امریکا نے برطانوی جریدے میں شائع بانی پی ٹی آئی عمران خان کے مضمون میں لگائے گئے الزامات کو ایک بار پھر مسترد کردیا ہے۔

امریکی محکمہ خارجہ کا کہنا ہے کہ امریکا پاکستان کو نہیں کہہ سکتا کہ انتخابات کیسے کروائے، پاکستان کے مستقبل کی قیادت کا فیصلہ پاکستانی عوام نے کرنا ہے۔

پریس بریفنگ کے دوران امریکی محکمہ خارجہ کے ترجمان میتھیو ملر سے سوال کیا گیا کہ ’اپنے تازہ ترین مضمون کی وجہ سے سابق وزیراعظم عمران خان ایک بار پھر الزامات کی زد میں آگئے ہیں۔ مضمون میں نیا الزام یہ ہے کہ امریکا پاکستان میں فوجی اڈے قائم کرنا چاہتا تھا، جسے پاکستان نے مسترد کردیا ہے، یہی وجہ ہے کہ امریکی حکومت ناراض تھی۔ کیا آپ اس کا جواب دینا چاہتے ہیں؟‘

جس پر میتھیو ملر نے جواب دیا کہ ’میں صرف اتنا کہوں گا، جیسا کہ ہم پہلے کہہ چکے ہیں، سابق وزیر اعظم کے الزامات بے بنیاد ہیں، اور مجھے لگتا ہے کہ میں اسے یہیں پر چھوڑ دوں‘۔

میتھیو ملر سے سوال کیا گیا کہ ’حالیہ دورے کے دوران، کیا سیکرٹری بلنکن نے پاکستانی فوج کے سربراہ اور آئی ایس آئی کے سربراہ کے ساتھ سیاست میں فوجی مداخلت کے حوالے سے بات چیت کی؟‘

جس پر انہوں نے جواب دیا کہ ’میں نجی سفارتی بات چیت میں نہیں پڑوں گا، لیکن ہم نے ہمیشہ واضح کیا ہے کہ پاکستانی عوام کو ہی اپنی حکومت کا انتخاب کرنا ہے‘۔

امریکہ کے صدر جوزف بائیڈن نے صدارتی انتخابی مہم کا باضابطہ آغاز کردیا۔

جو بائیڈن نے پنسلوینیا میں انتخابی ریلی سے خطاب کیا۔ اس خطاب کے دوران امریکی صدر نے سابق صدر اور ری پبلکن پارٹی کے ممکنہ صدارتی امیدوار ڈونلڈ ٹرمپ کو امریکہ میں جمہوریت کے لیے خطرہ قرار دیا۔

امریکی صدر کا کہنا تھا کہ ڈونلڈ ٹرمپ کسی بھی صورت خود کو ایک بار پھر اقتدار میں لانے کے لیے جمہوریت کو قربان کرنے پر تُلے ہوئے ہیں۔ ان کا یہ بھی کہنا تھا ڈونلڈ ٹرمپ وہ زبان استعمال کر رہے ہیں جو نازی جرمنی میں استعمال کی گئی تھی۔ جو بائیڈن نے الزام عائد کیا کہ سابق امریکی صدر ان کے حامی صدارتی انتخابی مہم کے دوران سیاسی تشدد کے خواہاں اور اس کے لیے کوشاں ہیں۔

امریکی صدر کے اس خطاب پر ری پبلکنز نے شدید ردعمل ظاہر کیا ہے۔ جوابِ آں غزل کے طور پر ڈونلڈ ٹرمپ کے ترجمان نے کہا کہ امریکی جمہوریت کے لیے اصل خطرہ تو جو بائیڈن ہیں۔ ترجمان کا کہنا تھا کہ اپنے سیاسی حریف کے خلاف ریاستی وسائل بروئے کار لارہے ہیں۔ ترجمان نے صدر جو بائیڈن پر صدارتی انتخابات میں مداخلت کا الزام بھی عائد کیا۔

واضح رہے کہ امریکہ میں رائے عامہ کے تازہ ترین جائزوں میں صدر جو بائیڈن کی پوزیشن خاصی کمزور دکھائی دی ہے۔ امریکی ووٹرز کی اکثریت 81 سالہ جو بائیڈن کو اس منصب کے لیے موزوں ترین ڈیموکریٹ امیدوار قرار نہیں دے رہے۔ ان کا کہنا ہے کہ عمر کی اس منزل میں جو بائیڈن ان تمام ذمہ داریوں سے بخوبی عہدہ برآ نہیں ہوسکتے جو بحیثیت صدر ان پر عائد ہوتی ہیں۔

یاد رہے کہ جو بائیڈن پر عمر پریشان کن حد تک اثر انداز ہو رہی ہے۔ وہ کئی مواقع پر لڑکھڑا کر گر بھی چکے ہیں۔ عمر کی بنیاد پر سوشل میڈیا میں صدر بائیڈن کا تمسخر بھی اڑایا جارہا ہے۔ مین اسٹریم میڈیا کے ایک مضمون میں سوال اٹھایا گیا ہے کہ 1942 میں تیار ہونے والی گاڑی 2024 میں کیسے چلائی جاسکتی ہے!