.28 روپے کی شرح تبادلہ کا اطلاق کیا۔

خام تیل کی نقل و حمل کرنے والی تجارتی کمپنیوں نے یمن میں حوثی باغیوں کے ڈرون اور میزائل حملوں کے خطرے سے بچنے کے لیے بحیرہ احمر کے راستے کچھ ٹینکروں کو بھیجنا بند کر دیا۔

ماہرین کا کہنا ہے کہ تیل کے جہازوں کے ری روٹ سے سفر میں تاخیر اور اضافی اخراجات میں اضافہ ہوگا۔

شوبز

فریال محمود کا اپنے سابق شوہر کو ذہنی اذیت دینے کا انکشاف

شوبز انڈسٹری کی معروف اداکارہ فریال محمود نے انکشاف کیا ہے کہ وہ اپنے سابق شوہر دانیال راحیل سے بہت پیار کرتی تھیں لیکن ساتھ ہی اُنہیں ذہنی اذیت بھی دیتی تھیں۔

فریال محمود نے حال ہی میں ایک پوڈکاسٹ میں شرکت کی جس کا ایک ویڈیو کلپ سوشل میڈیا پر وائرل ہورہا ہے جس میں وہ اپنی ناکام ازدواجی زندگی سے متعلق بات کررہی ہیں۔

اداکارہ نے کہا کہ “دانیال راحیل سے شادی کے بعد ازدواجی زندگی میں کافی مسائل پیدا ہونے لگے تھے، میری ذہنی صحت بری طرح متاثر ہورہی تھی، اس شادی کی وجہ سے میری اور دانیال کی ذہنی صحت داؤ پر لگ گئی تھی”۔

اُنہوں نے کہا کہ “میرے سابق شوہر نے کبھی میرے اوپر جسمانی تشدد نہیں کیا تھا لیکن ہم دونوں نے ایک دوسرے کو ذہنی اذیت تھی، ایک دوسرے پر ذہنی تشدد کیا”۔

فریال محمود نے کہا کہ “شوہر کی طرف سے ذہنی اذیت ملنے کے بعد بھی بار بار شوہر کے پاس جاتی تھی کیونکہ میں اُن سے بہت زیادہ پیار کرتی تھی”۔

اداکارہ نے کہا کہ “جب کوئی عورت کسی مرد سے محبت کرتی ہے تو وہ اُس کا تشدد اور بدتمیزی بھی برداشت کرتی ہے کیونکہ اُس وقت وہ سب ٹھیک لگ رہا ہوتا ہے”۔

اُنہوں نے مزید کہا کہ “میں بھی ایک عورت ہوں، میں عورتوں کے جذبات اور مسائل سمجھتی ہوں تو میں کبھی بھی اُس عورت کو غلط نہیں بولوں گی جو اپنے شوہر کا نامناسب رویہ برداشت کرتی ہے”۔

واضح رہے کہ فریال محمود اور اداکار دانیال راحیل نے سال 2020 میں کورونا وبا کے دوران خاموشی سے شادی کی تھی لیکن اس جوڑی کی شادی زیادہ عرصے تک چل نہیں سکی اور مارچ 2022 میں دونوں نے طلاق کی تصدیق کردی تھی۔

پاکستان

ایف بی آر کا محکمہ کسٹمز میں بڑی اصلاحات لانے کا فیصلہ

اسلام آباد: فیڈرل بورڈ آف ریونیو ( ایف بی آر ) نے درآمدات، برآمدات، ٹرانزٹ اور اسسمنٹ کی کلیئرنس کے لیے پاکستان کسٹمز کے بنیادی کاموں کو نئے کسٹمز ڈیجیٹل مینجمنٹ سسٹم میں اپ گریڈ اور تبدیل کرنے کے لیے محکمہ کسٹمز میں بڑی اصلاحات متعارف کرانے کا فیصلہ کر لیا۔

جاری نوٹیفکیشن کے مطابق ایف بی آر کسٹم آرگنائزیشن میں بڑی اصلاحات نافذ کرے گا، جامع بزنس پروسیس میپنگ اور ری انجینئرنگ کے ذریعے پاکستان کسٹمز کے بنیادی افعال کو اپ گریڈ کرنے اور تبدیل کرنے کے ساتھ ساتھ موجودہ وی باک (“WeBOC” ) کسٹم کلیئرنس سسٹم کو نئے کسٹم ڈیجیٹل مینجمنٹ سسٹم سے بدل دیا جائے گا۔

