اسلام آباد ہائی کورٹ نے شادی سے انکار پر لڑکی کو قتل کرنے والے شخص کی 25 سال قید کی سزا کو کالعدم قرار دے دیا۔

اسلام آباد ہائی کورٹ کے جسٹس محسن اختر کیانی نے شادی سے انکار پر 24 سالہ لڑکی کے قتل پر سزا پانے والے مجرم شہزاد کی سزا کے خلاف اپیل پر8 صفحات پر مشتمل فیصلہ جاری کردیا۔ عدالت نے ٹرائل کورٹ کا 25 سال قید بامشقت کا فیصلہ کالعدم قرار دے دیا۔

عدالت نے کہا کہ ٹرائل کورٹ کا پورا فیصلہ 25 سال سزا دینے کی وضاحت کرنے میں ناکام رہا ہے۔ ٹرائل کورٹ 45 روز میں کیس کی وجوہات پر مبنی دوبارہ فیصلہ کرے۔ قتل عمد کے ملزم کو سزائے موت کیوں نہیں دی گئی ٹرائل کورٹ فیصلے کی وجوہات لکھے۔

فیصلے میں کہا گیا ہے کہ مدعی کے مطابق شہزاد 5 ماہ تک سونیا کا پیچھا کرتا رہا اور پھر رشتہ بھیجا۔ وکیل کے مطابق شادی سے انکار پر شہزاد نے سونیا اور اُس کے والد کو جان سے مارنے کی دھمکیاں دیں۔ 30 نومبر 2020 کو سونیا کو صبح ساڑھے 9 بجے سر میں گولی مار کر قتل کیا گیا۔ جائے وقوع سے ملنے والی گولی کا خول ملزم سے برآمد ہونے والے پستول سے میچ کرگیا۔ درخواست گزار کے وکیل اور اسٹیٹ کونسل 25 سال قید سے متعلق پوچھنے پر کوئی قابل جواز پیش نہ کر سکے۔

اسلام آباد ہائی کورٹ نے فیصلے میں کہا کہ ٹرائل کورٹ نے فیصلے میں قتل کے مقصد، گواہوں کی شہادت اور جائے وقوعہ سے ملنے والے شواہد کو تسلیم کیا۔ ٹرائل کورٹ حتمی پیراگراف میں 25 سال قید بامشقت کی سزا دینے کا جواز پیش نہیں کر سکی۔ ملزم کو دی جانے والی سزا کی واضح وجوہات بیان کرنا ٹرائل کورٹ کی بنیادی ذمہ داری ہے۔ ٹرائل کورٹ نے ملزم کو سیکشن 302 سی کے تحت 25 سال قید بامشقت کی سزا سنائی۔ 302 سی کے تحت سزا صرف ان کیسز میں دی جا سکتی ہے جہاں قصاص کی سزا نہ دی جا سکتی ہو۔ سزا کا فیصلہ کالعدم قرار دے کر کیس دوبارہ فیصلے کیلئے ریمانڈ بیک کیا جاتا ہے۔

رواں برس سرکاری  اسکیم کے تحت حج اخراجات سے متعلق سیکرٹری مذہبی امور نے قائمہ کمیٹی اجلاس میں  تفصیلات بتا دیں۔

وزارت مذہبی امور کے کمیٹی روم میں قومی اسمبلی قائمہ کمیٹی برائے مذہبی امور کا اجلاس  ہوا، جس میں چیئرمین کمیٹی عامر ڈوگر نے کہا کہ ہر سال حج انتظامات میں بہتری آ رہی ہے۔نجی حج کمپنیاں وزارت کا حصہ ہیں، وزارت ان کی سرپرستی کرے۔

دورانِ اجلاس سیکرٹری مذہبی امور نے کہا کہ کوشش کر رہے ہیں حج اخراجات 11 لاکھ سے کم رہیں۔ سرکاری حج اسکیم میں 5 ہزار کا کوٹہ موجود ہے، چند دن تک مزید درخواستیں لیں گے۔ منیٰ میں ہر میٹرس پر مخصوص نمبر لگا کر حجاج کو الاٹ کیا جائے گا۔ انہوں نے بتایا کہ  گزشتہ سال 218 نجی کمپنیوں کے خلاف 764 شکایات موصول ہوئیں۔

