ائرپورٹس سیکورٹی فورس نے پشاور ائیر پورٹ پر کارروائی میں دوحہ جانے والی پرواز پر مسافر سے بھاری مقدار میں چرس برآمد کرلی۔

مسافر کی شناخت حسن ابراہیم کے نام سے ہوئی، مسافر نے یہ منشیات پلاسٹک کے ڈبے کے اندر گڑ کی تہہ میں نہایت مہارت سے چھپا رکھی تھی۔

 اے ایس ایف کے عملے نے مسافر کے سامان کی تلاشی پر 10.600 کلوگرام چرس برآمد کرکے اسمگلنگ کی کوشش ناکام بنادی۔

 ملزم کو ابتدائی تفتیش کے بعد مزید قانونی کارروائی کے لیے برآمد شدہ منشیات کے ساتھ اے این ایف حکام کے حوالے کردیا گیا۔

پنجاب کی سینیئر صوبائی وزیر مریم اورنگزیب نے کہا ہے کہ بیرون ملک مقیم پاکستانیوں نے 11 ماہ میں 31 فیصد زیادہ پیسے بھیج کر سول نافرمانی کی کال مسترد کردی ہے۔

سال 2024 کے پہلے 11 ماہ میں ترسیلات زر میں مزید 31 فیصد اضافے کا خیر مقدم کرتے ہوئے مریم اورنگزیب نے کہا کہ اب بیرون ملک مقیم پاکستانی جھوٹ فریب اور فراڈیوں کے جھانسے میں آنے والے نہیں۔

انہوں نے کہا کہ مار دو ، جلا دو ، گالی گلوچ ، غنڈہ گردی ، جھوٹ فراڈ سول نافرمانی کی کالز  سے عوام کا پیٹ نہیں بھرتا، نو مئی کے مجرموں سے ملک کی ترقی ، سنبھلتی ہوئی معیشت عوام کی خوشحالی ہضم نہیں ہو رہی جس کو چار سال میں تباہ و برباد کر کے گئے تھے۔

مریم اورنگزیب نے کہا کہ نو مئی کے مجرم، ملک کو لوٹنے والے چور اور ملک کو جلانے والے بہروپیے  کسی رعایت کے مستحق نہیں، اوورسیز پاکستانی سنبھلتی ہوئی معیشت میں اپنا حصہ ڈال رہے ہیں کبھی دوسروں پہ جھوٹے الزامات، کھبی سائیفر کا فراڈ ہر بات پہ جھوٹ ، اب کوئی ماننے والا نہیں، “امریکہ نے میری حکومت گرائی” سے “امریکہ  مجھے بچالو” ! کوئی شرم ہوتی ہے کوئی حیا ہوتی ہے۔

بیرون ملک مقیم پاکستانیوں کا شکریہ جو پاکستان کی معیشت مضبوط بنانے میں بھرپور کردار ادا کر رہے ہیں، وزیراعظم شہباز شریف کی قیادت میں حکومت مبارکباد کی مستحق ہے، آٹھ ماہ میں مہنگائی کی رفتار 38 سے کم کرکے 4 فی صد اور پالیسی ریٹ 22 سے 13 فی صد پر آنا معجزے سے کم نہیں ہے۔

جماعت اسلامی پاکستان کے تحت فلسطین میں جاری اسرائیلی جارحیت کے خلاف اور غزہ کے مظلوم عوام سے اظہار یکجہتی کے لیے اسلام آباد میں غزہ ملین مارچ آج ہو گا۔

سیکریٹری اطلاعات جماعت اسلامی قیصر شریف کی جانب سے جاری بیان کے مطابق  وفاقی دارالحکومت میں آج ہونے والے غزہ ملین مارچ کی تیاریاں مکمل کر لی گئی ہیں۔

ان کا کہنا تھا کہ اسلام آباد کے تاریخی غزہ ملین میں خواتین ، بچے بھی شریک ہوں گے، امیر جماعت اسلامی پاکستان حافظ نعیم الرحمن غزہ ملین مارچ کی قیادت کریں گے،

بیان کے مطابق امیر جماعت اسلامی حافظ نعیم الرحمن آئندہ کا لائحہ عمل دیں گے ، حافظ نعیم الرحمن چار بجے سہ پہر غزہ ملین مارچ سے خطاب کریں گے،

ان کا کہنا تھا کہ پاکستانی قوم اہل غزہ کے مصائب ، پریشانیوں میں ان کے ساتھ کھڑی ہے۔

ایف آئی اے امیگریشن نے اسلام آباد ایئرپورٹ پر کارروائی میں 17 سال سے مطلوب ریڈ بک کا انتہائی مطلوب انسانی اسمگلر گرفتار کرلیا۔

ملزم کی شناخت امجد علی کے نام سے ہوئی جس کا تعلق گوجر خان سے ہے، ملزم کے خلاف 2007 میں اینٹی ہیومن ٹریفکنگ سرکل راولپنڈی میں مقدمہ درج ہوا تھا۔

ملزم کا نام ریڈ بک کے انتہائی مطلوب انسانی اسمگلروں میں شامل تھا، ملزم ویزا فراڈ کر کے بیرون ملک فرار ہو گیا تھا۔

ملزم کا نام اسٹاپ لسٹ میں شامل تھا جس کی بنیاد پر ملزم کو گرفتار کیا گیا، ملزم کو بعد ازاں اینٹی ہیومن ٹریفکنگ سرکل راولپنڈی منتقل کر دیا گیا جہاں اس سے مزید تفتیش جاری ہے۔