بھارت کے سینیئر اداکار متھن چکرورتی نے بھی کولکتہ میں بہیمانہ جنسی زیادتی کے بعد قتل ہونے والی خاتون ڈاکٹر کے لیے انصاف کا مطالبہ کردیا۔

بھارتی میڈیا کے مطابق متھن چکرورتی نے بنگالی زبان میں میڈیا سے گفتگو کرتے ہوئے کہا کہ میں کئی جگہوں پر کئی بار کہہ چکا ہوں کہ آنے والے دنوں میں مغربی بنگال کے حالات مزید خراب اور خوفناک ہوجائیں گے۔

متھن چکرورتی نے کولکتہ ریپ کیس پر افسوس کا اظہار کرتے ہوئے کہا کہ اس ہولناک واقعے کے بعد، میں بنگالی ہونے کی حیثیت سے سر اٹھا کر نہیں چل سکتا۔

سینیئر اداکار نے کہا کہ اس خوفناک واقعے کا شکار ہونے والی خاتون ڈاکٹر کے اہلخانہ کے ساتھ میری دلی تعزیت ہے جبکہ میرا مطالبہ ہے کہ جو لوگ اس واقعے میں ملوث ہیں انہیں جلد از جلد سزا دی جائے۔

اُنہوں نے مزید کہا کہ بنگال میں ریپ کے بڑھتے کیسز ریاست کے لاء اینڈ آرڈر پر سوالیہ نشان ہیں۔

واضح رہے کہ بھارت کی ریاست مغربی بنگال کے شہر کولکتہ میں 9 اگست کو 31 سالہ ڈاکٹر کو میڈیکل کالج میں خون میں لت پت مردہ حالت میں پایا گیا تھا، آر جی کار میڈیکل کالج کے اسٹاف نے بتایا تھا کہ ڈاکٹر 36 گھنٹوں پر شفٹ کے تقریباً 20 گھنٹے کام کرنے کے بعد کالج کے سیمینار ہال میں کچھ دیر آرام کے لیے چلی گئی تھیں۔

تاہم، اگلے روز سیمینار ہال سے خاتون ڈاکٹر کی نیم برہنہ حالت میں لاش ملی، پوسٹ مارٹم رپورٹ کے مطابق خاتون ڈاکٹر کو ایک سے زائد مردوں نے انتہائی بے دردی سے جنسی زیادتی کا نشانہ بنایا اور پھر گلا دبا کر قتل کردیا۔

کولکتہ پولیس نے خاتون ڈاکٹر کے ریپ کیس میں ایک پولیس اہلکار کو گرفتار کرکے واقعے کا ذمہ دار قرار دیا ہے جو پولیس افسران اور ان کے اہل خانہ کو اسپتالوں میں داخل کرانے اور طبی امداد کی فراہمی کے لیے تعینات کیا گیا تھا۔

  کراچی: پاکستانی ڈرامہ انڈسٹری کی خوبرو اداکارہ عائزہ خان یوٹیوب پر اپنا نام سرچ کرکے جہاں حیران ہوئیں تو وہیں اداکارہ کے قہقہے بھی لگ گئے۔

عائزہ خان نے اپنے آفیشل انسٹاگرام ہینڈل کی اسٹوری میں یوٹیوب ویڈیو کا اسکرین شاٹ شیئر کیا جس پر لکھا تھا کہ دانش تیمور ناراض عائزہ خان کو منانے کے لیے لندن لے گئے۔

اداکارہ نے یہ اسکرین شاٹ شیئر کرتے ہوئے کہا کہ میں نے اپنا ڈرامہ دیکھنے کے لیے یوٹیوب پر اپنا نام سرچ کیا تو مجھے مداحوں کی جانب سے بنایا گیا ڈرامہ مل گیا۔

اُنہوں نے دانش تیمور سے مخاطب ہوتے ہوئے کہا کہ کیا واقعی ایسا ہے؟، اگر ایسا ہے تو میں آپ سے ناراض ہوں، اب آپ مجھے منانے کے لیے چھٹیوں پر لیکر جائیں۔

عائزہ خان نے مداحوں کی جانب سے بنائی گئی ویڈیو پر زور دار قہقہے بھی لگائے۔

واضح رہے کہ عائزہ خان اور دانش تیمور گزشتہ دنوں چھٹیاں گزارنے کے لیے اپنے بچوں کے ہمراہ برطانیہ میں موجود تھے، اس جوڑے نے اپنی چھٹیوں کی دلکش تصاویر سوشل میڈیا پر شیئر بھی کی تھیں۔

عائزہ خان اور اداکار دانش تیمور سال 2014 میں رشتہ ازدواج میں منسلک ہوئے تھے، اس جوڑی کے دو بچے، ایک بیٹی اور ایک بیٹا ہے۔

 ممبئی: بھارتی آنجہانی اداکارہ سری دیوی کے شوہر اور فلمساز بونی کپور نے 14 کلو وزن کم کرکے سب کو حیران کردیا۔

بونی کپور نے اپنے آفیشل انسٹاگرام ہینڈل پر اپنی نئی تصویر پوسٹ کی جس میں اُنہیں سری دیوی کی بنائی گئی پینٹنگ کے سامنے کھڑے دیکھا جاسکتا ہے۔

مذکورہ تصویر میں بونی کپور کا وزن کافی کم لگ رہا ہے جبکہ اُن کے سر کے بال بھی گھنے نظر آرہے ہیں۔

بونی کپور نے اپنی پوسٹ میں انکشاف کیا ہے کہ انہوں نے 14 کلو وزن کم کیا ہے اور وہ مزید 8 کلو وزن کم کرنے کا ارادہ رکھتے ہیں۔

اُنہوں نے کہا کہ میری اس تبدیلی میں میری اہلیہ و آنجہانی اداکارہ سری دیوی کا اہم کردار ہے، اگرچہ وہ اس دُنیا میں نہیں لیکن وہ ہر وقت میرے ساتھ ہوتی ہیں۔

فلمساز نے مزید کہا کہ میری جان، سری دیوی کا فن (پینٹگ) میرے پیچھے ہے، اُن کی سوچ اور خیالات ہمیشہ میرے ساتھ رہیں گے۔

بونی کمار کا ناقابلِ یقین حد تک وزن کم اور گھنے بال دیکھ کر بالی ووڈ سے وابستہ فنکار اور مداح دنگ رہ گئے۔

بھارتی میڈیا کے مطابق بونی کپور نے گزشتہ سال رنبیر کپور اور شردھا کپور کی فلم ‘تو جھوٹی میں مکّار’ سے بطور اداکار ڈیبیو کیا تھا۔

واضح رہے کہ سال 2018 میں سری دیوی دبئی کے ایک ہوٹل میں باتھ ٹب میں ڈوب کر جان سے ہاتھ دھو بیٹھی تھیں، بھارتی میڈیا کا کہنا تھا کہ اداکارہ کی موت دل کا دورہ پڑنے کی وجہ سے ہوئی۔