سکھر: اسسٹنٹ جیل سپرنٹنڈنٹ کے بیٹے کو ڈاکوؤں نے گولی مار کر وِڈیو وائرل کردی۔

اسحاق رند کے بیٹے جمیل رند کو ڈاکوؤں نے 10 اگست کو شاہ لطیف یونیورسٹی کے قریب خیرپور سے اغوا کیا تھا، جس کے بعد ڈاکوؤں کی جانب سے 2 کروڑ روپے کا تاوان کا مطالبہ کیا جا رہا ہے اور اس کے لیے دباؤ ڈالنے کی غرض سے ڈاکوؤں نے مغوی جمیل رند کی ٹانگ پر گولی مار کر وِڈیو وائرل کردی۔

پولیس حکام کے مطابق نوجوان کی ڈاکوؤں کے چنگل سے بازیابی کے لیے کوششیں کی جا رہی ہیں، جمیل رند کو جلد ہی ڈاکوؤں کی قید سے آزاد کرا لیا جائے گا۔

دریں اثنا ڈاکوؤں کے چنگل میں پھنسے جمیل رند کی ایک دوسری ویڈیو بھی منظر عام پر آ گئی ہے، جس میں مغوی نوجوان کہہ رہا ہے کہ ڈاکو آج ٹانگ توڑ رہے ہیں، اگر 2 کروڑ روپے نہ دیے تو یہ مجھے مار ڈالیں گے۔ نوجوان نے کہا کہ فوری طور پر تاوان کی رقم ادا کرکے مجھے آزاد کروائیں۔

نوجوان کے وِڈیو بیان کے دوران گولی چلنے کی آواز آتی ہے، جس کے ساتھ ہی مغوی جمیل رند گر جاتا ہے۔

نیویارک: نیویارک میں بھارت کے یوم آزادی کی تقریب میں میئر ایرک ایڈمز نے تقریر میں میں تین بار غلطی سے بھارت کو پاکستان کہہ دیا۔

بھارتی میڈیا کے مطابق تقریب کے دوران میئر نیویارک ایڈمز کو بھارتی کمیونٹی نے گھیر رکھا تھا اور وہ بھارت کے حق میں نعرے بھی لگا رہے تھے۔ اس دوران نیویارک کے مئیر ایرک ایڈمز کی زبان سے تقریر میں ایک بار نہیں بلکہ 3 بار بھارت کے بجائے پاکستان کا نام ادا ہوا۔

مئیر ایرک ایڈمز نے تقریر میں کہا کہ یہ پاکستانی عوام ہی ہیں جو بڑھتی تعداد میں یہ ظاہر کرتے رہتے ہیں کہ ہماری خوشحالی کے لیے عوامی تحفظ ضروری ہے۔ میں اس کمیونٹی کو ایک عرصے سے جانتا ہوں۔ لٹل پاکستان اور کوئنز۔ آپ ہمارے شہر کی بنیاد ہیں تو آئیے آپ کی آزادی کا جشن منائیں۔ تین بار مئیر سے پاکستان کا نام سن کر بھارتیوں پر بجلی گر گئی اور انہوں نے ایرک ایڈمز کی توجہ دلائی کہ وہ بھارت کے بارے میں بات کررہے ہیں۔

میئر ایڈمز نے بالترتیب 14 اور 15 اگست کو لوئر مین ہٹن کے بولنگ گرین پارک میں پاکستان اور بھارت کے یوم آزادی کے موقع پر پرچم کشائی کی تقریبات میں شرکت کی تھی۔

پشاور: خیبر پختونخوا میں بارشوں نے تباہی مچادی، مختلف واقعات میں 2 بہنیں اور ماں بیٹا جاں بحق ہو گئے۔

بنوں، ڈومیل، ڈی آئی خان اور دیگر علاقوں میں شدید بارش سے ہونے والے حادثات میں کئی انسانی جانیں ضائع ہو گئیں۔ مقامی ذرائع کے مطابق ڈومیل کے علاقے موسیٰ خیل خوڑگئی میں گھر کے برآمدے کی چھت گرنے سے ایک ہی گھر کی 2 بہنیں جاں بحق ہو گئیں جب کہ بچوں سمیت گھر کے 5 دیگر افراد زخمی ہیں۔

جاں بحق ہونے والی 2 بہنوں میں سے ایک عالم دین تھی جب کہ ایک زخمی اور حافظ قرآن بھائی کی حالت بھی تشویش ناک بتائی ج اتی ہے۔ جاں بحق ہونے والوں کی لاشوں اور زخمیوں کو خلیفہ گلنواز اسپتال منتقل کردیا گیا ہے۔

دریں اثنا ڈیرہ اسماعیل خان کی تحصیل پروا کے گاؤں طاہر خیل میں بارش کے سبب مکان کی چھت گرنے سے ماں اور بیٹا جاں بحق ہو گئے۔

  اسلام آباد: انسداد دہشت گردی کی عدالت نے پشتون تحفظ موومنٹ ( پی ٹی ایم) کے رہنما علی وزیر کی درخواست ضمانت خارج کردی۔اسلام آباد کی انسداد دہشت گردی کی خصوصی عدالت کے جج طاہر عباس سپرا نے پی ٹی ایم رہنما علی وزیر کی ضمانت کی درخواست پرسماعت کی۔ علی وزیر کے وکلاء پراسکیوٹر راجا نوید عدالت کے روبرو پیش ہوئے۔ عدالت نے فریقین کے دلائل سننے کے بعد درخواست ضمانت خارج کردی۔علی وزیر پر دہشت گردی کی دفعات کے تحت مقدمہ درج تھا اور ان پر پولیس اہلکاروں سے اسلحہ چھیننے کا الزام ہے۔ واضح رہے کہ علی وزیر کے خلاف تھانہ کوہسار میں دہشتگردی دفعات کے تحت درج مقدمے میں انہیں رواں ماہ کے آغاز پر گرفتار کیا گیا تھا۔