کراچی: کیلئے اوورسیز انوسٹرز چیمبر آف کامرس اینڈ انڈسٹری (او آئی سی سی آئی) نے کہا ہے کہ عالمی سطح پر گرین ہاؤس گیسوں کے اخراج میں صرف اعشایہ 9 فیصد حصے کے باوجود پاکستان کو شدید موسمیاتی خطرات کا سامنا ہے اور موسمیاتی تبدیلیوں سے سب سے زیادہ متاثرہ پانچواں ملک ہے۔

او آئی سی سی آئی نے موسمیاتی تبدیلیاں کم کرنے کے لیے پبلک پرائیویٹ پارٹنرشپ پر زور دینے اور روڈ میپ فراہم کرنے کے لیے  پرائیویٹ سیکٹر سلوشنز ٹو پاکستانز کلائیمیٹ چیلنجز کے عنوان سے پاکستان کلائمیٹ کراس روڈ رپورٹ جاری کر دی۔

ایس ڈی پی آئی کی علمی شراکت داری کے ساتھ مذکورہ رپورٹ 2023 میں ہونے والی او آئی سی سی آئی کی دوسری پاکستان کلائمیٹ کانفرنس کی روشنی پر مبنی ہے۔

او آئی سی سی آئی کے صدر ریحان شیخ نے کہا کہ پاکستان کو درپیش موسمیاتی خطرات کے پیشِ نظر کاروباری ترقی مزید نہیں ہوسکتی، ہمیں نجی شعبے کو سرمایہ کاری پر منافعے کی پائیداری کے ساتھ جوڑنے کی ضرورت ہے اور نئی ملازمتیں اور ذریعہ معاش فراہم کرنے کے لیے گرین ٹرانزیشن پر غور کرنے کی ضرورت ہے۔

رپورٹ میں کلائمیٹ کی اہم حکمتِ عملی کے نکات پر روشنی ڈالی گئی ہے، جن میں موسمیاتی ایکشن پلانز، موسمیاتی تبدیلی کی نوعیت جاننے کی ضرورت، خطرات کا تجزیہ، ریزیلینس، موسمیاتی تخفیف اور موافقت کے منصوبے شامل ہیں اور کہا گیا ہے کہ ماحولیاتی مسائل حل کرنے میں پرائیویٹ سیکٹر کا اہم کردار ہے۔

اس موقع پر سسٹین ایبل ڈیولپمنٹ پالیسی انسٹی ٹیوٹ کے ایگزیکٹیو ڈائریکٹر ڈاکٹر عابد سلہری نے کہا کہ ملک کو موسمیاتی چیلنجز سے نمٹنے کے لیے فوری اور اجتماعی اقدامات کی ضرورت ہے، اس اہم مسئلے کے پائیدار حل کے لیے پرائیویٹ سیکٹر کا اہم کردار ہے جو پاکستان کو محفوظ بناسکتا ہے۔

انہوں نے پرائیویٹ سیکٹر کے بارے میں تاثر تبدیل کرنے کی ضرورت پر زور دیتے ہوئے کہا کہ پرائیویٹ سیکٹر کو مسئلے کا حصہ سمجھنے کے بجائے اس کے حل کے طور پر دیکھا جانا چاہیے۔

او آئی سی سی آئی کلائمیٹ رپورٹ میں کہا گیا ہے کہ کس طرح کارپوریٹس پائیدار سپلائی چین مینجمنٹ کو اپناتے ہوئے ای ایس جی کے معیار پر عمل درآمد، کاربن مارکیٹوں میں سرمایہ کاری کو فروغ اور گرین ڈیولپمنٹ کے لیے پبلک پرائیویٹ پارٹنرشپ کو فروغ دے کر موسمیاتی ایکشنز کو اپنے کاروباری آپریشنز میں ضم کرسکتے ہیں۔

اس رپورٹ میں او آئی سی سی آئی ممبرا ن کی جانب سے کیے گئے اقدامات کو بھی اجاگر کیا گیا ہے۔

او آئی سی سی آئی کی مینجنگ کمیٹی کے رکن اینڈریو بیلی نے کہا کہ پاکستان 5 سب سے زیادہ متاثرہ ممالک میں شامل ہے، اس لیے مقامی حالات کو مد نظر رکھتے ہوئے پائیدار حل پر توجہ دینے کی فوری ضرورت ہے۔

انہوں نے کہا کہ ملک کی توجہ فوری اصلاحات کے بجائے نظریہ، تحقیق اور طویل المدتی سلوشن پر سرمایہ کاری پر مرکوز ہونی چاہیے۔

  اسلام آباد: چیف آف آرمی اسٹاف جنرل عاصم منیر نے نوجوانوں کو پاکستان کا مستقبل قرار دیتے ہوئے کہا ہے کہ ریاست کی یہ ذمہ داری ہے کہ عوام کو سوشل میڈیا سے پیدا شدہ ہیجان اور فتنے کے مضمرات سے دور رکھے۔

اسلام آباد میں نوجوانان پاکستان سے خطاب کرتے ہوئے ‎چیف آف آرمی اسٹاف جنرل عاصم منیر نے کہا کہ آپ کی آنکھوں کی چمک دیکھ کر یہ یقین ہو جاتا ہے کہ پاکستان کا مستقبل محفوظ ہاتھوں میں ہے۔

