اسلام آباد: بشریٰ بی بی اور بانی پی ٹی آئی عمران خان کے خلاف احتساب عدالت اسلام آباد میں ایک اور ریفرنس دائر کر دیا گیا۔

نیب کے تفتیشی افسر محسن ہارون اور کیس آفیسر وقار الحسن نے توشہ خانہ 2 ریفرنس دائر کیا ہے۔ رجسٹرار آفس نے توشہ خانہ 2 ریفرنس کی اسکروٹنی شروع کر دی۔

نیب نے بشریٰ بی بی اور سابق وزیراعظم عمران خان سے اڈیالہ جیل میں توشہ خانہ 2 کی تفتیش کی تھی۔

گزشتہ روز احتساب عدالت نے دونوں کو جوڈیشل ریمانڈ پر بھیج دیا تھا۔

کراچی پولیس نے بلوچستان میں کارروائی کرتے ہوئے مغوی خاتون کو بازیاب کراکے اغواکار کو گرفتار کرلیا۔

جیکسن انویسٹی گیشن پولیس نے تیکنیکی بنیادوں پر بلوچستان کے ضلع اوتھل میں کارروائی کرتے ہوئے مغوی خاتون کوبحفاظت بازیاب کرکےملزم کوگرفتارکرلیا۔

ایس ایس پی انوسٹی گیشن ڈسٹرکٹ کیماڑی اظہرجاوید کے مطابق مغویہ خاتون گل ناززوجہ کامران کے اغواء کا مقدمہ الزام نمبر285/2024 بجرم دفعہ 469 اے کے تحت جیکسن تھانے میں درج کرلیا گیا تھا۔

مقدمہ کے اندراج کے بعد جیکسن انیسٹی گیشن ٹیم نے تکنیکی بنیادوں پربلوچستان کے ضلع اوتھل میں کرتے ہوئے مغویہ کو بحفاظت بازیاب کرکے اغواء میں ملوث ملزم محمد آصف ولد محمد قاسم کوگرفتارکر لیا۔ گرفتار ملزم سے مزید تفتیش جاری ہے۔

کراچی: پاکستان مخالف نعرے لگانے والے ہوٹل ملازم کے خلاف مقدمہ درج کرلیا گیا۔

عوامی کالونی پولیس کے مطابق سوشل میڈیا پر وائرل ہونے والی وڈیو کے حوالے سے پولیس کو مخبر سے اطلاع ملی کہ نعرے لگانے والے کا نام احمد اللہ ہے جو کہ 13 اگست کو کورنگی 4 نمبر موبائل مارکیٹ کے قریب رات کے کسی پہر پاکستان مخالف نعرے لگا بازی کر رہا تھا اور وہ ماشا اللہ غریب نواز ہوٹل کورنگی 4 نمبر کا ملازم ہے۔

اطلاع ملنے پر مدعی مقدمہ سب انسپکٹر حاضر رحمٰن مذکورہ ہوٹل پر 16 اگست کی شب پہنچا اور ہوٹل کے عملے سے معلومات حاصل کیں تو انہوں نے بتایا کہ یہ ملازم دو تین روز سے بغیر کچھ بتائے یہاں سے فرار ہے اور اس کے بارے میں انہیں کچھ نہیں پتا۔

مدعی مقدمہ نے پاکستان مخالف نعرے لگانے کے الزام میں احمد اللہ ولد زکریا مقدمہ نمبر 579 سال 2024 بجرم دفعہ 123 اے کے تحت درج کر کے وڈیو یو ایس بی میں ثبوت کے طور پر محفوظ کرلی اور مزید تفتیش کے لیے انویسٹی گیشن پولیس کے حوالے کر دیا ۔

وڈیو میں دکھائی دینے والا فرار ملزم افغان باشندہ ہے، جسے پولیس تلاش کرنے میں مصروف ہے۔

کراچی: شہر قائد میں صبح سے بادلوں نے ڈیرے ڈال رکھے ہیں جبکہ تیز ہواؤں کے ساتھ ہلکی اور تیز بارش سے موسم خوش گوار ہے۔

محکمہ موسمیات کے مطابق کراچی میں آج دن بھر بارش کا سلسلہ وقفے وقفے سے جاری رہ سکتا ہے جبکہ اگلے 3 روز تک مطلع جزوی اور مکمل ابر آلود رہنے کے ساتھ ہلکی بارش کا امکان ہے۔

شہر میں سمندری ہوائیں بحال ہیں جبکہ ہواؤں کی رفتار 30 کلومیٹر فی گھنٹہ تک تجاوز کر سکتی ہے۔

آج کم سے کم درجہ حرارت 27.5 ڈگری سینٹی گریڈ ریکارڈ ہوا جبکہ زیادہ سے زیادہ درجہ حرارت 33 ڈگری سینٹی گریڈ رہنے کا امکان ہے۔

محکمہ موسمیات نے اب تک ہونے والی بارش کے اعداد و شمار جاری کیے ہیں جس کے مطابق گلشن حدید میں 3 ملی میٹر، میٹ کمپلیکس میں 0.8 اور نارتھ کراچی میں 0.6 ملی میٹر بارش ریکارڈ کی گئی۔

کراچی کے علاقے بہادرآباد میں خاتون ڈرائیور کی گاڑی کی ٹکر سے 2 افراد کے جاں بحق اور 5 کے زخمی ہونے کا مقدمہ درج کرلیا گیا۔

کار ساز کے قریب سروس روڈ پیرہونے والے ٹریفک حادثے کا مقدمہ لینڈ کروز کی خاتون ڈرائیور کے خلاف بہادر آباد تھانے میں درج کرا دیا گیا۔ خاتون کی گاڑی کی ٹکر سے باپ بیٹی جاں بحق اور 5 افراد زخمی ہوئے تھے۔ پولیس نے شہریوں کی مدد سے حراست میں لی جانے والی حادثے کی ذمے دار خاتون ڈرائیور کو باقاعدہ گرفتار کر لیا۔ خاتون ڈرائیور کے سر میں بھی چوٹ لگی تھی جسے طبی معائنے کے لیے اسپتال لے جایا گیا ۔

بہادرآباد کے علاقے کارساز روڈ سروس روڈ مسلم لیگ ہاؤس کے قریب پیر کو شام تقریباً ساڑھے 6 بجے ہونے والے ٹریفک حادثے کا مقدمہ الزمان نمبر 229/2024 بجرم دفعہ 320/337/G/279/427 کے تحت حادثے میں جاں بحق ہونے والے 62 سالہ عمران عارف کے چھوٹے بھائی امتیاز عارف ولد شہزاد منظر کی مدعیت میں درج کر کے حادثے کی ذمے دار خاتون ڈرائیور نتاشا کو باقاعدہ گرفتار کر لیا گیا۔