لاہور : (ویب ڈیسک) لاہور کے علاقے رائیونڈ روڈ پر شوہر نے بیوی کو گلا دبا کر قتل کردیا ۔
پولیس کے مطابق ملزم ارشاد مقتولہ کلثوم بی بی کو گلا دبا کر قتل کرنے کے بعد تھانے پہنچ گیا، ون فائیو کی کال پر نہ پہنچنے والی پولیس نے تھانے سے ملزم کوگرفتار کرلیا ۔
لاہور پولیس نے ملزم کی نشاندہی پر مقتولہ کی لاش کو قبضے میں لے لیا ، پولیس نے شواہد اکٹھے کرکے لاش کو پوسٹمارٹم کیلئے منتقل کردیا ہے۔

لاہور: (ویب ڈیسک) گورنر پنجاب محمد بلیغ الرحمان نے پنجاب اسمبلی کے انتخابات 12 اپریل کو کرانے کی تجویز پیش کر دی۔
ذرائع کے مطابق گورنر پنجاب محمد بلیغ الرحمان کی پنجاب اسمبلی کی تحلیل کے حوالے سے آئینی ماہرین سے مشاورت مکمل ہو گئی، گورنر پنجاب آج رات وزیراعلیٰ پنجاب کی سمری پر دستخط کر سکتے ہیں، جس کے بعد پنجاب اسمبلی آج رات ہی تحلیل ہونے کا امکان ہے۔
گورنر پنجاب محمد بلیغ الرحمان نے وزیر اعظم کو پنجاب اسمبلی کے انتخابات 12 اپریل کو کرانے کی تجویز پیش کر دی۔
واضح رہے کہ وزیراعلیٰ پنجاب چودھری پرویز الٰہی نے گزشتہ رات پنجاب اسمبلی تحلیل کرنے کی سمری گورنر پنجاب کو ارسال کی تھی۔

اسلام آباد: (ویب ڈیسک) سپریم کورٹ آف پاکستان نے اٹارنی جنرل کی تعیناتی سے متعلق ریکارڈ طلب کرنے کا تحریری حکم جاری کر دیا ہے، 3 صفحات پر مشتمل حکمنامہ جسٹس قاضی فائز عیسیٰ نے تحریر کیا ہے۔
حکم نامے کے مطابق اشتر اوصاف نے بطور اٹارنی جنرل کچھ ماہ قبل استعفیٰ دے دیا تھا، کافی وقت گزرنے کے باوجود نیا اٹارنی جنرل تعینات نہیں کیا گیا، ڈپٹی اور ایڈیشنل اٹارنی جنرل سادہ سوال کا جواب بھی نہ دے سکے کہ اٹارنی جنرل کون ہے۔
تحریری حکم میں سپریم کورٹ نے کہا اٹارنی جنرل آئینی عہدہ ہے جسے خالی نہیں چھوڑا جا سکتا، آئین میں کسی قائم مقام اٹارنی جنرل کی کوئی گنجائش نہیں، قانون کے مطابق معاونت کے لئے اٹارنی جنرل کو نوٹس کیا جاتا ہے کسی ڈپٹی کو نہیں۔
سپریم کورٹ کا اپنے تحریری حکم نامے میں مزید کہنا تھا کہ ایڈیشنل اور ڈپٹی، اٹارنی جنرل کے متبادل نہیں ہو سکتے، ایڈیشنل اور ڈپٹی اٹارنی جنرل، اٹارنی جنرل کی ہدایت پر ہی عدالت آتے ہیں، آئندہ سماعت پر سیکرٹری قانون اور جو بھی اٹارنی جنرل ہوں حاضری یقینی بنائیں۔