انہوں نے کہا کہ ‎آزاد ریاست کی اہمیت جاننی ہے تو لیبیا، شام، کشمیر اور غزہ کے عوام سے پوچھو۔

آرمی چیف نے کہا کہ ‎نوجوانوں کو مخاطب کرتے ہوئے کہا کہ علم انسان کو دوسروں سے ممتاز کرتا ہے۔

جنرل عاصم منیر کا کہنا تھا کہ ‎ریاست کی یہ ذمہ داری ہے کہ عوام کو سوشل میڈیا سے پیدا شدہ ہیجان اور فتنے کے مضمرات سے دور رکھے۔

ان کا کہنا تھا کہ ‎عوام، حکومت اور فوج کے درمیان مضبوط رشتہ ہی پاکستان کے تحفظ اور ترقی کا ضامن ہے، ‎جو پاکستان کے ڈیفالٹ کا بیانیہ بنا رہے تھے، وہ آج کہاں ہیں۔

آرمی چیف نے کہا کہ ‎بحیثیت مسلمان ہمیں نا امیدی سے منع کیا گیا ہے، زندگی امتحان کا نام ہے اور قرآن کی آیت پڑھیں کہ “کیا لوگ یہ سمجھ بیٹھے ہیں کہ صرف یہ کہنے پر چھوڑ دیے جائیں گے کہ ‘ہم ایمان لائے’ اور ان کی آزمائش نہ ہو گی”۔

‎نواجوانوں سے انہوں نے کہا کہ پاکستان کا سب سے بڑا اور قیمتی سرمایہ ہمارے نوجوان ہیں، ہم کسی صورت اسے ضائع نہیں ہونے دیں گے اور ‎خطاب کے اختتام پر آرمی چیف نے نوجوانوں کو علامہ اقبال کا شعر سنایا:

‎افراد کے ہاتھوں میں ہے اقوام کی تقدیر

‎ہر فرد ہے ملت کے مقدر کا ستارہ

‎چیف آف آرمی اسٹاف جنرل عاصم منیر نے خطاب کے بعد نوجوانوں کے سوالات کے جواب میں پاک فوج کا مؤقف بیان کیا اور  ‎پارہ چنار میں فسادات سے متعلق  سوال کے جواب میں آرمی چیف نے کہا کہ قبائل مل بیٹھ کر زمینی اور فروعی تنازعات ختم کرنے میں مدد دیں۔

انہوں نے کہا کہ ‎خیبر پختونخوا کے عوام 22 سال سے پاک فوج کے ساتھ مل کر دہشت گردی کے خلاف سیسہ پلائی ہوئی دیوار کی مانند کھڑے رہے، ‎میرا یہ ایمان ہے کہ اللّٰہ تعالیٰ ہمیں دہشت گردی کے خلاف فتح مبین عطا کرے گا۔

  اسلام آباد: سپریم کورٹ آف پاکستان نے مونال ریسٹورنٹ کیس کے تفصیلی فیصلے میں اسلام آباد کے نیشنل پارک میں واقع مونال ریسٹورنٹ کی عمارت گرانے کا حکم دیتے ہوئے وائلڈ لائف بورڈ کو 11 ستمبر کو مونال سمیت دیگر ریسٹورنٹس کا کنٹرول سنبھالنے کا فیصلہ دے دیا۔

چیف جسٹس قاضی فائز عیسیٰ نے مونال ریسٹورنٹ کیس کا25 صفحات پر مشتمل تفصیلی فیصلہ تحریر کیا اور اسلام آباد ہائی کورٹ کے سابق چیف جسٹس اطہر من اللہ کا فیصلہ برقرار رکھا ہے۔

چیف جسٹس قاضی فائز عیسیٰ نے فیصلے میں کہا کہ آرٹیکل 9 اور 14 کے مطابق زندگی ہر چرند پرند کا بنیادی حق ہے، سائنس سے ثابت ہوچکا کہ دنیا میں کوئی تخلیق بغیر مقصد کے نہیں ہوئی اور سائنس  ثابت  کر رہی کہ دنیا پرندوں،  درختوں اور جانوروں سے خالی ہو رہی ہے۔

سپریم کورٹ نے فیصلے میں کہا کہ 11 ستمبر کو وائلڈ لائف بورڈ مونال کا کنٹرول سنبھالے، نیشنل پارک میں موجود لامونتانا، گلوریہ جینز کا بھی قبضہ لیا جائے۔

چیف جسٹس قاضی فائز عیسیٰ نے فیصلے میں واضح کیا ہے کہ کیپٹل ڈیولپمنٹ اتھارٹی (سی ڈی اے) اور پولیس کی مدد سے قبضہ لیا جائے، ریسٹورنٹس کی طرف جانے والے راستے بیریئر لگا کر بند کیے جائیں۔

تفصیلی فیصلے میں ہدایت کی گئی ہے کہ وائلڈ لائف کو ڈسٹرب کیے بغیر ریسٹورنٹس کی عمارات گرا دی جائیں اور مذکورہ جگہ کیسے استعمال میں لانا ہے، اس کے لیے وائلڈ لائف ماہرین سے رائے لی جائے اور ماہرین سے رائے لی جائے کی کیا وہاں پانی کے لیے مصنوعی جھیل بنائی جاسکتی ہے۔