ڈھاکا: بنگلا دیش نیشنلسٹ پارٹی نے بھارت کو بنگلادیش کے معاملات میں مداخلت نہ کرنے کی وارننگ دے دی۔

بنگالی میڈیا کے مطابق بنگلا دیش نیشنلسٹ پارٹی اور طلبہ تحریک کے رہنماؤں نے بی جے پی کو بنگلا دیش میں مداخلت نہ کرنے کی وارننگ جاری کی۔ بنگلا دیش نیشنلسٹ پارٹی کے عہدیداران کا کہنا تھا کہ بھارت بوکھلاہٹ کا شکار ہے اور بنگلا دیش میں امن و امان کی صورت حال خراب کرنا چاہتا ہے۔ بی جے پی بنگلہ دیشی سیاست میں بڑے پیمانے پر مداخلت کر رہی ہے جس پہ خطے میں تشویش کی لہر ہے۔ مودی سرکار اپنے اوچھے ہتھکنڈوں سے خطے کاامن تباہ کرنا چاہتی ہے۔

شیخ حسینہ واجد بنگلہ دیش میں بھارتی کٹھ پتلی وزیرِاعظم کی حیثیت سے کام کر رہی تھیں۔ بنگلا دیش کو سیاسی بحران کے بعد اس وقت بھارت کی طرف سے مداخلت کا سامنا ہے۔آخر کب تک مودی سرکار انتہا پسندی کی سیاست کو فروغ دیتی رہے گی؟

طرابلس: اہم عہدیدار کے اغوا کے بعد لیبیا کی مرکزی بینک نے اپنی تمام کاروباری سرگرمیاں معطل کر دی ہیں۔

مرکزی بینک کی انفارمیشن ٹیکنالوجی کے سربراہ مصعب مسالم کو آج صبح ایک نامعلوم گروپ نے ان کے گھر سے اغوا کر لیا۔

بینک کا کہنا ہے کہ وہ اس وقت تک اپنا کام دوبارہ شروع نہیں کرے گا جب تک مصعب مسالم کو رہا نہیں کر دیا جاتا، ترجمان کا مزید کہنا تھا کہ دیگر ایگزیکٹوز کو بھی اغوا کی دھمکیاں دی گئی ہیں۔

بینک کے ترجمان نے کہا کہ اس قسم کے واقعات اس کے ملازمین کی حفاظت اور بینکنگ سیکٹر کے کام کے تسلسل کے لئے خطرہ ہیں، بینک نے اغوا کے بارے میں مزید تفصیلات فراہم نہیں کیں۔

مقامی میڈیا کا کہنا ہے کہ ہو سکتا ہے اغواکاروں نے ایسا بینک کے گورنر صدیق الکبیر کے استعفے پر مجبور کرنے کی کوشش کے طور پر کیا ہو۔

روچیسٹر: ڈیموکریٹک پارٹی کی نامزد صدارتی امیدوار کملا ہیرس نے پنسلوانیا کی انتخابی مہم کے دوران ٹرمپ کو ‘بزدل’ قرار دے دیا۔

امریکی نائب صدر کملا ہیرس نے سابق صدر ڈونلڈ ٹرمپ کو بالواسطہ تنقید کا نشانہ بناتے ہوئے کہا ہے کہ 5 نومبر کو ہونے والے انتخابات میں ان کے مدمقابل ‘بزدل’ ہیں جن کی سیاست حریفوں کو نیچا دکھانے پر مرکوز ہے۔

ہیرس کا یہ بیان ریاست پنسلوانیا میں انتخابی مہم کے دوران سامنے آیا، جس میں مینیسوٹا کے گورنر ٹم والز بھی شریک تھے۔

اپنے حامیوں کے ایک ہجوم سے خطاب کرتے ہوئے کملا ہیرس نے کہا کہ جب ہم جانتے ہیں کہ لیڈر کی طاقت کا حقیقی پیمانہ اس بات پر منحصر ہوتا ہے کہ آپ کس کو اٹھاتے ہیں، لیکن جو کوئی دوسرے لوگوں کو مارنا چاہتا ہے وہ بزدل ہے۔

انھوں نے براہ راست ٹرمپ کا نام نہیں لیا، جنہوں نے ہفتے کے روز مشرقی پنسلوانیا میں ایک انتخابی مہم کے دوران کملا ہیرس کو ‘بنیاد پرست’ اور ‘پاگل’ قرار دیا تھا۔

رائے عامہ کے جائزوں سے پتہ چلتا ہے کہ ہیرس انتخابی مہم میں نئی توانائی لا رہی ہیں اور قومی سطح پر اور پنسلوانیا سمیت آٹھ انتہائی مسابقتی ریاستوں میں سے کئی میں سابق صدر ٹرمپ کے ساتھ فرق کو ختم کر رہی ہیں جو ڈیموکریٹک صدر جو بائیڈن کے جانشین کے انتخاب میں فیصلہ کن کردار ادا کریں گی۔

امریکی نائب صدر کملا ہیرس جو سیاہ فام ہیں اور ایشیائی ورثے کی حامل ہیں، نومبر میں کامیابی حاصل کرنے کی صورت میں پہلی خاتون صدر ہوں گی۔

ریاض: سعودی وزیر خارجہ پرنس فیصل بن فرحان اور امریکی ہم منصب اینٹونی بلنکن کے درمیان ٹیلیفونک رابطہ ہوا ہے۔

