راولپنڈی: پاکستان نے زمین سے زمین تک مار کرنے والے بیلسٹک میزائل شاہین ٹو کا کامیاب تجربہ کرلیا۔

پاک فوج کے شعبہ تعلقات عامہ (آئی ایس پی آر) کے مطابق پاکستان نے زمین سے زمین تک مار کرنے والے بیلسٹک میزائل شاہین ٹو کا کامیاب تجربہ کیا ہے، جس کا مقصد عسکری تربیت، مختلف تکنیکی صلاحیتوں کی توثیق اور کارکردگی کا جائزہ لینا تھا۔

بیلسٹک میزائل کے تجربے کا مشاہدہ اسٹریٹیجک پلانز ڈویژن، آرمی اسٹریٹیجک فورسز کمانڈ، سائنس دانوں اور اسٹریٹیجک تنظیموں کے انجینئرز کے سینئر افسران نے کیا۔ ڈائریکٹر جنرل اسٹریٹیجک پلانز ڈویژن نے سائنسدانوں کی تکنیکی صلاحیت، لگن اور عزم کو سراہا، جن کی کارکردگی سے یہ تاریخی کامیابی ممکن ہوئی۔

صدر مملکت آصف علی زرداری، وزیراعظم شہباز شریف، چیئرمین جوائنٹ چیفس آف اسٹاف کمیٹی اور سروسز چیفس کی جانب سے سائنس دانوں اور انجینئرز کو بیلسٹک میزائل شاہین ٹو کے کامیاب تجربے پر مبارک باد دی گئی۔

اسلام آباد: وفاقی وزیر داخلہ محسن نقوی سے نیدرلینڈز کی سفیر ہینی ڈی وریس کی ملاقات ہوئی جس میں انسانی اسمگلنگ کو روکنے کے لیے باہمی تعاون بہتر بنانے کی ضرورت پر زور دیا گیا۔

وزیر داخلہ محسن نقوی نے وزارت داخلہ آمد پر نیدرلینڈز کی سفیر کا خیر مقدم کیا۔ ملاقات میں دوطرفہ تعاون سمیت باہمی دلچسپی کے امور پر تبادلہ خیال کیا گیا جبکہ مختلف شعبوں میں اشتراک کار بڑھانے پر بھی گفتگو ہوئی۔

محسن نقوی نے کہا کہ پاکستان نیدرلینڈز کے ساتھ تعلقات کو انتہائی اہمیت دیتا ہے، نیدرلینڈز کے ساتھ مختلف شعبوں میں تعلقات کو بڑھانے کے خواہاں ہیں۔

وزیر داخلہ نے نیدرلینڈز کی نئی حکومت اور اپنی ہم منصب کو مبارکباد بھی دی۔

محسن نقوی نے کہا کہ انسانی اسمگلنگ روکنے کے لیے دو طرفہ اشتراک کار بڑھانے کی ضرورت ہے کیونکہ انسانی اسمگلرز ایک بہت بڑا مافیا ہے اور کوئی ملک تنہا نہیں نمٹ سکتا، مشترکہ اقدامات ہی انسانی اسمگلنگ کے خلاف کارگر ہو سکتے ہیں۔ اس ضمن میں اطالوی ٹیم جلد پاکستان کا دورہ کرے گی۔

ملاقات میں افغان مہاجرین کی دیکھ بھال کے لیے تعاون بڑھانے پر بھی اتفاق ہوا۔ محسن نقوی نے کہا کہ پاکستان نے گزشتہ کئی دہائیوں سے افغان مہاجرین کی مہمان نوازی کی ہے۔

لاہور: وزیراعلیٰ پنجاب مریم نواز کا وزیراعلی سندھ کی جانب سے بجلی قیمت میں ریلیف کو بے وقوفی کہنے پر ردعمل سامنے آگیا۔

مریم نواز نے لاہور میں صوبے بھر کے پوزیشن ہولڈر طلبا کے اعزاز میں ایوان وزیراعلی میں تقریب منعقد کی، جس میں ان کے والدین اور ٹیچرز کو بھی مدعو کیا۔ مریم نواز نے پوزیشن ہولڈرز کو نقد انعام، میڈل اور سرٹیفکیٹ بھی دیے۔

