اسلام آباد: (ویب ڈیسک) وزیر اعظم کی زیر صدارت گندم اور آٹے کی مصنوعی قلت کے حوالے سے ہنگامی اجلاس ہوا جس میں شہباز شریف کو گندم کی صورتحال پر بریفنگ دی گئی۔
اجلاس کے دوران وزیر اعظم کو بتایا گیا کہ ملک میں گندم کے وافر ذخائر موجود ہیں، 1.3 ملین میٹرک ٹن درآمدی گندم کا سٹاک بھی پہنچ گیا ہے، جنوری کے اختتام تک مزید اتنا ہی سٹاک پہنچ جائے گا، رواں سیزن کے اختتام تک گندم کے کیری فارورڈ سٹاک 1.4 ملین میٹرک ٹن ہوں گے جو نئے سیزن سے پہلے ملکی غذائی ضروریات پوری کرنے کیلئے کافی ہیں۔
بریفنگ کے بعد وزیرِاعظم شہباز شریف نے گندم کے موجودہ ذخائر پر اطمینان کا اظہار کرتے ہوئے کہا کہ گندم کی مصنوعی قلت پیدا کر کے ناجائز منافع خوری کی اجازت نہیں دیں گے، صوبے اپنے اور پاسکو کے ذخائر سے گندم کی فلور ملز تک بروقت رسد یقینی بنائیں اور گندم اور آٹے کی بروقت ترسیل کیلئے گورننس بھی بہتر کریں۔
وزیرِ اعظم نے مزید کہا کہ گزشتہ 5 دن میں 40 کلو کے تھیلے کی قیمت میں تقریباً ایک ہزار روپے کی کمی ہوئی، متعلقہ وفاقی و صوبائی ادارے آٹے اور گندم کے ذخیرہ اندوزوں کے خلاف سخت اقدامات کریں، حکومت آٹے کی مصنوعی قلت سے مہنگائی پیدا کرنے والوں کو قرار واقعی سزا دے گی۔

لاہور: (ویب ڈیسک) پاکستان مسلم لیگ ق اور پاکستان تحریک انصاف کی پارلیمانی پارٹی کا اجلاس وزیر اعلیٰ چودھری پرویز الٰہی کے زیر صدارت شروع ہو گیا جس میں اعتماد کے ووٹ اور ایوان میں پاور شو بارے مشاورت کی جا رہی ہے۔
وزیر اعلیٰ چودھری پرویز الٰہی کے زیر صدارت اجلاس میں سردار عثمان بزدار، میاں اسلم اقبال، میاں محمود الرشید سمیت دیگر وزرا اور اراکین شریک ہیں۔
اجلاس میں حکومتی اتحاد کی جانب سے آج کی تمام صورتحال پر تبادلہ خیال اور ایوان میں پاور شو کرنے یا اعتماد کا ووٹ لینے پر مشاورت کی جا رہی ہے۔

اسلام آباد: (ویب ڈیسک) ترجمان دفتر خارجہ نے کہا کہ لندن کے ہیتھرو ایئرپورٹ سے قبضے میں لیے گئے یورینیم پیکج کے معاملے کا ہمیں یقین ہے کہ رپورٹس حقائق پر مبنی نہیں ہیں۔
ترجمان دفتر خارجہ کا معاملے کے حوالے سے مزید کہنا ہے کہ ہم نے میڈیا رپورٹس دیکھی ہیں، کوئی بھی معلومات ہمارے ساتھ باضابطہ طور پر شیئر نہیں کی گئی ہیں۔
واضح رہے کہ برطانوی خبر ایجنسی نے خبر میں دعویٰ کیا تھا کہ یورینیئم پیکیج پاکستان سے عمان کے راستے ایک پرواز کے ذریعے برطانیہ پہنچا تھا۔

کراچی: (ویب ڈیسک) پیپلز پارٹی کو ناظم آباد عید گاہ گراؤنڈ میں جلسہ کرنا مہنگا پڑ گیا، الیکشن کمیشن نے بلدیاتی انتخابی مہم کے دوران پیپلز پارٹی کی جانب سے جلسہ منعقد کرنے کا نوٹس لیتے ہوئے جرمانہ عائد کر دیا۔
ڈسٹرکٹ مانیٹرنگ آفیسر کے مطابق پیپلز پارٹی کے ضلعی عہدیداروں نے الیکشن کمیشن قوانین کی خلاف ورزی کی، جس کے باعث صدر پیپلز پارٹی ضلع وسطی مسرور خان پر جرمانہ عائد کر دیا۔
الیکشن کمیشن کے مطابق جلسہ عام، جلسوں اور گاڑیوں پر مشتمل ریلیوں کی اجازت نہیں ہے، پیشگی اطلاع کے ساتھ امیدوار کو صرف کارنر میٹنگ کی اجازت ہے۔