دونوں رہنماؤں کے درمیان غزہ، یمن اور سوڈان کی صورتحال پر تبادلہ خیال ہوا۔

سعودی ذرائع ابلاغ کے مطابق امریکی وزیر خارجہ کا مشرق وسطیٰ دورے کا مقصد غزہ میں جنگ بندی معاہدے کیلئے سفارتی دباؤ بڑھانا ہے۔

واضح رہے کہ امریکی وزیرخارجہ اینٹونی بلنکن کل مشرق وسطیٰ کے دورے پر تل ابیب پہنچے ہیں۔

تل ابیب میں امریکی وزیر خارجہ آج وزیراعظم نیتن یاہو سمیت سینئر اسرائیلی رہنماؤں سے ملاقات کریں گے۔

سعودی میڈیا کا مزید کہنا ہے کہ امریکی وزیر خارجہ بلنکن تل ابیب سے مصر پہنچیں گے۔

بنکاک: تھائی لینڈ کی کم عمرترین خاتون وزیراعظم پیتونگاترن شیناوترا نے ملک کے بادشاہ کی پارلیمنٹ کے فیصلے کی توثیق کے بعد اپنے منصب کا حلف اٹھالیا۔

خبرایجنسی رائٹرز کی رپورٹ کے مطابق تھائی لینڈ کے بادشاہ مہا واجیکرالونگکورن کے سامنے ایوان نمائندگان کے سیکریٹری ایپاٹ سکھانند نے پارلیمنٹ کے فیصلے کی توثیق کی تقریب میں متن پڑھ کر سنایا اور اس کے بعد پیتونگاترن شیناوترا کی وزارت عظمیٰ کی توثیق کردی گئی۔

پیتونگاترن شیناوترا نے وزیراعظم کی حیثیت سے توثیق پر بادشاہ کا شکریہ ادا کیا اور خطاب میں کہا کہ انتظامیہ کے سربراہ کی حیثیت سے میں کھلے دل کے ساتھ منتخب نمائندوں سے مل کر اپنے فرائض انجام دوں گی۔

انہوں نے کہا کہ سب کا مؤقف سن کر مل بیٹھ کر فیصلے کریں گے تاکہ ملک استحکام کے ساتھ آگے بڑھے۔

پیتونگاترن شیناوترا اس سے قبل حکومتی سطح پر کام کرنے کا کوئی تجربہ نہیں رکھتیں اور انہیں مختلف محاذوں پر چیلنجز کا سامنا ہے، جس میں ملک کی معاشی صورت حال کے علاوہ ان کی سیاسی جماعت پھیو تھائی کی مقبولیت میں کمی کا سامنا ہے۔

خیال رہے کہ 37 سالہ پیتونگاترن شیناوترا کے والد تھاکسن شیناواترا ملک کے وزیراعظم رہ چکے ہیں۔

پیتونگاترن شیناوترا کو عدالت کی جانب سے سریتا تھاویزن کو وزارت عظمیٰ سے معذولی کے بعد پارلیمنٹ میں دو تہائی کی اکثریت حاصل ہوگئی تھی اور انھیں 493 کے ایوان میں 314 سے زائد ارکان نے ووٹ دیکر ملک کا نیا وزیراعظم منتخب کیا تھا۔

پیتونگاترن شیناوترا ملک کی دوسری خاتون اور شیناوترا خاندان سے تعلق رکھنے والی تیسری وزیراعظم ہیں، ان سے قبل ان کے والد تھاکسن اور پھوپھی ینگلوک شنیاوترا ملک کے وزیر اعظم رہے ہیں۔

یاد رہے کہ سابق تھائی وزیراعظم سریتا تھاویزن نے 2006 میں فوجی آمریت کے خلاف طویل جلاوطنی کاٹی اور گزشتہ برس ہی ملک لوٹے تھے۔ انھوں نے انتخاب لڑا اور وزیراعظم منتخب ہوگئے لیکن ایک سال کے اندر ہی انھیں عدالت نے برطرف کردیا۔

عدالت نے اپنے فیصلے میں کہا کہ وزیراعظم سریتا تھاویزن نے ایک سزا یافتہ شخص کو کابینہ میں شامل کرکے اپنے حلف کی خلاف ورزی کی اور اخلاقی برائی کے مرتکب ہوئے۔

غزہ: تین ملکوں کی ثالثوں کے زیر سایہ دوحہ میں ہونے والے حماس اسرائیل جنگ بندی مذاکرات کے نکات پر حماس کا ردعمل سامنے آ گیا ہے۔

حماس نے دوحہ میں ہونے والے مذاکرات میں شرکت سے انکار کر دیا تھا اور کہا تھا کہ ہم اس نتیجے پر پہنچے ہیں کہ نیتن یاہو جنگ بندی کی راہ میں رکاوٹ ہیں۔

ترجمان حماس کا کہنا ہے کہ دوحہ میں ہوئےمذاکرات کی تفصیلات ثالثوں نے بتا دی ہیں اور مذاکرات میں نیتن یاہو کی نئی شرائط سامنے آئی ہیں۔

اسرائیلی وزیر اعظم نیتن یاہو نے قیدیوں کے تبادلے اور اسرائیل کے انخلا کیلئے بھی نئی شرائط رکھی ہیں۔

اسرائیل کے خلاف برسر پیکار حماس کا کہنا ہے کہ مذاکرات کی ناکامی کی صورت میں ذمہ دار نیتن یاہو ہوں گے، ان کا کہنا تھا کہ ہم جنگ بندی کیلئے ثالثوں سے بھرپور تعاون کر رہے ہیں۔

ترجمان حماس نے مزید کہا کہ ثالثوں سے کہا ہے کہ جن نکات پر پہلے اتفاق ہو چکا ہےان کو حتمی شکل دیں۔