اسلام آباد: ملک میں 8 فروری کو ہونے والے عام انتخابات 2024 کے سلسلے میں الیکشن کمیشن نے کاغذات نامزدگی کے لیے ہدایات جاری کر دیں۔

الیکشن کمیشن کے مراسلے کے مطابق ایک امیدوار مختلف تجویز کنندگان کے ساتھ زیادہ سے زیادہ پانچ کاغذات نامزدگی جمع کروا سکتا ہے، کاغذات نامزدگی جمع کروانے کے لیے قومی اسمبلی کی فیس 30 ہزار جبکہ صوبائی اسمبلی کی 20 ہزار روپے ہے۔

امیدوار کے لیے پاکستان کا شہری ہونا ضروری ہے جبکہ امیدوار کی عمر کاغذات نامزدگی جمع کرواتے وقت 25 سال سے کم نہ ہو۔

کاغذات نامزدگی کے ساتھ امیدوار اس کے تجویز کنندہ و تائید کنندہ کے شناختی کارڈ کی مصدقہ نقول منسلک کرنا ہوں گی۔ امیدوار گزشتہ تین سالوں کا انکم ٹیکس ریٹرن کاغذات نامزدگی کے ساتھ منسلک کرے گا۔

قومی اسمبلی کی نشست کے لیے امیدوار پاکستان میں کسی بھی جگہ کا ووٹر ہو لیکن صوبائی اسمبلی کی نشست کے لیے امیدوار متعلقہ صوبے کا ہو۔ قومی اسمبلی کے لیے خواتین کی مخصوص نشستوں کے لیے امیدوار کا متعلقہ صوبے کا ووٹر ہونا لازمی ہے۔

واضح رہے کہ کاغذات نامزدگی متعلقہ ریٹرننگ افسر کے دفتر میں 20 سے 23 دسمبر تک جمع کروائے جاسکتے ہیں۔

چین نے مبینہ طور پر کسی بھی شعبے میں طویل مدتی معاہدوں کے لیے نگراں حکومت کے ساتھ بات کرنے سے انکار کردیا ہے، چین کو کاروباری تعلقات مزید مستحکم کرنے کے لیے منتخب پاکستانی حکومت کا انتظار ہے۔

نگراں وزیر تجارت گوہر اعجاز کے حالیہ دورہ چین کے دوران ان کے ساتھ جانے والے کچھ تاجروں نے بزنس ریکارڈر کو بتایا کہ چینی کاروباری تعلقات کو مضبوط کرنے کی نئی کوششوں کے لیے منتخب حکومت کے منتظر ہیں۔

پاکستان چین کے ساتھ موجودہ آزاد تجارتی معاہدے (ایف ٹی اے) کی توسیع کا خواہاں ہے، جو بڑے پیمانے پر بیجنگ کے حق میں ہے۔

وفد میں زرعی، الیکٹرک گاڑیاں، ماربل، سیمنٹ، کھاد، پھل اور سبزی، گھریلو سامان، شیشہ، کیمیکل اور ٹیکسٹائل انڈسٹری سے وابستہ تاجر شامل ہیں۔

دورہ چین کے دوران نگراں وزیر تجارت نے چینی حکام اور نجی شعبے سے ملاقاتیں کیں۔

تاہم، انہوں نے چینی ہم منصب سے تجارتی توسیع کے حوالے سے کسی مخصوص ایجنڈے کے ساتھ ملاقات نہیں کی۔

نگراں وزیر تجارت کے مطابق چین کی پاکستان کو سالانہ 20 ارب ڈالر کی برآمدات ہیں، جبکہ چین کو پاکستان کی برآمدات محض 2 ارب ڈالر ہیں۔

پاکستانی وفد کے درمیان اپنے چینی ہم منصبوں کے ساتھ انفرادی ملاقاتوں کے دوران، نگراں وزیر نے اصرار کیا کہ جو بھی معاہدات طے پاتے ہیں ان کا احترام کیا جانا چاہیے۔

پاکستانی تاجر جنہوں نے اپنے چینی ہم منصبوں کے ساتھ ملاقاتیں کیں انہیں کاروباری تعلقات بڑھانے کے حوالے سے حوصلہ افزا ردعمل ملا، لیکن پاکستانی تاجر چینی کمپنیوں کے ساتھ اپنے سودوں کا انکشاف نہیں کر رہے۔

ایک مثال دیتے ہوئے کاروباری شخصیت نے بتایا کہ وفد میں شامل ایک شخص نے کہا کہ وہ پاکستان جا رہا ہے لیکن بعد میں معلوم ہوا کہ وہ ڈیل کے لیے اپنے ہم منصب سے ملنے کسی اور صوبے میں گیا تھا۔ توقع ہے کہ وہ بہت جلد اپنی مصنوعات کی برآمد شروع کر دے گا۔

تاجروں سے جمع کی گئی معلومات سے یہ بھی پتہ چلتا ہے کہ چینی حکام چین کے ساتھ تجارتی توازن کے حوالے سے نگراں وزیر تجارت و صنعت کے بیان سے خوش نہیں تھے۔

ایک کاروباری شخص نے کہا، ’تجارت میں عدم توازن کے حوالے سے نگراں وزیر تجارت کے بیان پر چینی سخت ناراض ہیں۔‘

ذرائع نے بتایا کہ وفد کو یہ جان کر حیرت ہوئی کہ بیجنگ میں رات کے آخری اوقات میں لائٹس بند کر دی گئیں کیونکہ چینی حکومت بجلی کی بچت کر رہی تھی۔