ورکنگ گروپ اپیزمنٹ، ٹرانزٹ، پریوینٹیو، ویلیوایشن، ٹیکنالوجی، پوسٹ کلیئرنس آڈٹ، انٹیگریشن، ایچ آر مینجمنٹ، ایکسپورٹ اور دیگر شعبوں میں بنائے گئے ہیں۔

فیڈرل بورڈ آف ریونیو نے اپنے متعلقہ چیئرپرسنز اور فوکل پرسنز کے ساتھ ورکنگ گروپس کو مطلع کیا ہے کہ وہ نظامی تبدیلیوں کو اپنانے سے پہلے کنسلٹنٹس کے آؤٹ پٹ کو مربوط بنانے اور نگرانی کی تصدیق کریں۔ ورکنگ گروپس اور فوکل پرسنز کے ٹی او آرز کی وضاحت کی گئی ہے۔

پاکستان کسٹمز کے آپریشنز کو تبدیل کرنے کے لیے ایف بی آر نے بین الاقوامی کنسلٹنٹس کی خدمات حاصل کی ہیں۔

ا

انٹر نیشنل, اہم خبریں

امریکی ایئرپورٹ پر چیکنگ کے دوران ڈائپر سے پستول کی گولیاں برآمد

نیویارک: امریکا کے ایک ایئرپورٹ میں ڈائیپر میں سے پستول کی گولیاں برآمد ہونے پر نامعلوم مسافر کو فوری طور پر گرفتار کرلیا گیا ہے۔

میڈیا رپورٹس کے مطابق امریکا کی ٹرانسپورٹیشن سیکیورٹی ایڈمنسٹریشن(ٹی ایس اے) نے واقعے کی تفصیلات بتاتے ہوئے کہ نیویارک کے لاگارڈیا ایئرپورٹ پر سیکیورٹی افسران کوبچوں کے ایک ڈائپر کے اندر چھپائی گئی 17 گولیاں ملیں۔

ٹی ایس اے نے بتایا کہ افسران نے مسافر کو اس وقت پکڑا جب ایکسرے مشین پر سے اس کا سامان گزرنے پر الارم بجنا شروع ہوگیا ۔
حکام کی جانب سے مسافر سے جب استفسار کیا گیا تو اس نے ابتدائی طور پر دعویٰ کیا کہ وہ نہیں جانتا کہ گولیوں سے بھرا ڈائیپر اس کے بیگ میں کیسے آیا۔ تاہم بعد میں اس نے اپنی گرل فرینڈ پر الزام لگایا کہ اس نے اس ڈائیپر کو بیگ میں رکھا ہے ۔

ٹی ایس اے نے اس مسافر کی شناخت آرکنساس سے تعلق رکھنے والے ایک شخص کے طور پر کی جس نے شکاگو کے مڈ وے ایئرپورٹ پر پرواز کے لیے ٹکٹ خریدا تاہم حکام نے مسافر کا نام ظاہر نہیں کیا ہے۔ پولیس نے مسافر کو 9 ایم ایم کے کارتوس کے غیر قانونی قبضے کے الزام میں گرفتار کیا ہے ۔

سائنس و ٹیکنالوجی

واٹس ایپ کا ویب ورژن کے لیے متعدد فیچرز پر کام جاری

کیلیفورنیا: انسٹنٹ میسجنگ ایپلی کیشن واٹس ایپ اپنے ویب ورژن کے لیے متعدد نئے فیچر متعارف کرانے جا رہی ہے۔ ان فیچرز میں نیا سائیڈ بار، دوبارہ سے ڈیزائن کردہ ڈارک موڈ اور اپنی پروفائل کے لیے یوزر نیم بنائے جانے کا آپشن شامل ہے۔

رواں برس کے ماہ اکتوبر میں یہ خبر سامنے آئی تھی کہ میٹا کی ذیلی ایپ یوزر نیم فیچر پر کام کر رہی ہے جس کے بعد رابطے کے لیے ایک صارف کو دوسرے صارف کے فون نمبر کی ضرورت نہیں رہے گی۔ تاہم، اس وقت آزمائشی مراحل میں موجود یہ فیچر ایپ کے چند موبائل صارفین کے لیے جاری کیا گیا تھا۔

لیکن اب واٹس ایپ بِیٹا انفو کی جانب سے پیش کی جانے والی حالیہ رپورٹ میں بتایا گیا ہے کہ کمپنی اس فیچر کا دائرہ کار ویب ورژن تک وسیع کرنے کے لیے کام کر رہی ہے۔

(تصویر: واٹس ایپ بِیٹا انفو)

(تصویر: واٹس ایپ بِیٹا انفو)

