نگراں وزیراعظم انوارالحق کاکڑ نے کہا ہے کہ کالعدم بی این اے کمانڈر سرفراز بنگلزئی کا ساتھیوں سمیت ہتھیار ڈالنا خوش آئند ہے، یہ خبر پاکستان اور بلوچستان دونوں کے لیے انہتائی مثبت ہے، ماضی میں گلزارامام شنبے کو بھی مرکزی دھارے میں لایا گیا، قومی ادارے عسکریت پسندی کے خاتمے کے لیے مربوط اقدامات کررہے ہیں۔

سماجی رابطے کی ویب سائٹ ایکس ( ٹوئٹر ) پر اپنے پیغام میں نگراں وزیراعظم انوار الحق کاکڑ نے کہا کہ امن واستحکام ہماری اولین ترجیح ہے، سرفراز بنگلزئی عرف مرید بلوچ ( بلوچ نیشنلسٹ آرمی کے سربراہ ) کا اپنے ساتھیوں اور خاندان کے افراد کے ہمراہ ہتھیار ڈالنا خوش آئند ہے، یہ خبر پاکستان اور بلوچستان دونوں کے لیے انہتائی مثبت ہے۔

نگراں وزیراعظم نے مزید کہا کہ ماضی قریب میں کالعدم بی این اے کے سابق کمانڈر گلزار امام شنبے کو گرفتار کرکے مرکزی دھارے میں شامل کیا گیا تھا۔

انوار الحق کاکڑ نے کہا کہ شمولیت کے ذریعے امن کا حصول ایک ایسی حکمت عملی ہے جس سے ہماری ریاست اور ادارے بہترین انداز سے کام لے رہے ہیں اور تنہا ہوجانے و الے جنگجوؤں کو پھر سے عام آدمی کی طرح معاشرے کا حصہ بنانے کے لیے فعال طریقے سے کام کررہے ہیں۔

انہوں نے کہا کہ یہ اسٹریٹجک اقدام دیرپا امن، باہمی افہام و تفہیم، اور معاشروں کی تعمیر نو کی بنیاد بن رہا ہے۔

نگراں وزیراعظم نے اپنے پیغام میں مزید کہا کہ ہم سب مل جل کر اپنی آنے والی نسلوں کے لیے پرامن اور محفوظ مستقبل کی بنیاد رکھ رہے ہیں۔

انوار الحق کاکڑ کا یہ بھی کہنا تھا کہ میں قانون نافذ کرنےو الے اداروں اور خفیہ ایجنسیوں ، بالخصوص آئی ایس آئی کی کوششوں کو سراہتا ہوں جس نے اس پیچیدہ آپریشن کی منصوبہ بندی کی اور اسے ممکن بنایا۔

قانون ہاتھ میں لینے والوں کو نتائج کا سامنا کرنا پڑے گا، نگراں وزیراعظم

نگراں وزیراعظم انوار الحق کاکڑ کا کہنا ہے کہ ریاست کا نظام آئین و قانون کے مطابق چلتا ہے، قانون ہاتھ میں لینے والوں کو نتائج کا سامنا کرنا پڑے گا۔

غلام اسحاق خان انسٹی ٹیوٹ آف انجینئرنگ اینڈ ٹیکنالوجی کے طلباء و طالبات سے گفتگو کرتے ہوئے نگراں وزیراعظم انوار الحق کاکڑ نے کہا کہ کوئی گروہ کسی کو جیل میں نہیں ڈال سکتا، ریاست کا نظام آئین و قانون کے مطابق چلتا ہے، ہمیں قانون کو ہاتھ میں نہیں لینا چاہیئے، ریاست قانون ہاتھ میں لینے والوں کے خلاف آئین کے مطابق اقدام کرتی ہے۔

نگراں وزیراعظم نے کہا کہ ریاستی اقدامات کیوں اٹھائے گئے یہ سوال غلط ہے، قانون ہاتھ میں لینے والوں کو نتائج کا سامنا کرنا پڑے گا، ریاستی اداروں پر حملہ ہر ملک میں جرم ہے، کچھ لوگ سیاسی احتجاج چاہتے ہیں، سیاسی رویوں پر بات نہیں کرنا چاہتے، معاشرے کے مختلف طبقوں میں تصادم غلط ہے۔

انوار الحق کاکڑ نے مزید کہا کہ معیاری مذاکرے مثبت سوچ اور رحجان کو پروان چڑھاتے ہیں، جمہوریت مختلف مدارج طے کرتے ہوئے آگے بڑھ رہی ہے، جمہوریت اور حکومت کا جائزہ کارکردگی کی بنیاد پر ہونا چاہیئے، دنیا میں پارلیمانی نظام نے بتدریج طاقت حاصل کی۔

لاہور میں سابق چیف جسٹس ثاقب نثار کے گھر میں پراسرار دھماکا ہوا ہے، دھماکے میں 2 افراد زخمی ہوگئے۔

ذرائع کے مطابق سابق چیف جسٹس ثاقب نثار کے گھر میں پراسرار دھماکے کی اطلاع ملی ہے، دھماکا گھر کے گیراج میں ہوا، جس کے نتیجے میں 2 افراد زخمی ہوئے۔

ثاقب نثار فیملی ذرائع نے بتایا کہ دھماکے کے وقت ثاقب نثار گھر پر موجود تھے۔

واقعے کے بعد پولیس کی بھاری نفری موقع پر پہنچ گئی ہے اور تحقیقات کی جارہی ہیں کہ دھماکا کس نوعیت کا تھا۔

میرے گھر پر گرنیڈ سے حملہ کیا گیا،سابق چیف جسٹس

بعدازاں آج نیوز سے فون پر گفتگو کرتے ہوئے سابق چیف جسٹس ثاقب نثار نے کہا کہ ان کے گھر پر گرنیڈ سے حملہ کیا گیا، دھماکے کے وقت میں وہ گھر پر ہی موجود تھے۔

ثاقب نثار نے کہا کہ زور دار دھماکے کی آواز سن کے باہر آیا، گرنیڈ سے میرے گھر کو نشانہ بنایا گیا، واقعے میں 2 پولیس اہلکار زخمی ہوئے، لاہور پولیس موقع پر پہنچ گئی ہے اور تحقیقات جاری ہیں۔

انہوں نے مزید کہا کہ میرے گھر پر سی سی ٹی وی نہیں لگا، میں جب چیف جسٹس تھا اس وقت بھی سی سی ٹی وی نہیں لگائے تھے۔

واضح رہے میاں ثاقب نثار 31 دسمبر 2016 سے 17 جنوری 2019 تک چیف جسٹس آف پاکستان کے عہدے پر فائز رہے۔

اس سے قبل آج کے روز ہی راولپنڈی میں اسلام آباد کی احتساب عدالت کے جج محمد بشیر پر فائرنگ کی اطلاعات سامنے آئی تھیں تاہم بعد میں راولپنڈی پولیس نے تردید کرتے ہوئے کہاکہ نشے میں دھت ایک لڑکے نے ہوائی فائرنگ کی تھی اس کا کسی شخصیت سے تعلق نہیں۔