پاکستان پیپلز پارٹی کے چیئرمین بلاول بھٹو زرداری نے کراچی پریس کلب کے نومنتخب عہدیداروں  کو ان کی کامیابی پر مبارکباد دی ہے۔

میڈیا سیل بلاول ہاؤس سے جاری بیان کے مطابق پی پی پی چیئرمین نے اپنے تہنیتی پیغام میں نومنتخب صدر فاضل جمیلی، جنرل سیکریٹری محمد سہیل افضل، جوائنٹ سیکریٹری محمد منصف، خزانچی عمران ایوب سمیت گورننگ باڈی کے تمام  کامیاب ارکان کیلئے اپنی نیک تمناوَں کا اظہار کیا ہے۔

انہوں نے کراچی پریس کلب کے سالانہ انتخابات میں ڈیموکریٹس پینل کی شاندار کامیابی پر پینل کے ذمہ دارن کو بھی مبارکباد  دی۔ بلاول بھٹو زرداری نے کراچی پریس کلب کی شاندار جمہوری روایات  کو سراہتے ہوئے کہا کہ یہ ہم سب کے لیے باعث فخر ہیں۔

بلاول بھٹو نے کہا کہ کراچی پریس کلب ملک میں آزادی اظہار اور خودمختار صحافت کا ایک مضبوط قلعہ رہا ہے۔ انہوں نے اس امید کا اظہار کیا کہ کراچی پریس کلب کی نئی قیادت صحافتی برادری کو درپیش چیلنجز کا جرات اور عزم کے ساتھ سامنا کرتے ہوئے آزادی صحافت کے تحفظ کی میراث کو آگے بڑھائے گی۔

انہوں نے اعادہ کیا کہ پاکستان پیپلز پارٹی غیر متزلزل عزم کے ساتھ صحافی برادری کے جائز حقوق و موقف کی حمایت کرتی رہے گی۔ انہوں نے زور دیا کہ ملک میں آزاد اور ذمہ دار صحافت کا فروغ قومی ترقی اور خوشحالی کے لیے ضروری ہے۔

لاہور میں بجلی چوری پکڑے جانے پر لیسکو ٹیم پر حملہ کرنے والے ملزم کے خلاف مقدمہ درج کرلیا گیا۔

رپورٹ کے مطابق لاہور الیکٹرک سپلائی کمپنی (لیسکو) کی ٹیم چونیاں سٹی سب ڈویژن کے ایس ڈی او امجد اقبال نے اپنی ٹیم کے ہمراہ موضع کھوڑا کھوہ،مشمولہ سدھا اتاڑ کے علاقہ میں سرچ آپریشن کیا۔

دوران آپریشن ملزم عابد ڈائریکٹ سپلائی سے بجلی چوری کرتے پکڑا گیا۔

جب لیسکو ملازمین نے ملزم عابد کا کنکشن منقطع کیا جو کہ ڈائریکٹ لائن سے لیا گیا تھا، تو ملزم عابد نے نا معلوم افراد کے ساتھ مل کر لیسکو ملازمین پر حملہ کردیا اور تشدد کرنے لگا۔

اس دوران ملزم نے ملازمین کو گالیاں دیں اور جان سے مارنے کی دھمکیاں بھی دیں۔

بعد ازاں ایس ڈی او چونیاں سٹی امجد اقبال نے ملزمان کیخلاف متعلقہ تھانہ میں ایف آئی آر رجسٹرڈ کروا دی ہے جب کہ محکمہ کی جانب سے ملزم کو ڈٹیکشن بل بھی چارج کیا جائے گا۔

کرم میں قیام امن کیلئے گرینڈ جرگے میں فریقین کے درمیان سڑکوں اور راستوں کو کھلوانے پر ڈیڈ لاک برقرار ہے۔

کرم میں مستقل امن و امان کے قیام، ضلع بھر سے ہتھیاروں کے خاتمے، فریقین کے مورچوں کو مسمار کرانے اور مرکزی شاہراہ سمیت تمام سڑکوں اور راستوں کو کھلوانے اور محفوظ بنانے کے لئے کوہاٹ میں حکومت کے زیر سایہ گرینڈ جرگہ چند دن وقفے کے بعد پھر شروع ہوگیا۔

 فریقین کے درمیان ایپیکس کمیٹی کے فیصلے کی رو سے 14 میں سے 12 نکات پر فیصلہ ہوچکا ہے، اسلحہ کو حکومت کے پاس جمع کرنے، سڑکوں اور راستوں کو کھلوانے پر ہفتہ کی شام تک ڈیڈ لاک موجود تھا۔

