لاہور: لاہوراپنی 14 سالہ سوتیلی بیٹی کے ساتھ ایک سال سے زیادتی کرنے والا بدبخت شخص گرفتار کرلیا گیا۔

جنسی ہوس کا شکار سوتیلا باپ رشتوں کا تقدس ہی بھول گیا۔ ایک سال سے اپنی 14 سالہ سوتیلی بیٹی علشبا کے ساتھ زیادتی کرتا رہا۔ پولیس کے مطابق بچی علشبا ہنجروال کے علاقے میں کسی کے گھر میں کام کرتی ہے اور وہیں رہتی ہے۔

پولیس کے مطابق بچی جب بھی اپنے گھر جاتی تو سوتیلا والد موقع پاتے ہی زیادتی کا نشانہ بناتا اور کسی کو بتانے کی صورت میں بچی اور اس کی والدہ کو قتل کرنے کی دھمکیاں دیتا۔ حال ہی میں والدہ اپنی بیٹی علشبا کو کام والے گھر سے اپنے گھر لے جانے پہنچی تو بچی نے انکار کر دیا، والدہ کے اصرار کرنے اور وجہ پوچھنے پر بچی نے زیادتی کے متعلق بتایا۔

پولیس نے والدہ کی درخواست پر ملزم شاہد کیخلاف تھانہ چوہنگ میں مقدمہ درج کرکے اسے جینڈر سیل کے حوالے کردیا ہے۔ ایس پی صدر ڈاکٹر غیور احمد خان کے مطابق بچوں اور خواتین کا استحصال کرنے والے کسی رعایت کے مستحق نہیں۔

راولپنڈی: عمران خان کی مبینہ سہولتکاری پر تحویل میں لیے گئے سابق ڈپٹی سپرنٹنڈنٹ اڈیالہ جیل گھر پہنچ گئے۔
ذرائع کے مطابق بانی چیئرمین پی ٹی آئی عمران خان کی مبینہ طور پر سہولت کاری کے الزام میں تحویل میں لیے گئے اڈیالہ جیل کے سابق ڈپٹی سپرنٹنڈنٹ ظفر اقبال گھر پہنچ گئے۔
سابق ڈپٹی سپرنٹنڈنٹ کو 13اگست کو پوچھ گچھ کے لیے تحویل میں لیا گیا تھا۔ ذرائع کا کہنا ہے کہ ظفر اقبال جمعہ کی سہ پہر اچانک اڈیالہ جیل کے قریب اپنی رہائش گاہ پہنچے۔ ظفر اقبال کے گھر پہنچنے پرلاپتا اسسٹنٹ ناظم شاہ کی فیملی نے بھی ملاقات کی۔
ظفر اقبال نے فیملی سے ملاقات میں ناظم شاہ کے بارے لاعلمی کا اظہارکیا۔

گجرانوالہ: سی ٹی ڈی آپریشن کے دوران ایک دہشت گرد اپنے ہی ساتھیوں کی افئرنگ سے ہلاک ہوگیا۔

ترجمان کاؤنٹر ٹیررازم ڈیپارٹمنٹ کے مطابق گجرانوالہ کے علاقے ایمن آباد میں سی ٹی ڈی اور دہشت گردوں کے درمیان فائرنگ کا تبادلہ ہوا، جس میں ایک دہشت گرد اپنے ہی ساتھیوں کی فائرنگ سے مارا گیا جب کہ دو طرفہ فائرنگ میں سی ٹی ڈی ٹیم معجزانہ طور پر محفوظ رہی۔

خفیہ اطلاع پر کی گئی چھاپا مار کارروائی کے دوران 3 دہشت گرد موقع سے فرار ہونے میں کامیاب ہو گئے۔ سی ٹی ڈی حکام نے مقدمہ درج کرلیا۔ ہلاک ہونے والے دہشت گرد کے قبضے سے اسلحہ ، سیفٹی فیوز، بارودی مواد ، کارتوس اور دھماکا خیز مواد برآمد ہوا ہے۔

کراچی: شہر قائد میں آج ہفتے کے روز اور کل اتوار کو گرج چمک کے ساتھ بارش کا امکان ہے۔

محکمہ موسمیات کی جانب سے مون سون الرٹ جاری کردیا گیا ہے، جس کے مطابق طاقتور مون سون ہواؤں کا سلسلہ صوبے کے شمالی/ وسطی جب کہ بلوچستان کے مشرقی و شمال مشرقی علاقوں پر اثرانداز ہورہا ہے ، جس کے نتیجے میں آج اور کل کراچی میں گرج چمک کے ساتھ بارش کا امکان ہے ۔