فی الحال واٹس ایپ ویب میں کمیونیٹیز، اسٹیٹس، چینلز اور نیو چیٹ کے بٹن ونڈو میں اوپر کی جانب بائیں طرف موجود ہیں لیکن نیا سائیڈ بار ان تمام کو براؤزر ونڈو کے بائیں جانب منتقل کر دے گا تاکہ صارفین متعدد ٹیبز کے درمیان باآسانی سوئچ کر سکیں۔

سائیڈ بار کے علاوہ کمپنی ویب ورژن صارفین کے لیے اپنا یوزر نیم تبدیل کرنے کے فیچر پر بھی کام کر رہی ہے۔

پاکستان

ایمان مزاری رشتہ ازدواج میں منسلک ہوگئیں

 اسلام آباد: معروف وکیل اور انسانی حقوق کی کارکن ایمان مزاری رشتہ ازدواج میں منسلک ہوگئیں۔

ایمان مزاری نے اپنے دوست عبدالہادی سے شادی کی خبر سماجی رابطے کی ویب سائٹ ایکس پر دی۔ انہوں نے اپنے دلہے کے ساتھ تصویر پوسٹ کرتے ہوئے انگوٹھی، دل اور نظر کا ایموجی استعمال کیا۔

ایمان مزاری کی شادی اپنے ہی پیشے سے تعلق رکھنے اور انسانی حقوق کے مقدمات لڑنے والے وکیل عبد الہادی سے ہوئی ہے۔ عبدالہادی نے بھی اپنے ایکس اکاؤنٹ پر پوسٹ شیئر کرکے اپنی شادی کا اعلان کیا۔

 

 

واضح رہے کہ ایمان مزاری انسانی حقوق کی سابق وفاقی وزیر شیریں مزاری کی صاحبزادی ہیں۔ صارفین کی جانب سے جوڑے کو مبارکباد دی جارہی ہے اور نیک خواہشات کا اظہار کیا جارہا ہے۔

اہم خبریں, پاکستان

فلسطینیوں سےاظہار یکجہتی؛ وزیراعظم کا نئےسال کی تقاریب پر پابندی کا اعلان

 اسلام آباد: نگراں وزیراعظم انوار الحق کاکڑ نے فلسطینیوں سےاظہار یکجہتی کے لیے نئےسال کی تقاریب پرپابندی کااعلان کردیا۔

نگراں وزیراعظم انوار الحق کاکڑ نے جمعرات کے روز اپنے ایک بیان میں کہا کہ تمام پاکستانیوں سے گزارش ہے کہ وہ غزہ کے مظلوموں کے ساتھ اظہار یکجہتی کا مظاہرہ اور سال نو پر کسی بھی قسم کے جشن سے گریز کریں اور سادگی سے سال 2024 کو خوش آمدید کہیں۔

انہوں نے کہا کہ ’نہتے فلسطینی مظلوموں سے اظہار یکجہتی کیلیے حکومت کی طرف سے سال نو کے حوالے سے کسی بھی قسم کی تقریب پر مکمل پابندی ہوگی، یہ فیصلہ فلسطین کی تشویشناک صورت حال کو مدنظر رکھتے ہوئے کیا گیا ہے‘۔

وزیراعظم نے کہا کہ ’قابض اسرائیلی فورسز 7 اکتوبر کے بعد سے فسلطینیوں پرظلم و ستم کے پہاڑ توڑ رہی ہیں، اب تک وہاں پر بچوں سمیت 21 ہزار سے زائد نہتے شہری شہید ہوچکے ہیں، فلسطینیوں کی نسل کشی پر پاکستانی قوم اور پوری امت مسلمہ شدید رنج و غم میں ہے‘۔

انوار الحق کاکڑ نے کہا کہ پاکستان غزہ میں جاری خون ریزی کو رکنے کے لیے عالمی فارمز پر آواز اٹھا رہا ہے اور یہ سلسلہ جاری رکھے گا جبکہ ہم نے فلسطینیوں کیلیے دو امدادی کھیپ بھیجیں ہیں اور تیسری جلد روانہ کریں گے۔

انوار الحق کاکڑ نے کہا کہ غزہ میں 9 ہزار بچوں سمیت 21 ہزار فلسطینی فلسطینی شہید ہوچکے ہیں، پاکستان نےمظلوم فلسطینیوں کے لیے دنیا کے ہر فورم پر آواز اٹھائی۔

انہوں نے کہا کہ فلسطینیوں کی مدد کے لیے تیسری امدادی کھیپ جلد روانہ کی جائے گی، فلسطینیوں کی بروقت امداد اور غزہ سے محفوظ انخلا کے لیے مصر اور اردن سےرابطے میں ہیں۔