لاہور: (ویب ڈیسک) پاکستان تحریک انصاف کے رہنما اور ترجمان وزیر اعلیٰ پنجاب فیاض الحسن چوہان نے کہا ہے کہ 200 بھکاری، چور جنیوا گئے، 9 ارب ڈالر میں سے ایک دھیلا، ایک پائی، ایک آنا پاکستان نہیں آیا۔
فیاض الحسن چوہان نے کہا کہ دنیا اتنی بے وقوف ہے کہ ان جھوٹے حکمرانوں کو 9 ارب ڈالر دیں گے، دو سو بھکاری دو سو چور جنیوا جہاز بھر کر لے گئے، دنیا کو معلوم ہے کہ شہباز شریف نکما حکمران ہے، شرم سے سر جھکا کر واپس آئے۔
پی ٹی آئی رہنما نے کہا کہ 10 اپریل 2021ء سے ٹوپی ڈرامہ شروع ہوا، آل پاکستان لوٹ مار ایسوسی ایشن ساڑھے تین سال کہتی رہی اقتدار میں آئیں گے، نہروں میں دودھ و شہد نکلے گا۔
فیاض الحسن چوہان کا کہنا تھا کہ عمران خان ایوان وزیر اعظم سے نکلا تھا تو خزانے میں 17 ارب ڈالر تھا اب 4 ارب ڈالر تھے، عمران خان اقتدار میں آیا بہترین ٹیم سے مل کر ملکی تاریخ میں 61 سو ارب ٹیکس اکٹھے کئے۔
انہوں نے کہا کہ شہباز شریف بڑے بھائی کی منتیں تو کبھی بوٹ پالش کرتا کہ مجھے وزیراعظم بناؤ، 35 سے 50 فیصد پیسے کھا کر سڑکیں بنانا آسان کام ہے لیکن وزارت عظمیٰ پر پرفارمنس بہت مشکل کام ہے، مونچھوں والے سے ڈنٹونک اشتہار کے بجائے عمران خان ملک کو ترقی کی طرف لے کر گیا۔
فیاض الحسن چوہان نے کہا کہ انہوں نے اپنی طرف سے عمران خان کو نکالا جو اب جن نہیں دیو بن گیا ہے، ان کو رات و دن چلتے پھرتے کھاتے پیتے عمران خان نظر آتا ہے، جس طرح بندر کے ہاتھ میں ماچس آئی، اسی طرح ان کے ہاتھ وزارت عظمی آ گئی ہے، جنہوں نے غیر ملکی طاقتوں سے عمران خان کو اتارا ان کا یوم حساب آئے گا۔

اسلام آباد: (ویب ڈیسک) وزیراعظم شہباز شریف کل سے متحدہ عرب امارات کے صدر کی دعوت پر دو روزہ دورے پر یو اے ای روانہ ہوں گے۔
وزیراعظم اپنے دورے کے دوران صدر شیخ محمد بن زید النہیان سمیت اہم اماراتی رہنماؤں، تاجروں اور سرمایہ کاروں سے ملاقاتیں کریں گے، اس حوالے سے وزیراعظم کی زیر صدارت دورہ یو اے ای کے حوالے سے جائزہ اجلاس بھی ہوا۔
وزیر اعظم نے کہا کہ یو اے ای کے ساتھ برادرانہ تعلقات کو مضبوط بنانے کے خواہاں ہیں، دونوں ممالک کے درمیان تجارتی، اقتصادی اور سرمایہ کاری کے شعبوں میں تعاون کے وسیع مواقع موجود ہیں، مکمل تیاری کے ساتھ یواے ای کے دورے پر جارہے ہیں۔

اسلام آباد: (ویب ڈیسک) وزیراعظم شہباز شریف تعزیت کیلئے سابق وزیر اعلیٰ اکرم خان درانی اور ڈپٹی سپیکر زاہد اکرم درانی کی رہائشگاہ پہنچ گئے۔
وزیر اعظم شہباز شریف نے اکرم خان درانی سے ان کی والدہ کے انتقال پر اظہار تعزیت کیا، مرحومہ ڈپٹی سپیکر قومی اسمبلی زاہد اکرم درانی دادی ہیں۔
اس موقع پر وزیر اعظم شہباز شریف نے مرحوم کے روح کے ایصال ثواب کیلئے فاتحہ خوانی کی اور ان کے بلند درجات کیلئے دعائے مغفرت بھی کی۔

لاہور: (ویب ڈیسک) وزیراعلی پنجاب پرویز الہیٰ کا کچھ دیر بعد اسمبلی سے اعتماد کا ووٹ لینے کا امکان ہے۔
ڈپٹی اسپیکر پنجاب اسمبلی واثق قیوم نے اپنی ٹوئٹ میں کہا ہے کہ نمبر پورے ہیں، آدھے گھنٹے میں اعتماد کا ووٹ لینے والے ہیں۔
دوسری جانب پی ٹی آئی رہنما فواد چوہدری نے اپنی ٹوئٹ میں کہا ہے کہ الحمدللہ 187 کا نمبر مکمل ہے۔