لاہور ڈیولپمنٹ اتھارٹی (ایل ڈی اے) غیرقانونی کمرشل عمارتوں کے خلاف کارروائی کرتے ہوئے 142ملاک کو سربمہرکر دیا۔

ترجمان ایل ڈی اے کے مطابق محکمے کے ڈی جی طاہر فاروق کی ہدایات پر ایل ڈی اے ٹیموں کی مختلف علاقوں میں کارروائیاں کیں اور 142املاک سربمہر مسمار کر دیں۔

بیان میں کہا گیا کہ ایل ڈی اے ٹیموں نے گلبرگ،جوہر ٹاؤن، علامہ اقبال ٹاؤن،شادمان، گلشن راوی، یو بی ڈی کینال روڈکے اطراف میں کارروائیاں کیں، ایل ڈی اے ٹیموں نے گلبرگ میں 18جوہر ٹاؤن میں 57،علامہ اقبال ٹاؤن میں 39املاک سربمہر کر دیں۔

اس کے علاوہ   شادمان،گلشن راوی،مین یو بی ڈی کینال روڈ کے اطراف میں 28املاک سیل کر دیں۔ سیل کی گئی املاک میں نجی سکول،ریستوران، ہوٹل، گیسٹ ہاؤس، سیلون، فوڈ پوائنٹس، دکانیں، دفاتر،سٹور ودیگر شامل ہیں، آپریشن سے پہلے ان املاک کو متعدد نوٹسز دیئے گئے تھے۔

بیان کے مطابق آپریشن چیف ٹاؤن پلانرون اسد الزمان اور چیف ٹاؤن پلانر ٹو اظہر علی کی زیر نگرانی کیا گیا، غیرقانونی کمرشل عمارتوں، کمرشل فیس نادہندگان کے خلاف بلاامتیاز کارروائیاں جاری ہیں۔

وزیراعلیٰ پنجاب مریم نواز نے کہا ہے کہ پنجاب حکومت ترکیہ کے سرمایہ کاروں کو ہرممکن سہولت فراہم کرے گی۔  

وزیراعلیٰ پنجاب مریم نواز شریف سے ترکیہ کے قونصل جنرل درمش بستاغ نے ملاقات کی۔ ملاقات میں پاکستان اور ترکیہ کے درمیان دو طرفہ تعلقات کو مزید مضبوط بنانے پر اتفاق کیا گیا۔ تجارت، تعلیم ، صحت، زراعت اور سیاحت کے شعبوں میں تعاون کو فروغ کے لیے اقدامات پر تبادلہ خیال کیا۔

وزیراعلیٰ مریم نوازنے ترکیہ کو پاکستان کا عظیم دوست اور بھائی قرار دیتے ہوئے کہا کہ ترکیہ کے عوام نے ہمیشہ مشکل وقت میں پاکستان کا ساتھ دیا ہے جس پر شکر گزار ہیں۔ترکیہ بزنس کمیونٹی کے لیے ون ونڈو آپریشن کو مزید فعال بنایا جائے گا۔

قونصل جنرل ترکیہ درمش بستاغ نے وزیراعلیٰ مریم نواز شریف کی قیادت میں جاری عوامی فلاح کے منصوبوں کو سراہا ۔  انہوں نے کہا کہ ترکیہ پاکستان کے ساتھ تعلقات کو انتہائی اہمیت دیتا ہے۔ پنجاب کے ساتھ مختلف شعبوں میں تعاون کو مزید وسعت دینے کے لیے تیار ہیں۔

لیویز فورس چاغی نے 72 غیر قانونی افغان شہری گرفتار کرلیے۔

ایکسپریس نیوز کے مطابق سیکیورٹی اداروں نے سرحد کو غیرقانونی طریقے سے پار کرکے چاغی آنے والے 72 افغان باشندوں کو گرفتار کرلیا۔

لیویز کے مطابق یہ کارروائی پاکستان میں غیر قانونی داخلے کو روکنے کے عزم کا مظہر ہے، تمام گرفتار شدہ افراد کو بارڈر کراسنگ براپچہ کے ذریعے افغانستان واپس بھیج دیا گیا۔

لیویز کے مطابق ضلع میں امن قائم رکھنے اور غیر قانونی سرگرمیوں کی روک تھام کے لیے اقدامات جاری رہیں گے، یکم جنوری سے 31 دسمبر تک 3826 غیرقانونی باشندے گرفتار کیے گئے۔

پاک فوج نے قوم کو نئے سال کی مبارک باد دیتے ہوئے نیک تمناؤں کا اظہار کیا ہے۔

برف پوش سیاچن گلیشیئرز پر تعینات پاک فوج کے جوانوں نے قوم کو نئے سال کی مبارک باد دیتے ہوئے کہا کہ ہم بارڈر پر اس لیے بیٹھے ہیں کہ ہمارے وطن کا جھنڈا بلند رہے، پاک فوج ہر محاذ پر پاکستان کی سالمیت اور بقاء کے لیے تیار ہے، ہم سیاچن گلیشیر پر پاکستان کا جھنڈا لیکر ملکی حفاظت پر مامور ہیں۔

فوجی جوان نے اپنے ویڈیو پیغام میں کہا کہ ہم ہمیشہ مادر وطن کی خدمت کے جذبے سے سرشار رہتے ہیں، پاک فوج ملکی سلامتی اور ترقی کے لئے ہمہ وقت کوشاں ہے، برف پوش علاقوں میں تعینات پاک فوج کے جوان ملک و قوم کی حفاظت کیلئے پر عزم ہیں۔