اس موقع پر مریم نواز نے خطاب کرتے ہوئے طلبہ کو والدین اور اساتذہ کی خدمت اور احترام کرنے کی تلقین کی۔ انہوں نے کہا کہ یہ ہونہار بچے ہمارے سر کا تاج ہیں۔

پنجاب میں بجلی کی قیمت میں 14 روپے فی یونٹ کمی کے بارے میں بتاتے ہوئے انہوں نے کہا کہ دو ماہ کے لیے بلز میں ریلیف دیا ہے، کم از کم دو ماہ تو عوام کے سکون سے گزریں گے، یہ قلیل مدتی ریلیف نہیں اس کے بعد ہم بہت بڑا شمسی توانائی کا منصوبہ لارہے ہیں جو ہمیشہ کےلیے صارفین کو زیادہ بلز سے نجات دے گا۔

وزیراعلی سندھ مراد علی شاہ کی جانب سے بجلی کی قیمت میں کمی کو بے وقوفی قرار دینے پر ردعمل ظاہر کرتے ہوئے مریم نواز نے کہا کہ کسی نے لفظ استعمال کیا یہ بے وقوفی ہے، اس پر میں ہنس پڑی۔

مریم نواز نے پی پی پی کی سندھ حکومت سے سوال کیا کہ کرپشن کا پیسہ جیب میں ڈالنا، پروٹوکول، جہازوں، ہیلی کاپٹرز ، گاڑیوں کے قافلوں پر پیسے خرچ کرنا بے وقوفی نہیں اور عوام کو ریلیف دینا بے وقوفی ہے؟ اگر عوام کو 2 ماہ کا ریلیف بھی مل جائے تو میرے لیے اس سے زیادہ سعادت و خوشی کی بات نہیں۔

  اسلام آباد: عدالت نے پی ٹی آئی کے لاپتا کارکن کے کیس میں اٹارنی جنرل کو معاملہ دیکھنے کی ہدایت کرتے ہوئے رپورٹ طلب کرلی۔پاکستان تحریک انصاف کے لاپتا کارکن فیضان کی بازیابی سے متعلق کیس کی سماعت اسلام آباد ہائی کورٹ کے جسٹس میاں گل حسن اورنگزیب نے کی، جس میں لاپتا کارکن فیضان کے والد روسٹرم پر آ گئے اور آبدیدہ ہوکر عدالت کو بتایا کہ صبح بھی مررہا ہوں شام بھی مررہا ہوں۔ صبح سے شام میری بیوی اٹھنے کے قابل نہیں۔لاپتا کارکن فیضان کے والد نے عدالت کو بتایا کہ میں 75 سال کا ہوں، بیڈ سے اٹھ نہیں سکتا۔بعد ازاں عدالت نے اٹارنی جنرل کو اس معاملے کو دیکھنے اور جمعرات کو رپورٹ دینے کی ہدایت جاری کردی۔ عدالت نے سماعت جمعرات تک ملتوی کردی۔

مظفر آباد: مظفرآباد شہر اور گردونواح میں 7 منٹ میں 2 زلزلوں کے جھٹکوں سے زمین لرز اٹھی، لوگ کلمہ طیبہ کا ورد کرتے ہوئے گھروں سے باہر نکل آئے۔

ہٹیاں بالا، آزاد کشمیر، ہٹیاں بالا، چناری اور چکوٹھی سمیت جہلم ویلی بھر میں بھی زلزلے کا شدید جھٹکا محسوس کیا گیا، زلزلے کی شدت ریکٹر اسکیل پر 4.6 ریکارڈ کی گئی۔

ہٹیاں بالا میں زلزلے کے باعث سوئے ہوئے لوگ جاگ گئے، اور خوف زدہ ہو کر گھروں سے کلمہ طیبہ کا ورد کرتے ہوئے باہر نکل گئے۔

مظفرآباد میں زلزلے کا پہلا جھٹکا 6 بج کر 16 منٹ پر اور دوسرا جھٹکا 6 بج کر 23 منٹ پر محسوس کیا گیا۔

زلزلے کے باعث مظفرآباد میں کچھ دیر کے لیے انٹرنیٹ سروس بھی معطل رہی۔

وادی لیپہ، وادی جہلم، باغ، پونچھ اور حویلی کی اضلاع میں بھی زلزلہ کے جھٹکے محسوس کئے گیے۔

زلزلہ کشمیر میں سوپور کے قریب گیارہ کلومیٹر گہرائی میں آیا۔