حکومت خیبر پختونخوا کے مشیر اطلاعات بیرسٹر سیف  نے کہا ہے کہ کرم تنازع کے حل کے لیے جرگہ رات گئے تک جاری رہا جس میں دونوں فریقین کے درمیان عمومی طور پر اتفاقِ رائے ہو چکا تاہم صرف چند نکات پر مشاورت کے لیے ایک فریق نے 2 دن کا وقفہ مانگا ہے۔

پشاور سے جاری اپنے ایک بیان میں ان کا کہنا تھا کہ کوہاٹ میں کرم تنازعے کے حل کے لیے جرگہ رات گئے تک جاری رہا،  دونوں فریقین کے درمیان عمومی طور پر اتفاقِ رائے ہو چکا ہے، صرف چند نکات پر ایک فریق نے مشاورت کے لیے دو دن کا وقفہ مانگا ہے۔

بیرسٹر ڈاکٹر سیف نے کہا کہ اہلسنت نے اپنے عمائدین اور عوام سے مشاورت کے لیے دو دن کا وقت مانگا ہے، جرگے نے باہمی مشاورت کے بعد دو دن کا وقت دے دیا ہے، دو دن کے وقفے کے بعد جرگہ منگل کو دوبارہ شروع ہوگا۔

ان کا کہنا تھا کہ جرگے میں تمام بڑے نکات پر اتفاقِ رائے ہو چکا ہے، مشاورت مکمل ہونے کے بعد معاہدے پر دستخط کیے جائیں گے۔

انہوں نے کہا کہ اپیکس کمیٹی کے فیصلے کے مطابق بنکرز اور اسلحہ کا خاتمہ یقینی بنایا جائے گا۔

مشیر اطلاعات کے مطابق خیبر پختونخوا حکومت ایک صدی سے زائد پرانے تنازعے کے مستقل اور پائیدار حل کے لئے پرعزم ہے،  وزیرِ اعلیٰ علی امین گنڈاپور اور گرینڈ جرگے کی کوششوں سے تنازعہ حل ہونے کے قریب ہے۔

بیرسٹر ڈاکٹر سیف نے کہا کہ  کمشنر کوہاٹ سمیت پوری انتظامیہ خلوصِ نیت کے ساتھ تنازعے کے خاتمے اور مستقل امن کے لیے کوششیں کر رہی ہے، وزیرِ اعلیٰ نے امدادی کارروائیوں کے لیے اپنا ہیلی کاپٹر وقف کر دیا ہے،  ادویات پہنچانے سمیت عوام کو فضائی سروس بھی فراہم کی جا رہی ہیں۔

راولپنڈی کے علاقے شکریال میں گیس پائپ لائن میں لگنے والی آگ پر بروقت قابو پالیا گیا۔

حکام کے مطابق آگ لگنے کی اطلاع ملتے ہی ریسکیو اہلکار اس مقام پر پہنچے اور علاقے کو کارڈن آف کر کے عوام کی نقل حرکت محدود کر دی۔

انہوں نے بتایا کہ گلی میں نالے کے اندر پائپ لائن سے گیس لیکج تھی جس کے باعث آگ لگی، ریسکیو ٹیموں  نے جائے وقوع پر پہنچ کر بروقت کارروائی کی اور ان کی پیشہ ورانہ مہارت کی بدولت علاقہ محفوظ رہا۔

ریسکیو حکام نے بتایا کہ فائر فائٹرز نے 3 فائر ٹینڈرز کی مدد سے فوری طور پر آگ پر قابو پایا۔

ریسکیو 1122 نے کہا کہ عوام کی جان و مال کے تحفظ کے لیے محکمہ ہر وقت الرٹ ہے۔

شہر قائد کے 11 مختلف مقامات پر کرم واقعہ پر مذہبی جماعت کے دھرنے جاری ہیں، جس کے نتیجے میں کئی اہم شاہراہیں اور چوراہے بند ہیں۔

ٹریفک پولیس کی جانب سے شہریوں کو متبادل راستے اختیار کرنے کی ہدایت دی گئی ہے، تاہم دھرنوں کے سبب متبادل راستوں پر بھی ٹریفک کا دباؤ بڑھ گیا ہے۔

ٹریفک پولیس کے مطابق نمائش چورنگی: مرکزی دھرنا جاری ہے، ابو الحسن اصفہانی روڈ، عباس ٹاؤن کے سامنے دونوں اطراف کی سڑکیں بند ہیں۔

نارتھ ناظم آباد فائیو اسٹار چورنگی پر احتجاج کے باعث ٹریفک متاثر ہے، یونیورسٹی روڈ پر سمامہ شاپنگ سینٹر کے سامنے دھرنا دیا گیا ہے۔

ٹریفک پولیس کا کہنا ہے کہ شارع فیصل کالا چھپرا کے قریب دونوں اطراف کی سڑکیں بند ہیں، سرجانی ٹاؤن روڈ پر بھی مذہبی جماعت کی جانب سے دھرنا جاری ہے۔

شاہراہ پاکستان پر انچولی کے سامنے ٹریفک بند ہے، گلستان جوہر کامران چورنگی: چاروں طرف ٹریفک بلاک ہے۔

ناظم آباد نمبر 1، اور پاور ہاؤس چورنگی پر دھرنے کی وجہ سے آمد و رفت متاثر ہے۔

واضح رہے کہ کراچی میں گذشتہ شب بھی دھرنوں کے باعث اہم شاہراہوں اور متبادل راستوں پر بدترین ٹریفک جام رہا۔

شہری رات دیر تک ٹریفک میں پھنسے رہے، جبکہ گاڑیوں میں موجود افراد شدید مشکلات کا شکار ہوئے۔

آج ہفتہ وار تعطیل ہونے کی وجہ سے سڑکوں پر ٹریفک معمول سے کم ہے، تاہم متبادل راستوں پر دباؤ بدستور موجود ہے۔

ٹریفک پولیس کے مطابق دھرنوں کے باعث بند ہونے والی سڑکوں سے ٹریفک کو متبادل راستوں پر منتقل کیا جا رہا ہے۔

 سپریم کورٹ بار ایسوسی ایشن نے آل پاکستان وکلا ایکشن کمیٹی کے بیان کی مذمت کرتے ہوئے 26 ویں آئینی ترمیم کی حمایت کا اعلان کردیا۔

صدر رؤف عطا کی جانب سے جاری بیان میں کہا گیا سابق صدور قابل احترام ہیں تاہم انھیں سیاسی بیان بازی کے بجائے موجودہ قیادت کیساتھ بیٹھ کر بات کرنی چاہیے۔

ترمیم سے اختیارات کی منصفانہ تقسیم اور عدلیہ کی خودمختاری کو تحفظ ملا،غیر منتخب نمائندگان کی جانب سے ایسے بیانات قابل افسوس ہیں، ترمیم سے کوئی مسئلہ ہے تو ارکان پارلیمنٹ بات کر سکتے ہیں، فوائد کا علم نہ رکھنے والوں کیلیے یہ کہنا درست ہوگا کہ جہالت نعمت ہے۔