چٹاگانگ کنگز کے کپتان محمد مٹھن نے اپنے مخالف ہم منصب مہدی حسن میراز کی تعریف کی جب کہ ٹام او کونل کو واپس بلایا جو منگل کو ڈھاکا میں کھلنا ٹائیگرز کے خلاف  بنگلہ دیش پریمئر لیگ (بی پی ایل) میچ کے دوران ٹائم آؤٹ ہو گئے تھے۔

معروف کرکٹ ویب سائٹ کرک انفو کی رپورٹ کے مطابق چٹاگانگ کے 204 رنز ہدف کے تعاقب کے دوران 3 منٹ کے وقفے کے بعد آسٹریلوی لیگ اسپنر ٹام او کونل بیٹنگ کے لیے میدان میں آئے جس پر فیلڈنگ کپتان مہدی حسن میراز اپنی ٹیم کے کئی ساتھیوں کے ساتھ امپائر کے پاس گئے اور تاخیر کے بارے میں بات کی۔

اس پر گراؤنڈ میں موجود امپائرز نے او کونل کو آؤٹ قرار دیا اور جب وہ پویلین لوٹنے لگے تو مہدی حسن میراز نے انہیں واپس بلا لیا۔

مخالف کپتان محمد متھن  نے تسلیم کیا کہ آؤٹ قرار دیا جانا ٹھیک تھا اور کہا کہ وکٹیں تیزی سے گرنے کی وجہ سے او کونل حیران تھے اور نمبر 7 پر بیٹنگ کرنے کے لیے آنے کے باوجود ان کے پاس تیار ہونے کے لیے کافی وقت نہیں تھا۔

انہوں نے کہا کہ میں ذاتی طور پر محسوس کرتا ہوں کہ مہدی حسن میراز نے شاندار کام کیا، اس نے دکھایا کہ ان کا دل بڑا ہے، فیلڈنگ سائیڈ کی طرف سے اپیل کرنا اصولوں کے مطابق ہے، او کونل کو بیٹنگ کے لیے واپس بلانے کا سہرا مہدی حسن میراز کو جاتا ہے۔

او کونل کی بیٹنگ کی باری اس وقت آئی جب پاکستانی بلے باز حیدر علی دوسری گیند پر صفر پر آؤٹ ہوگئے، چٹاگانگ کا اسکور اس وقت ساتویں اوور میں 5 وکٹ پر 56 رنز تھا، بعد میں او کونل گولڈن ڈک پر آؤٹ ہوگئے، وہ شارٹ مڈ وکٹ پر پاکستانی اسپنر محمد نواز کی گیند پر کیچ آؤٹ ہوئے جہاں مہدی حسن نے ان کا آسان کیچ لیا۔

کھلنا ٹائیگرز نے چٹاگانگ کنگز کو 37 رنز سے شکست دے دی۔

بنگلہ دیش پریمیئر لیگ میں 11 سیزن کے آغاز پر معاوضوں کی عدم ادائیگی کا مسئلہ سر اٹھانے لگا۔

دربار راجشاہی کے کپتان انعم الحق بجوئے نے انکشاف کیا کہ پلیئرز نے ابھی تک رواں ایڈیشن کا ابتدائی معاوضہ حاصل نہیں کیا ہے۔

ایونٹ قواعد و ضوابط کے تحت فرنچائزز کو ٹورنامنٹ شروع ہونے سے قبل ہی پلیئرز کو 50 فیصد معاوضہ ادا کریں گی، ایونٹ کے درمیان میں 25 فیصد اور باقی 25 فیصد ٹورنامنٹ کے اختتام پر ادا کیا جانا چاہیے۔

بی پی ایل میں معاوضوں کی عدم ادائیگی کا مسئلہ شروع سے رہا ہے، گذشتہ ایڈیشن کے 2 فرنچائزز کے بقایاجات بنگلہ دیش بورڈ نے خود سے  ادا کیے ۔

بریشال سے پہلے میچ میں شکست کے بعد راجشاہی کے کپتان انعم نے کہا کہ ہمیں ابھی تک کوئی معاوضہ نہیں ملا مگر چونکہ ایونٹ ابھی شروع ہوا، اس لیے ہم سوال اٹھا کر پیچیدگی پیدا نہیں کرنا چاہتا ہے۔

کرکٹ میں تلخ وشیریں یادیں دے کر 2024 کا آخری سورج بھی غروب ہو گیا۔

گذشتہ سال پاکستان کرکٹ ٹیم کی مختلف فارمیٹس میں کارکردگی اتار چڑھاؤ کا شکار رہی، ٹیسٹ میں انگلینڈ کو ہوم سیریز میں شکست دی مگر مجموعی کارکردگی مایوس کن رہی اور 7 میچز میں2 ہی فتوحات ہاتھ آئیں،سعود شکیل نے سب سے زیادہ 544 رنز بنائے، ساجد خان نے 22 وکٹیں لیں۔