انہوں نے کہا کہ ہم نے بیجنگ میں جو کچھ دیکھا وہ پاکستان کے بالکل برعکس تھا جہاں تاجر رات 8 یا 9 بجے کے بعد اپنی دکانیں بند کرنے کو تیار نہیں ہوتے۔

ایک سرکاری بیان کے مطابق، وفد نے چین پاکستان ٹیکسٹائل سمٹ میں بھی شرکت کی، یہ ایک اہم تقریب ہے جس نے دونوں ممالک کے صنعتی رہنماؤں کو ایک جگہ اکٹھا کیا۔ بصیرت انگیز بات چیت میں مشغول، مندوبین کا مقصد دوطرفہ تجارتی تعلقات کو مضبوط بنانا اور تعاون میں اضافے کی راہیں تلاش کرنا تھا۔

اس دورے کے دوران ایک اہم سنگ میل چائنہ چیمبرز آف کامرس اور آل پاکستان ٹیکسٹائل ملز ایسوسی ایشن (APTMA) کے درمیان مفاہمت کی یادداشت پر دستخط تھے۔

یہ معاہدہ ٹیکسٹائل کے شعبے میں تعاون کو بڑھانے اور باہمی مفادات کو فروغ دینے کے عزم کی نشاندہی کرتا ہے۔

پاکستانی وفد نے اپنے چینی ہم منصبوں کے ساتھ بزنس ٹوبزنس میٹنگز میں حصہ لینے کے موقع سے فائدہ اٹھایا۔

بیان میں مزید کہا گیا کہ دونوں ممالک کے درمیان اقتصادی تعلقات کو مضبوط بنانے کے حتمی مقصد کے ساتھ ٹیکسٹائل کی درآمدات اور برآمدات کو بڑھانے پر توجہ مرکوز کی گئی۔

آرمی چیف جنرل سید عاصم منیر سے امریکی کمانڈرسینٹل کمانڈ کی ملاقات ہوئی ہے۔

پاک فوج کے شعبہ تعلقات عامہ (آئی ایس پی آر) کے مطابق جنرل عاصم اور امریکی کمانڈر سینٹ کام جنرل مائیکل ایرک کے درمیان ملاقات میں باہمی، پیشہ ورانہ دلچسپی کے امور پر تبادلہ خیال کیا گیا۔

آئی ایس پی آر کے مطابق ملاقات میں علاقائی سکیورٹی، فوجی تربیتی اموربھی زیرغورآئے جب کہ دونوں جانب سے تربیتی رابطوں کوفروغ دینے پر اتفاق کیا گیا۔

انٹر سروسز پبلک ریلیشنز کے مطابق آرمی چیف جنرل عاصم منیر نے امریکی سینٹ کام جوائنٹ آپریشنز کا بھی دورہ کیا۔

آرمی چیف نے کمانڈر یوایس سینٹرل کمانڈ جنرل مائیکل ایرک سے بھی ملاقات کی۔

پاک فوج کے شعبۂ تعلقاتِ عامہ کی جانب سے اعلامیہ کے مطابق آرمی چیف کی کمانڈر یو ایس سینٹرل کمانڈ جنرل مائیکل ایرک سے ملاقات میں باہمی دلچسپی کے امور پرتبادلۂ خیال کیا گیا۔

ملاقات میں خطے کی سیکیورٹی کی صورتِ حال سےمتعلق باہمی تعاون پربھی گفتو کی گئی۔

دورہ امریکا کے دوران آرمی چیف نے سینٹ کام جوائنٹ آپریشن سینٹرکا بھی دورہ کیا، اس موقع پر سینٹ کام اور پاک فوج کے مابین دفاعی تربیت اوررابطے بڑھانے سے متعلق جائزہ لیا گیا۔

پاکستان مسلم لیگ (ن) کے سابق رہنما شاہد خاقان عباسی کا کہنا ہے کہ وہ الیکشن نہیں لڑیں گے۔

اسلام آباد کی احتساب عدالت میں شاہد خاقان عباسی کے خلاف دائر ایل این جی ریفرنس کی سماعت ہوئی، احتساب عدالت کے جج محمد بشیر نے کیس کی سماعت کی۔

شاہد خاقان عباسی کے وکیل یاسر اعوان عدالت کے روبرو پیش ہوئے اور بتایا کہ سپریم کورٹ میں انٹرا کورٹ اپیل لگی ہوئی، اس کے فیصلے تک سماعت ملتوی کی جائے۔

جس پر عدالت نے کیس کی سماعت 13 فروری 2024 تک ملتوی کردی۔

جوڈیشل کمپلیکس کے باہر میڈیا سے گفتگو کرتے ہوئے شاہد خاقان عباسی نے کہا کہ میں الیکشن نہیں لڑوں گا۔

انہوں نے کہا کہ آج اس کیس کو چار سال ہوگئے ہیں، پانچواں سال شروع ہوگیا۔ایک کیس پہلے بنا تھا وہ بھی ختم ہوگیا یہ بھی ختم ہوجائے گا۔

انہوں نے کہا کہ 14سال میں ایک گواہ آیا ہے، اس نظام کے ساتھ آپ کا ملک نہیں چلےگا۔

انہوں نے مزید کہا کہ سپریم کورٹ کے سابقہ جج جاوید اقبال کو پتا نہیں تھا یہ کیس فضول تھا، جب بری ہوجائیں گے تو کہا جائے گا انصاف ہوگیا، اس ناانصافی کا حساب کون دے گا۔