اسلام آباد: اے این پی انٹرا پارٹی انتخابات کے کیس پر الیکشن کمیشن نے فیصلہ محفوظ کرلیا۔

عوامی نیشنل پارٹی کے انٹرا پارٹی انتخابات سے متعلق کیس کی سماعت چیف الیکشن کمشنر کی سربراہی میں الیکشن کمیشن کے 5 رکنی کمیشن نے کی۔ اس موقع پر اے این پی کے صدر اسفندیار ولی موجود تھے جب کہ ڈی جی پولیٹیکل فنانس ونگ مسعود شیرانی نے کمیشن کو اے این پی انٹرا پارٹی انتخابات سے متعلق بریفنگ دی۔

وکیل نے بتایا کہ ہمیں کہا گیا 6 ماہ دیتے ہیں، اگر 6 ماہ میں مکمل نہیں ہوسکا تو دوبارہ انتخابات کرائے جائیں۔ چیف الیکشن کمشنر نے کہا کہ انٹرا پارٹی انتخابات کیوں نہیں کرائے، ایسی صورتحال میں آپ کو انتخابی نشان الاٹ نہیں کیا جائے گا، آپ الیکشن میں حصہ نہیں لے سکیں گے۔
الیکشن کمیشن حکام نے کہا کہ عوامی نیشنل پارٹی نے انٹرا پارٹی انتخابات کے لیے التوا مانگا ہے۔ یکم مئی 2024 کو پانچ سال پورے ہوجائیں گے۔ وکیل اے این پی نے کہا کہ آئین کہتا ہے کہ 4 سال کے لیے عہدے ہوں گے لیکن انتخابات کی صورت میں کابینہ کام کرتی رہے گی ۔ 6 مہینوں میں تو یہ کنفیوژن رہی کہ انتخابات ہورہے ہیں یا نہیں۔

چیف الیکشن کمشنر نے کہا کہ جس طرح آپ بات کررہے ہیں اس کا مطلب الیکشن کی ضرورت ہی نہیں ہے۔یہ کیا بات ہے کہ عام انتخابات ہوں گے یا نہیں اس سے آپ کی پارٹی انتخابات کا کیا تعلق ہے؟ 5 سال بعد تو کمیشن کی اتھارٹی ہی نہیں ہے۔

اسفند یار ولی نے کہا کہ اس موقع پر یہی درخواست کی جاتی ہے کہ 6 ماہ کا وقت دے دیا جائے۔ چیف الیکشن کمشنر نے کہا کہ آپ کے دلائل سن لیے ہیں، یہ نہ سمجھیں کہ ایکسٹینڈ کردیا ہے۔ بعد ازاں الیکشن کمیشن نے اے این پی انٹرا پارٹی انتخابات پر فیصلہ محفوظ کر لیا۔

عام انتخابات 2024 کے لیے الیکشن پروگرام کا دوسرا مرحلہ شروع ہوچکا ہے جس کے تحت کاغذات نامزدگی وصول کرنے اور جمع کرانے کا سلسلہ جاری ہے۔

اسلام آباد کی تین نشستوں پر مجموعی طور پر 345 نامزدگی فارم جاری ہو چکے ہیں، راولپنڈی کے سات حلقوں کے لیے 415 سے زائد فارم کا اجراء کیا گیا ہے۔

جمعرات کو جمیعت علمائے اسلام (ف) کے سربراہ مولانا فضل الرحمان اور پاکستان پیپلز پارٹی کے ترجمان فیصل کریم کنڈی نے این اے 44 کیلئے کاغذات نامزدگی حاصل کئے۔

ن لیگی رہنما کیپٹن (ر) صفدر کا کہنا ہے کہ میاں نواز شریف کے کاغذات نامزدگی آج جمع کئے جانے کا امکان ہے۔

کیپٹن صفدر نے کہا کہ اگلے وزیر اعظم نواز شریف ہوں گے اور مانسہرہ سے ہوں گے، نوازشریف مانسہرہ کے حلقہ این اے 15 سے الیکشن لڑیں گے۔

دیر بالا کی خاتون رہنما حمیدہ شاہد نے بھی پی کے 11 کے لیے کاغذات نامزدگی حاصل کیے۔ حمیدہ شاہد دیربالا کی پہلی خاتون ہیں جو دوسری مرتبہ جنرل الیکشن میں حصہ لے رہی ہیں،ی حمیدہ شاہد 2018 میں پی ٹی ائی کی امیدوار تھیں۔

حمیدہ شاہ نے کہا کہ پارٹی قائدین نے اعتماد کیا اور ٹکٹ دیا تو بھر پور کوشش کروں گی۔

صوبائی اسمبلی کی جنرل نشت پر پیپلز پارٹی کی دینا ناز نے بھی کاغذات نامزدگی جمع کرادیے۔ پی ٹی آئی کی شبینہ گل نے بھی کاغذات نامزدگی جمع کرادیے۔

اب تک 219 ریزرو سیٹوں پر خواتین کے کاغذات جاری کیے گئے ہیں، اقلیتی سیٹوں کے لیے 93 کاغذات نامزدگی جاری کیے گئے۔

ڈسٹرکٹ ریٹرننگ افسران (ڈی آر اوز) 20 دسمبر سے اپنی ذمہ داریاں سنبھال چکے ہیں.گزشتہ روز متعدد سیاسی رہنماؤں نے کاغذات نامزدگی وصول کیے اور جمع کرائے۔

امیدوار 22 دسمبر تک کاغذات نامزدگی جمع کروا سکتے ہیں۔

الیکشن کمیشن کے مطابق امیدواروں کی ابتدائی فہرست 23 دسمبر کو جاری ہوگی، کاغذات نامزدگی کی سکروٹنی 24 سے 30 دسمبر تک ہوگی، جبکہ 13 جنوری کو امیدواروں کو انتخابی نشانات الاٹ کیے جائیں گے۔

عام انتخابات کے لیے پولنگ 8 فروری کو ہوگی۔

سندھ ہائیکورٹ نے سوئی سدرن گیس کمپنی (ایس ایس جی سی) کی جانب سے جاری کیا گیا قیمتوں میں اضافے کا نوٹی فکیشن معطل کردیا۔

جمعرات کو سندھ ہائیکورٹ میں ٹیکسٹائل صنعت کیلئے گیس کی قیمتوں میں اضافے کے خلاف درخواست پر سماعت ہوئی۔

عدالت نے ایس ایس جی سی کی جانب سے جاری گیس کی قیمتوں میں اضافے کا نوٹی فکیشن معطل کرتے ہوئے کہا کہ معطلی کا اطلاق صرف درخواست گزاروں پر ہوگا۔

عدالت نے ایس ایس جی سی اور وفاقی حکومت کو نوٹسز جاری کر دیے۔

عدالت نے ہدایت کی کہ ٹیکسٹائل صنعتیں اضافی بل ناظر سندھ ہائیکورٹ کے پاس جمع کرائیں۔ حکم امتناع ان کیلئے ہے جو 7 روز میں بلز ناظر کے پاس جمع کرائیں گے۔

عدالت نے کہا کہ بلز ناظر کے پاس جمع نہیں کرائے تو حکم امتناع ختم ہوجائے گا۔

عدالت نے کہا کہ جب تک فیصلہ نہیں ہوتا رقم سندھ ہائیکورٹ کے پاس جمع رہے گی۔

عدالت نے درخواست گزاروں کو ہدایت کی کہ اضافے سے پہلے والے ٹیرف کے مطابق بل ادا کرتے رہیں۔