ون ڈے انٹرنیشنل میں ٹیم چھا گئی اور تینوں سیریز سمیت 7 میچز جیتے، صائم ایوب نے515 رنز اسکور کیے، شاہین آفریدی نے 15 وکٹیں لیں۔

البتہ ٹی ٹوئنٹی میں مسلسل ناکامیوں نے شائقین کو مایوس کیا، 27 میچز میں سے صرف 9 میں کامیابی ملی جبکہ 16 میں شکست ہوئی۔

تفصیلات کے مطابق رواں برس پاکستانی ٹیم نے مجموعی طور پر 7 ٹیسٹ میچز کھیلے، ان میں سے 2 میں کامیابی حاصل کی جبکہ 5 میں شکست کا سامنا کرنا پڑا،مجموعی طور پر چار ٹیسٹ سیریز کھیلیں، ان میں سے2 میں ناکامی ہوئی، ایک میں فتح حاصل کی ، جنوبی افریقہ میں جاری سیریز کے پہلے سنچورین ٹیسٹ میں 2 وکٹ سے ناکامی کا سامنا کرنا پڑا۔

پاکستان نے آسٹریلیا کے خلاف تین میچز کی سیریز کھیلی، جس میں تمام میچز میں میزبان نے فتح حاصل کی، بنگلہ دیش کے خلاف 2میچز کی سیریز گرین کیپس کے لیے مایوس کن رہی جس میں حریف نے تاریخی کامیابی سمیٹی۔

انگلینڈ کے خلاف تین میچز کی سیریز پاکستان کے لیے کامیاب ثابت ہوئی، جہاں پاکستان نے 1-2سے فتح حاصل کی۔ رواں سال سعود شکیل 7 میچز میں544 رنز بنا کر ٹاپ بیٹر رہے،محمد رضوان نے 539 اور سلمان علی آغا نے 454 رنز بنائے، ایک اننگز میں سب سے زیادہ رنز بنانے کا اعزاز محمد رضوان کے نام رہا، انھوں نے ناقابل شکست 171 رنز بنائے، ساجد خان نے سب سے زیادہ 22 وکٹیں حاصل کیں۔

نعمان علی 20 وکٹوں کے ساتھ دوسرے جبکہ خرم شہزاد 13 وکٹوں کے ہمراہ تیسرے نمبر پر رہے۔وکٹ کیپر محمد رضوان نے22 کیچز تھامے۔

پاکستان کرکٹ ٹیم نے 2024 کے ون ڈے انٹرنیشنل سیزن میں شاندار کارکردگی کا مظاہرہ کرتے ہوئے تین سیریز میں کامیابی اپنے نام کی ،گرین شرٹس نے آسٹریلیا، زمبابوے اور جنوبی افریقہ کو زیر کیا،آسٹریلیا کے خلاف تین میچز کی سیریز میں پاکستان نے 1-2 سے کامیابی حاصل کی۔

اسی طرح زمبابوے میں بھی ٹیم نے 1-2 سے سیریز اپنے نام کی،قومی ٹیم کی جنوبی افریقہ کے خلاف کارکردگی مزید متاثر کن رہی، پاکستان نے میزبان کو 3 میچز کی سیریز میں 0-3 سے کلین سویپ کیا۔

رواں برس صائم ایوب سب سے زیادہ رنز بنانے والے کھلاڑی ثابت ہوئے، انھوں نے 9 میچز میں 515 رنز بنائے، ان میں تین سنچریاں اور ایک ففٹی شامل ہے،ان کا بہترین اسکور 113 ناٹ آئوٹ اور اوسط 64.37 رہی، محمد رضوان 264، بابر اعظم 228 اور سلمان علی آغا 209 رنز بنانے میں کامیاب رہے۔

شاہین شاہ آفریدی نے 6 میچز میں 15 وکٹیں حاصل کیں، حارث روف نے 8 میچز میں 13 شکار کیے، سلمان علی آغا نے9 میچز میں 11 اور ابرار احمد نے چار میچز میں 10 وکٹیں حاصل کیں، نسیم شاہ نے بھی6 میچز میں 10 شکار کیے۔2024 میں قومی ٹیم نے 27 ٹی ٹوئنٹی میچز کھیلے، ان میں صرف 9 میں کامیابی ملی جبکہ 16 میچز میں شکست ہوئی اور 2 برابر رہے،ورلڈکپ میں امریکا سے بھی شکست ہوئی، ٹیم پہلے مرحلے تک محدود رہی ۔