اسلام آباد: (ویب ڈیسک) مریم نواز شریف نے کہا ہے کہ پارٹی میں نئی ذمہ داری کیلئے اعتماد کرنے پر قائد نواز شریف اور صدر مسلم لیگ (ن) شہباز شریف کی مشکور ہوں۔
سماجی رابطے کی ویب سائٹ ٹویٹر پر مسلم لیگ (ن) کی سینئر نائب صدر نے کہا کہ نواز شریف کے ویژن اور شہبازشریف کی رہنمائی میں پارٹی کو آرگنائز اور مضبوط کرنے کیلئے کام کروں گی۔
اہم ذمہ داری کو نبھانے کیلئے ملک بھر میں پارٹی عہدیداروں اور ورکرز سے ملاقاتیں کروں گی اور جہاں ضرورت پڑی، پارٹی میں بہتری لائی جائے گی اور جدید طریقے اختیار کیے جائیں گے۔

اسلام آباد: (ویب ڈیسک) وفاقی وزیر داخلہ رانا ثناء اللہ نے کہا کہ کالعدم ٹی ٹی پی کو ٹیبل پر لانے کی پہلی شرط ہے کہ وہ ہتھیار رکھیں، کوشش کی جا رہی ہے کہ انہیں مذاکرات کی ٹیبل پر لایا جائے۔
اسلام آباد میں آئی جی اسلام آباد کے ساتھ پریس کانفرنس کرتے ہوئے وزیر داخلہ نے کہا کہ میٹنگ میں دہشت گردی کیخلاف زیرو ٹالرنس پر اتفاق ہوا، جو فیصلے ہوئے آنے والے دنوں میں ان پرعمل ہوتا دیکھیں گے، افغانستان اور وہاں پر کالعدم ٹی ٹی پی ایک حقیقت ہے، تمام صوبوں کی سی ٹی ڈی کو فیڈریشن کی طرف سےمدد دی جائے گی۔
انہوں نے مزید کہا کہ دہشتگرد کو روک کر ہلاک کرنا اسلام آباد پولیس کا بڑا کارنامہ ہے، پولیس کی کاوش کی وجہ سے بڑے نقصان سے محفوظ رہے، دو زخمی ہونے والے جوانوں کو بھی قوم سلام پیش کرتی ہے، اسلام آباد پولیس پہلے بھی اور اب پہلے سے بہتر طریقے سے اپنی ذمہ داری نبھا رہی ہے، ان کے تمام دیرینہ مطالبات پورے کیے گئے ہیں۔
وفاقی وزیر داخلہ رانا ثنا اللہ نے مزید کہا کہ ہم نے سی ٹی ڈی کا اسٹرکچر تیار کیا اور سہولیات فراہم کیں، تحقیقات چل رہی ہیں اس لیے تمام چیزیں سامنے نہیں لا سکتے، یہ خوف وہراس پھیلانے کا طریقہ ہوتا ہے، پارلیمنٹ پر حملے کا معاملہ میڈیا پر اٹھایا گیا، سی ٹی ڈی نے پنجاب میں بہت زبردست کام کیا، گزشتہ دنوں سی ٹی ڈی کے 2 اہلکار بھی شہید ہوئے۔
رانا ثنا اللہ نے کہا کہ شہید عدیل کی فیملی کو شہداء پیکج دیا جا رہا ہے ، پینشن اور بچوں کے سکول کے اخراجات بھی حکومت برداشت کرے گی، شہید قوم کا محسن ہوتا ہے اس کے احسان کا حق ادا نہیں ہو سکتا، کم از کم اہل خانہ کا معاشی تحفظ ہونا چاہئیے، ان کی بیوہ کو ایک کروڑ روپے کا چیک دیا ہے اس کے علاوہ ایک کروڑ پچیس لاکھ روپے مالیت کا گھر بھی حکومت دے گی۔
وفاقی وزیر داخلہ رانا ثنا اللہ نے مزید کہا کہ ایس پی رینک کے افسر ہر بدھ کو تمام شہدا کے لواحقین کے مسائل کو سنیں گے، آج سے 5،6 ماہ پہلے جب مجھے معلوم ہوا تو شہدا کے 1 ارب 22 کروڑ واجب الادا تھے، حکومت کی مالی حالت آپ کے سامنے ہے لیکن یہ رقم ادا کی گئی۔