اہل سنت کے 6 قبائل کا موقف ہے کہ اپیکس کمیٹی میں یہ فیصلہ ہوا ہے کہ سب سے پہلے فریقین سے ہتھیار اکٹھے کئے جائیں پھر ضلع کرم بھر میں تمام بنکرز اور مورچے مسمار کئے جائیں اور اس کے بعد تمام راستے کھول دیے جائیں، اپیکس کمیٹی کے فیصلے کے مطابق معاہدے پر دستخط کے لئے تیار ہیں۔

جرگہ ذرائع کا کہنا ہے کہ طوری قبائل کے عمائدین کا کہنا ہے کہ پہلے راستے کھول دیے جائیں۔ اس کے بعد مرحلہ وار مورچوں کی مسماری اور اسلحہ اکٹھا کرنا شروع کیا جائے، اہلسنت کے 6 قبائلی عمائدین طوری قبیلے کی بات سے متفق نہیں۔

طوری قبیلے نے اپنے موقف کے مطابق معاہدے پر دستخط کئے ہیں لیکن اہل سنت کے 6 قبائلی عمائدین اپنے موقف پر ڈٹے ہوئے ہیں اور دستخط سے انکار کردیا ہے۔ گرینڈ جرگہ ڈیڈ لاک کو ختم کرنے کے لئے بھر پور کوشش کر رہا ہے۔

 گزشتہ روز یہ خبر سامنے آئی تھی کہ کوہاٹ فورٹ میں منعقد ہونے والے گرینڈ امن جرگے میں فریقین کے درمیان معاہدے کو تقریباً حتمی شکل دے دی گئی ہے، مجوزہ معاہدے کے مطابق دونوں فریقین بھاری ہتھیار حکومت کو دینے پر آمادہ ہوگئے ہیں اور کوہاٹ گرینڈ جرگے میں مشران نے دستخط کردیئے ہیں۔

ذرائع کے مطابق فی الحال صرف ایک فریق نے مجوزہ معاہدے پر دستخط کیے ہیں، دوسرے فریق کے دستخط کی صورت میں کمشنر کوہاٹ آفس میں جرگہ حتمی فیصلے کا اعلان کرے گا۔

 پارا چنار پشاور مرکزی شاہراہ اور اپر کرم کے راستے ڈھائی ماہ سے بند اور اپرکرم کو ہر قسم کی سپلائی معطل ہے۔پاراچنار کی ابتر صورتحال کے خلاف کرم پریس کلب پر 9 دن سے دھرنا جاری ہے جبکہ شہر کے دیگر علاقوں میں پانچ مقامات پر بھی دھرنے دیے جا رہے ہیں۔

کراچی میں بھی پارا چنار کی صورتحال پر مختلف علاقوں میں دھرنے دیے جا رہے ہیں جس کے باعث ٹریفک کی روانی شدید متاثر ہے اور دھرنوں کے باعث سڑکیں بند ہونے کی وجہ سے ٹریفک پولیس نے متبادل روٹس بتا دیے ہیں۔ خیبر پختونخوا کے ضلع کرم میں قیام امن کے لیےکوہاٹ میں گرینڈ امن جرگہ میں فریقین کے درمیان معاہدے کو تقریباً حتمی شکل دے دی گئی۔

وزیرِ اعظم شہباز شریف نے جنوبی کوریا میں طیارہ حادثے  میں قیمتی جانی انسانوں کے ضیاع پر افسوس کا اظہار کیا ہے۔

سماجی رابطے کی ویب سائٹ ایکس پر جاری اپنے ایک بیان میں شہباز شریف نے کہا کہ جنوبی کوریا کے موان انٹرنیشنل ایئر پورٹ پر ہوئے المناک حادثے کا جان کر دلی دکھ ہوا۔

اُنہوں نے مزید کہا کہ حادثے میں کئی قیمتی جانیں ضائع ہوئیں۔

وزیرِ اعظم نے یہ بھی لکھا کہ ہم دکھ کی اس گھڑی میں کورین عوام اور حکومتِ جمہوریہ کوریا کے ساتھ ہیں۔

یاد رہے کہ جنوبی کوریا کے موان ایئرپورٹ پر لینڈنگ کے دوران مسافر طیارے کو حادثہ پیش آیا، جس کے نتیجے میں 120 افراد ہلاک اور متعدد زخمی ہوگئے۔