قائمہ کمیٹی اجلاس میں پرائیویٹ حج آپریٹرز بھی شریک ہوئے۔ اس موقع پر بریفنگ میں بتایا گیا کہ 900 سے زائد  حج آپڑیٹرز ہیں ۔ 20 سال سے پرائیوٹ سیکٹر حج آپریشن میں شامل ہے۔

وزارت کی جانب سے اجلاس میں کہا گیا کہ پرائیویٹ سیکٹر کے پیکیج کو کم کیا جائے۔

پرائیویٹ حج آپریٹرز نے کہا کہ  دوسرے مشن سعودی عرب میں لانگ ٹرم معاہدے کرتے ہیں۔ ہم نے وزارت سے کہا کہ ہمیں سعودی حکام سے معاہدے کی اجازت دی جائے تاکہ ہمارے ریٹ نیچے آ سکیں ۔ سعودی حکومت نے کہا کہ ایک آپریٹر کا کوٹہ 2 ہزار  حجاج ہونا چاہیے۔

وزارت کی جانب سے اجلاس میں کہا گیا کہ سعودی حکام تو 3ہزار کا کوٹہ کا کہ رہے تھے ، ہم نے انہیں ابھی  روکا  ہے۔ اگلے سال یہ کوٹہ 2500 سے 3ہزار ہو جائے گا ۔ کچھ سال میں ہم پالیسی بنا کر کوٹہ ہی ختم کر دیں  گے۔ کابینہ نے ہمیں کہا ہے کہ ایسی پالیسی بنائیں جو سعودی حکام کی طرز پر ہوں ۔ ہم کسی کا بزنس ختم نہیں کر رہے ۔ حاجیوں کو بھیڑ بکریوں کی طرح بیچا جاتا ہے۔ ایک کمپنی دوسری کمپنی کو حاجی بیچ دیتی ہے۔

دفتر خارجہ  کی سابق ترجمان ممتاز زہرہ بلوچ کو فرانس میں پاکستان کا سفیر مقرر کردیا گیا ہے۔

نائب وزیراعظم اور وزیر خارجہ اسحاق ڈار نے وفاقی دارالحکومت میں میڈیا بریفنگ کے دوران بتایا کہ ممتاز زہرہ بلوچ کو فرانس میں پاکستان کا سفیر مقرر کردیا گیا ہے۔

دوسری جانب ممتاز زہرہ بلوچ کی تقرری کا نوٹی فکیشن بھی جاری کردیا گیا ہے۔

واضح رہے کہ سینئر سفارت کار شفقت علی خان کو دفترخارجہ کا نیا ترجمان مقررکیا گیا ہے، اس حوالے سے گزشتہ روز نوٹی فکیشن جاری کردیا گیا تھا۔رپورٹس کے مطابق شفقت علی خان ایڈیشنل سیکرٹری خارجہ برائے یورپ تعینات تھے۔ اس سے قبل روس میں بطور سفیرپاکستان تعینات رہے اور پولینڈ میں بھی پاکستانی سفیر کے طور پر کام کرچکے ہیں۔

محکمہ اینٹی کرپشن خیبرپختونخوا نے خیبر ٹیچنگ اسپتال پشاور میں گھوسٹ ملازمین کے جعلی بینک اکاؤنٹس کے ذریعے خزانے کو 48 لاکھ 38 ہزار روپے کے نقصان کا انکشاف کیا ہے۔

ایکسپریس نیوز کے مطابق خیبر ٹیچنگ اسپتال پشاور میں گھوسٹ ملازمین کے لیے جعلی اکاؤنٹس بنانے کی رپورٹ پر اینٹی کرپشن خیبرپختونخوا نے کارروائی کی۔ رپورٹ میں بتایا گیا کہ گھوسٹ ملازمین کے لیے جعلی اکاؤنٹس کھولے گئے ہیں جس کے ذریعے تنخواہیں نکالی گئیں۔

جعلی اکاؤنٹس کے ذریعے خزانے کو 48 لاکھ 38 ہزار 302 روپے کا نقصان پہنچانے کا انکشاف ہوا ہے۔

پولیس نے ملزمان زرغون شاہ ولد گلوب شاہ، سید حارث شاہ ولد زرغون شاہ اور بینک ملازم اشفاق ندیم ولد عبداللہ جان کے خلاف ایف آئی آر درج کرلی ہیں، ملزم زرعون شاہ کو گرفتار کرلیا گیا ہے جب کہ مزید گرفتاریوں کے لیے کوششیں جاری ہی