لاہور: (ویب ڈیسک) پاکستان تحریک انصاف ( پی ٹی آئی) کے سینئر رہنما اور سابق وفاقی وزیر فواد چودھری نے کہا ہے کہ گجرات میں پولیس کی تعداد کم کر کے حملے کا موقع فراہم کیا گیا، منصوبہ بندی کے ذریعے عمران خان کو قتل کرنے کی کوشش کی گئی۔
پی ٹی آئی رہنما نے پریس کانفرنس کرتے ہوئے کہا کہ جے آئی ٹی رپورٹ میں جو انکشاف ہوئے سامنے رکھیں گے، 3 تاریخ کو وزیر آباد میں عمران خان پر حملہ ہوتا ہے، ابتدائی پولیس تفتیش میں ثابت ہوا حملہ آور 3 تھے، جائے وقوعہ سے 14 خول برآمد ہوئے، ایک حملہ آور گرفتار ہے 2 کی تلاش جاری ہے، 9 خول سامنےموجود بلڈنگ سے ملے ہیں۔
فواد چودھری نے کہا کہ واقعہ کی تحقیقات پر بہت سے سوالات موجود ہیں، عمران خان کے گارڈز کی طرف سے کوئی فائر نہیں ہوا، عمران خان کے تمام گارڈز کے اسلحہ کی فرانزک کرائی گئی، ملنے والے 14 خول 3 مختلف اسلحہ کے ہیں۔
انہوں نے کہا کہ عمران خان پر حملے کے بعد ہسپتال پہنچنے سے پہلے ایک اعترافی ویڈیو ریلیز کی جاتی ہے، وقار ستی، مرتضیٰ سولنگی اور حامد میر بھی یہ ویڈیو ٹویٹ کرتے ہیں، ڈی پی او گجرات نے کیمرہ ایس ایچ او کو دیا اور کہا حملہ آور کی ویڈیو بنائیں، ڈی پی او کو تفتیش کیلئے بلایا گیا لیکن وہ شامل تفتیش نہیں ہوئے، آخر ڈی پی او کو شامل تفتیش ہونے سے کون روک رہا تھا، سابق آئی جی فیصل شاہکار سے رابطہ کیا تو ڈی پی او کا فون حوالے کرنے سے انکار کر دیا۔
انہوں نے کہا کہ معظم کو جو گولی لگی یہ بات یقینی ہے کہ گولی اس شوٹر نے ماری، ملزم نوید کو قتل کرنے کیلئے شوٹر کو بھیجا گیا تھا، ملزم نوید کو قتل کرنےکیلئے جو شوٹر تھا اس کی گولی سے معظم شہید ہوا۔
سابق وفاقی وزیر کا کہنا تھا کہ سی ٹی ڈی کو کون روک رہا تھا کہ ریکارڈ اور دستاویز پیش نہ کرے، جس دفترمیں ویڈیو بنائی گئی اس میں رنگ و روغن کر دیا گیا، ملزم نوید جو آئی پیز استعمال کر رہا تھا وفاقی ایجنسی نے ڈیٹا دینے سے انکار کر دیا۔
انہوں نے کہا کہ معاملے کو مذہبی رنگ دینے کیلئے ملزم نوید کو بھی قتل کرنے کا پروگرام تھا، 16 نومبر کو اس واقعے پر جے آئی ٹی بنی تھی، عمران خان پر حملے کے وقت 3 اطراف سے فائر کیے گئے۔
فواد چودھری کا مزید کہنا تھا کہ جاوید لطیف نےعمران خان پرتوہین مذہب کا الزام پریس کانفرنس میں لگایا، مریم اورنگزیب، راناثنا اللہ بھی وہی گفتگو کرتے ہیں، لیگی رہنماؤں نے جو کہا وہی گفتگو خواجہ آصف بھی دہراتے ہیں۔

لاہور: (ویب ڈیسک) وفاقی وزیر ریلوے اور مسلم لیگ ن کے سینئر رہنما خواجہ سعد رفیق نے کہا ہے کہ کسی ایئرپورٹ کی کوئی نجکاری نہیں ہو رہی، جھوٹ بولنے والوں کی بس نہیں ہوئی سننے والوں کی بس ہو گئی۔
لاہور میں میڈیا سے گفتگو کرتے ہوئے وفاقی وزیر نے کہا کہ 3 ایئر پورٹس کے آپریشنل آؤٹ سورس کرنا ہیں جس سے فوری سرمایہ کاری ہو گی اور ہماری سروسز انٹرنیشنل معیار کی ہو جائیں گی، پاکستانیوں کو بھی بہترین سروس ملے گی جو ان کا حق ہے۔
انہوں نے کہا کہ ریاست پیسے لگاتی ہے تو ایئرپورٹ بنتا ہے، چاروں صوبوں میں حکومتیں عمران خان کی ہیں مگر ملک کو عذاب میں ڈالا ہوا ہے، کام کریں اور کام کرنے دیں، ان کو سب کچھ دے دو پھر بھی اس کو سکون نہیں ملے گا، وقت پر الیکشن ہونے دیں۔

لاہور: (ویب ڈیسک) پاکستان تحریک انصاف کے چیئرمین عمران خان نے پارٹی کے لاہور کے عہدیداروں کی کارکردگی سے مایوسی کا اظہار کیا اور قیادت کی سرزنش کی۔
لاہور زمان پارک میں عمران خان کی زیر صدارت پارٹی اجلاس ہوا جس میں تنظیمی امور پر غور کیا گیا۔
ذرائع کے مطابق عمران خان نے پی ٹی آئی لاہور کے عہدیداروں کی کارکردگی سے مایوسی کا اظہار کیا اور قیادت کی سرزنش کی۔
ذرائع نے بتایا کہ لبرٹی جلسے میں کارکنوں اورعوام کو متحرک نہ کرنا ناراضی کا باعث بنا۔
اجلاس میں انصاف اسٹوڈنٹ فیڈریشن (آئی ایس ایف) کو آزادانہ کام کرنے سے روکنے کے الزامات پر عمران خان نے کہا کہ آئندہ آئی ایس ایف اپنےمعاملات پرتنظیمی قیادت کو جوابدہ ہوگی۔
انہوں نے کہاکہ الیکشن کراؤ ملک بچاؤ مہم کو تیز کیا جائےگا، عوام تک امپورٹڈ حکومت کی کارکردگی اور رجیم چینج کی حقیقت پہنچائی جائے۔