فوجی جوان کا کہنا تھا کہ ہڈیوں کو برفا دینے والی سردی میں بھی ہمارا جذبہ بلند ہے، ہماری دعا ہے کہ نیا سال اس ملک کے لیے خوشیاں اور کامیابیاں لے کر آئے۔

فوجی جوان نے کہا کہ ہم سرد ہوائوں اور برف پوش پہاڑوں کے سائے تلے پوری اور امید کرتے ہیں آنے والا سال پاکستان کے لیے خوشیوں کی نوید اور اتحاد و اتفاق کا سال ہو۔

بجلی کی فی یونٹ قیمت میں کمی کا امکان ہے، جس سے صارفین کو 4 ارب 89 کروڑ روپے کا ریلیف ملے گا۔

ایکسپریس نیوز کے مطابق نیشنل الیکٹرک پاور ریگولیٹری اتھارٹی (نیپرا) میں این ٹی ڈی سی کی جانب سے بجلی کی فی یونٹ قیمت میں 63 پیسے کمی کی درخواست پر سماعت چیئرمین وسیم مختار کی سربراہی میں ہوئی، جس میں حکام نے بتایا کہ گزشتہ ماہ نومبر کا فیول پرائس منفی 63 پیسے میں ہے۔

حکام نے نیپرا میں بتایا کہ منفی ایف سی اے سے صارفین کو 4 ارب 89 کروڑ کا ریلیف مل سکتا ہے۔ پرانی ایڈجسٹمنٹس کی مد میں ڈھائی روپے منفی ہیں۔ گزشتہ ماہ کے دوران مقامی کوئلے سے پیداوار اضافی رہی اور نومبر میں 7 ارب 22 کروڑ بجلی کے یونٹ پیدا کیے گئے۔نومبر میں پیداواری لاگت ریفرنس لاگت کے نزدیک آئی۔

این ٹی ڈی سی حکام نے کہا کہ گزشتہ سال نومبر کے مقابلے میں رواں سال نومبر میں بجلی فروخت میں کمی ہوئی۔ رواں سال کے ماہ نومبر گزشتہ اسی عرصے کے مقابلے میں گرم ترین ماہ تھا۔بجلی کی فروخت میں کمی کی بڑی وجہ سولرائزیشن ہے۔

چیئرمین نیپرا نے کہا کہ این ٹی ڈی سی لاہور نارتھ لائن کی تکمیل کے بارے میں آگاہ کرے، جس پر حکام نے کہا کہ ٹرانسمیشن لائن کی تکمیل اب تک نہیں ہو سکی۔ چیئرمین نیپرا نے استفسار کیا کہ ماہ دسمبر میں اس ٹرانسمیشن لائن کی تکمیل ہونا تھی، جس پر حکام نے بتایا کہ اپریل تک لاہور نارتھ ٹرانسمیشن لائن مکمل ہوگی۔

بعد ازاں نیپرا نے لاہور نارتھ ٹرانسمیشن لائن میں تاخیر کے بارے میں رپورٹ طلب کرلی۔

بجلی کی قیمتوں میں 63 پیسے کمی سے متعلق درخواست پر سماعت مکمل کرلی گئی۔ نیپرا اتھارٹی اعدادوشمار کا جائزہ لینے کے بعد ایف سی اے پر فیصلہ جاری کرے گی۔

نیپرا میں سماعت کے دوران این ٹی ڈی سی کے ترسیلی نظام پر لوڈ پیٹرن تبدیل ہونے کا انکشاف بھی ہوا۔ حکام نے بتایا کہ گزشتہ برسوں کے مقابلے میں جو لوڈ پیٹرن تھا وہ اب نہیں رہا۔ لوڈ پیٹرن تبدیل ہونے کی وجوہات کے بارے میں تحقیقات کی جائیں۔

ونٹرپیکیج پر بریفنگ

وزیر خزانہ محمد اورنگزیب سے امریکی سفیر ڈونلڈ بلوم  نے الوداعی ملاقات کی جس میں دو طرفہ اقتصادی تعاون اور تعلقات سمیت باہمی دلچسپی کے امور پر تبادلہ خیال کیا گیا۔

وزارت خزانہ کے جاری کردہ اعلامیہ کے مطابق ملاقات میں وزیر خزانہ نے میکرو اکنامک استحکام کے لیے اصلاحاتی ایجنڈے پر زور دیا اور آئی ایم ایف سے قرض پر سہولت فراہم کرنے پر امریکا کا شکریہ بھی ادا کیا۔

ملاقات کے دوران گفتگو کرتے ہوئے وفاقی وزیر خزانہ محمد اورنگزیب کا کہنا تھا کہ امریکا پاکستان کا سب سے بڑا تجارتی شراکت دار ہے، امریکا پاکستانی مصنوعات اور خدمات کیلئے ایک اہم مارکیٹ ہے، دونوں ممالک قریبی اقتصادی تعلقات سے فائدہ اٹھانے کے لیے تیار ہیں۔

وزیر خزانہ نے خاص طور پر بڑھتے ہوئے آئی ٹی ایکسپورٹ سیکٹر پر روشنی ڈالی اور آئی ٹی و ڈیجیٹل خدمات کے شعبوں میں تجارت بڑھانے کے امکانات کو بھی اجاگر کیا۔

امریکی سفیر ڈونلڈ بلوم نے امریکا اور پاکستان کے درمیان مضبوط اور پائیدار تعلقات کو سراہا اور پاکستان کی اقتصادی اصلاحات و ترقی کی حمایت جاری رکھنے کے امریکی عزم کا اعادہ کیا۔