اسی طرح پیر کے روز بھی موسم زیادہ تر ابرآلود رہنے کے ساتھ ساتھ ہلکی بارش کا امکان بھی رہے گا ۔ موسلادھاربارشوں کی وجہ سے دیہی سندھ کےنشیبی علاقوں میں پانی جمع ہوسکتا ہے۔

محکمہ موسمیات کے مطابق آج ہفتے کو کراچی میں زیادہ سے زیادہدرجہ حرارت 32 ڈگری سینٹی گریڈ متوقع ہے جب کہ کم سے کم درجہ حرارت 28 ڈگری سینٹی گریڈ ریکارڈ ہوا ہے۔ شہر میں بارش کا سلسلہ وقفے وقفے سے پیر تک جاری رہ سکتا ہے۔

 لاہور: پنجاب کی وزیر اطلاعات عظمی بخاری نے کہا ہے کہ 2018 سے 2022 تک پنجاب پنکی، گوگی اور بزدار گینگ کے حوالے رہا۔صوبائی وزیراطلاعات عظمی بخاری نے بیان میں کہا کہ پنجاب پانچ سال بعد دوبارہ 2018 والا پنجاب بنے گا۔ 2018 سے 2022 تک پنجاب پنکی، گوگی اور بزدار گینگ کے حوالے رہا۔ اس گینگ نے پنجاب کو 10 سال پیچھے دھکیل دیا۔ جو لوگ مریم نواز پر انگلیاں اٹھا رہے ہیں ان کے اپنے صوبے میں کرپشن کی آوازیں پارٹی کے اپنے لوگ اٹھا رہے۔عظمی بخاری نے مزید کہا کہ علی امین گنڈا پور کی اپنی کابینہ کے لوگ ان کی کرپشن کی داستانیں خود بے نقاب کر رہے ہیں۔ مریم نواز نے چند ماہ کی کارکردگی سے ثابت کیا وہ نواز شریف کا وزیراعلیٰ کے لیے درست انتخاب ہیں۔ روٹی کی قیمت میں کمی مریم نواز کی بہترین حکمت عملی اور ہوم ورک کا نتیجہ ہے۔ پنجاب میں آج باقی صوبوں کی نسبت مہنگائی قدر کم اور اشیاء خورد عام آدمی کی پہنچ میں ہیں۔

پشاور: مشیر اطلاعات خیبر پختونخوا بیرسٹر سیف نے کہا ہے کہ پنجاب میں نااہل اور مینڈیٹ چور ٹولے کے منصوبے ناکام ہوگئے ہیں۔

پنجاب حکومت پر تنقید کرتے ہوئے بیرسٹر سیف نے کہا کہ پنجاب میں طلبہ کا ای بائیک لینے سے انکار اس کامنہ بولتا ثبوت ہے۔ 8 ہزار میں سے 6 ہزار طلبہ نے بائیک لینے سے انکار کردیا ہے۔ پنجاب کی مینڈیٹ چور جعلی سرکار کی موٹر سائیکل اسکیم کالجز میں فلاپ ہونے لگی ہے۔عوامی مفاد کے منصوبے شروع کرنا مینڈیٹ چور سرکار کے بس کی بات نہیں ہے۔

انہوں نے کہا کہ وزیر اعلیٰ خیبرپختونخوا ایک لاکھ 30 ہزار مستحق خاندانوں کو سولر سسٹم دے رہے ہیں اور وہ بہت جلد تعلیم کارڈ پروگرام کا افتتاح بھی کریں گے۔ صوبے میں صحت کارڈ پر مفت علاج اور ادویات فراہم کی جارہی ہیں۔ نوجوانوں کے لیے احساس روزگار ، احساس ہنر ، احساس نوجوان روزگار پروگرامز کی تیاریاں مکمل ہوچکی ہیں۔

بیرسٹر سیف کا کہنا تھا کہ وفاق اور پنجاب میں فارم 47 جعلی سرکار خیبر پختونخوا جیسے منصوبے شروع کر نے میں تاحال ناکام ہے۔ شریف خاندان کے منصوبے کمیشن سے شروع اور کمیشن پر ختم ہوتے ہیں۔ شریف خاندان صرف وہ منصوبے شروع کرتے ہیں جس میں ان کے کاروبار کو فائدہ ہو۔