رپورٹس کے مطابق طیارے کو حادثہ لینڈنگ گیئر میں خرابی کے باعث پیش آیا۔ طیارہ رن وے سے اتر کر اطراف میں لگی باڑ سے ٹکرا گیا، جس سے طیارے میں آگ لگ گئی۔

پنجاب پولیس کی طرف سے اپنے شہدا کے اہلخانہ کو گھروں کی فراہمی کا سلسلہ جاری ہے۔

ترجمان پنجاب پولیس کے مطابق رحیم یار خان کے شہید کانسٹیبل شفیق احمد کے اہل خانہ کو پنجاب پولیس کی طرف سے انکی پسند کا ایک کروڑ 35 لاکھ روپے مالیت کا گھر فراہم کردیا گیا ہے۔ آئی جی پنجاب ڈاکٹر عثمان انور کی خصوصی کاوش پر حکومت پنجاب نے شہید کے اہلخانہ کو گھر دلانے کیلئے فنڈز جاری کئے۔

ترجمان کے مطابق کانسٹیبل شفیق احمد نے رواں سال جون میں ڈاکوؤں کے ساتھ فائرنگ کے تبادلے میں جام شہادت نوش کیا تھا، شہید کے اہلخانہ کو انکی پسند کے مطابق رفیع قمر روڈ بہاولپور میں گھر خرید کر فراہم کیا گیا، انکے لواحقین میں اہلیہ، دو بیٹے اور دو بیٹیاں شامل ہیں۔

آئی جی پنجاب ڈاکٹر عثمان انور نے کانسٹیبل شفیق احمد شہید کی لازوال قربانی کو بھرپور خراج تحسین کرتے ہوئے کہا کہ شفیق احمد نے اپنی جان کی پرواہ کئے بغیر فرائض کی ادائیگی کے دوران جام شہادت نوش کیا، پنجاب پولیس کانسٹیبل شفیق احمد جیسے 1650 سے زائد بہادر شہدا کی امین فورس ہے۔

ایف آئی اے فیصل آباد زون  نے کارروائی کرتے ہوئے  انسانی اسمگلر غلام دستگیر (عرف کامران لیبیا) کو  گرفتار کر لیا گیا۔

وفاقی تحقیقاتی ایجنسی کے ترجمان نے بتایا کہ ایف آئی اے فیصل آباد زون  نے  کارروائی کرتے ہوئے  انسانی اسمگلر غلام دستگیر (عرف کامران لیبیا) کو  گرفتار کر لیا گیا، اس سے قبل عبدالرحمان نامی ایجنٹ کو بھی گرفتار کیا گیا تھا، ملزم عبدالرحمان کی نشاندہی پر بغلام دستگیر نامی انسانی اسمگلر کو گرفتار کیا گیا۔

ان کا کہنا تھا ک ملزمان شہریوں کو غیر قانونی سمندر کے راستے لیبیا سے یورپ بھجوانے میں ملوث ہیں، ملزمان کو فیصل آباد کے مختلف علاقوں  سے گرفتار کیا گیا، ملزمان انسانی اسمگلنگ میں ملوث بین الاقوامی گینگ کا حصہ ہیں۔

ترجمان ایف آئی اے نے کہا کہ گرفتار ملزمان نے 7 متاثرہ شہریوں کو یورپ بھجوانے کے نام کروڑوں روپے ہتھیائے، ملزمان نے یورپ بھجوانےکے نام پر متاثرہ شہریوں سےمجموعی طور پر 2 کروڑ 73 لاکھ روپے ہتھیائے۔

بیان کے مطابق ملزمان نے متاثرہ شہریوں کو پہلے عمرے ویزے پر سعودی عرب بھجوایا، بعد ازاں ملزمان نے شہریوں کو سعودی عرب سے لیبیا بھجوایا، ملزمان متاثرہ شہریوں کو کشتی کے ذریعے لیبیا سے اٹلی اور یونان بھجوانے میں ملوث ہیں۔

ایف آئی اے نے مزید بتایا کہ ملزمان کے موبائل فون سے اہم شواہد برآمد کر لئے گئے، ملزمان کے موبائل فون سے متاثرین اور ایجنٹوں سے رابطے کے شواہد بھی برآمد کیے گئے، ملزمان کے قبضے سے رقوم کی ادائیگی سے متعلق ریکارڈ بھی برآمد ہوا۔

ترجمان ایف آئی اے نے کہا کہ ملزمان کو گرفتار کر کے تفتیش کا آغاز کر دیا گیا۔