اسلام آباد: (ویب ڈیسک) وفاقی وزیر داخلہ رانا ثنا اللہ نے دعویٰ کیا ہےکہ وزیراعلیٰ پنجاب پرویز الہٰی نے ہم سےکہا تھا کہ تحریک عدم اعتمادلائیں تاکہ اسمبلی نہ ٹوٹے لیکن ہم نے انکارکردیا۔
نجی ٹی وی سے گفتگو کرتے ہوئے رانا ثنا اللہ نے کہا کہ اسمبلی توڑنےکے عمل کو غیر آئینی اور غیر جمہوری سمجھتے ہیں، پنجاب اسمبلی ٹوٹےگی تو نگراں سیٹ اپ آجائےگا ، الیکشن ہوگا تو پتا چلےگا کہ ان کی شہرت کہاں ہے؟ پنجاب کا الیکشن اکثریت سے جیت کر دکھائیں گے ۔
رانا ثنا اللہ نے کہا کہ عمران خان جھوٹا ہے، کبھی درست بات نہیں کرسکتا، ہم نے پہلے بھی کوئی عذرپیش نہیں کیا کہ اسمبلی نہ توڑیں، پہلے وہ کہہ رہے تھےکہ 23 تاریخ کو اسمبلی توڑ دیں گے، ہم نےگورنرکے ذریعے ایڈوائس بھیجنےکا حق استعمال کیا، سیلاب کی وجہ سےسندھ اسمبلی توڑنے کے لیے تیار نہیں۔
وفاقی وزیر داخلہ کا کہنا تھا کہ یہ تاریخ پرتاریخ دے رہے تھے تو ہم بھی گورنرکا آئینی رول استعمال کرسکتے تھے، اعتماد کے ووٹ سے قبل ان کے 12، 13 لوگ ہمارے ساتھ رابطے میں تھے، 12، 13 میں سے 7 لوگ ان کے پاس واپس چلےگئے، ہم کسی کو پیسے دیتے تو اس کی جرات تھی کہ واپس جاتا ؟ بلال وڑائچ اپنے بھائی سے جھگڑے کی وجہ سے گئے۔
ان کا کہنا تھا کہ ضمنی الیکشن ہم بھی جیتتے رہے ہیں، ملک کو انہوں نے پھنسایا تھا، ہم نےبدترین صورت حال سے نکالا، جنیوا کانفرنس بہت بڑا اقدام ہے، اب وزیراعظم امارات گئے ہیں، تین سے چھ ماہ میں ملک کی معاشی صورت حال بہترکریں گے۔
انہوں نےکہا کہ کراچی میں ایم کیو ایم بلدیاتی الیکشن سے نہیں بھاگ رہی، حلقہ بندی کا ایشو ہے۔

لاہور: (ویب ڈیسک) مسلم لیگ ن پنجاب کے سینئر رہنما ملک محمد احمد خان نے کہا ہے کہ صوبے میں انتخابات کے لیے ہم سو فیصد تیار ہیں۔
مسلم لیگی رہنما کا کہنا تھا کہ ملک میں سب سے زیادہ گرینڈ نیشنل ڈائیلاگ کا حامی ہوں، اگر ملک میں استحکام لانا ہے تو پھر گرینڈ نیشنل ڈائیلاگ کرنا ہو گا، معیشت، سیاست، عدالت کے لیے ایک گرینڈ نیشنل ڈائیلاگ کی ضرورت ہے۔
ملک احمد خان نے کہا کہ اس وقت آئی ایم ایف کے ساتھ معاملات چل رہے ہیں، نگران حکومت تو مالیاتی امور پر فیصلے نہیں کر سکتی، گزشتہ 8 ماہ میں وفاقی حکومت مشکل فیصلے کر رہی ہے۔
انہوں نے کہا کہ دو صوبوں میں انتخابات کرانا ان کا حق ہے، جب ایک اسمبلی تحلیل ہو جائے تو مقررہ وقت میں انتخاب ہوں گے، ایک صوبے میں انتخاب کے ذریعے حکومت آئے گی تو جب جنرل انتخابات ہوں گے تو ایک جماعت کی حکومت پہلے ہی موجود ہو گی، نگران حکومت کے تصور کو کیسے ختم کر سکتے ہیں۔

اسلام آباد: (ویب ڈیسک) وزیر خارجہ بلاول بھٹو زرداری نے افغانستان کے قائم مقام وزیر خارجہ امیر خان متقی سے ٹیلیفون پر بات کی اور افغانستان کی وزارت خارجہ پر بدھ کو ہونے والے دہشت گردانہ حملے کی مذمت کی۔
سماجی رابطے کی ویب سائٹ ٹوئٹر پر اپنے پیغام میں وزیر خارجہ بلاول بھٹو زرداری نے کہا کہ پاکستان اور افغانستان کے شہری بدترین دہشت گردی کا شکار ہیں، دہشت گردی کی لعنت کو شکست دینے کیلئے ہر ممکن کوشش کرنی چاہیے۔