بالی وڈ کی نامور اداکارہ منیشا کوئرالہ ویسے تو اب فلموں میں بہت کم نظر آتی ہیں لیکن سوشل میڈیا پر خاصی متحرک ہیں۔

حال ہی میں ان کی ایک ایسی تصویر انسٹاگرام پر پوسٹ کی گئی ہے جسے دیکھ کر مداح چونک اٹھے اور انہیں پہچاننے سے ہی انکاری ہوگئے کیونکہ اس تصویر میں 54 سالہ اداکارہ 30 سال کی لگ رہی تھیں۔

اداکارہ منیشا کوئرالہ سوشل میڈیا، خاص طور پر انسٹاگرام پر کافی سرگرم رہتی ہیں، جہاں وہ اپنے مداحوں کو اپنی زندگی کی جھلکیاں دکھاتی رہتی ہیں۔

چاہے وہ ورزش کر رہی ہوں، دوستوں سے ملاقات کر رہی ہوں یا کیمرے کے سامنے پوز دے رہی ہوں، منیشا کی ہر پوسٹ لوگوں کی توجہ حاصل کرتی ہے۔

حال ہی میں انہوں نے اپنا نیا ہیئر اسٹائل متعارف کرایا،جس نے مداحوں کو حیران کر دیا ہے۔

منیشا کوئرالہ کا ہیئر میک اوور

نیپال کے ایک مشہور بیوٹی سیلون نے انسٹاگرام پر اپنے پیج پر ایک ویڈیو شیئر کی جس میں منیشا کوئرالہ کے نئے انداز کی جھلک دکھائی گئی۔

اس ویڈیو میں وہ بال کٹواتی اور میک اپ کرواتی نظر آئیں، جب ان کا نیا ہیئر اسٹائل مکمل ہوا تو انہوں نے مسکرا کر اشارہ دیا کہ انہیں یہ انداز بہت پسند آیا۔

ویڈیو میں منیشا سفید رنگ کی قمیص اور بیج رنگ کی پینٹ میں نظر آئیں اور مختلف زاویوں سے کیمرے کے سامنے پوز دیتی رہیں۔

اس پوسٹ کے کیپشن میں لکھا تھا کہ ایک لازوال حسن اور حوصلے کی علامت ہماری حسین منشیا کا میک اوور۔

منیشا نے اس پوسٹ پر تبصرہ کرتے ہوئے لکھا کہ ہیئر میک اوور کے لیے شکریہ، راجیش۔

مداحوں کا ردعمل

منیشا کے نئے انداز نے ان کے مداحوں کو دیوانہ بنا دیا، ایک مداح نے لکھا کہ آپ بہت جوان اور خوبصورت لگ رہی ہیں، ایک اور نے تبصرہ کیا کہ یہ ہیئر اسٹائل آپ پر بہت جچ رہا ہے،ایک پرستار نے کہا کہ آپ واقعی ایک نایاب حسن کی مالک ہیں۔

کسی نے منیشا کو 90 کی دہائی کی خوبصورتی قرار دیا، تو ایک اور صارف نے لکھا کہ انہوں نے پھر سے 30 سال کی عمر کیسے اختیار کر لی؟

عمر کے طعنے اور منیشا کی رائے

اس سال کے آغاز میں منیشا نے فری پریس جرنل سے گفتگو کرتے ہوئے خواتین کو عمر کے حوالے سے دی جانے والی تنقید اور سوشل میڈیا پر ملنے والے طعنوں پر بات کی تھی۔

منیشا نے کہا تھا کہ چاہے فلم انڈسٹری ہو یا عام زندگی، عمر رسیدگی خواتین کے لیے ایک مسئلہ ہے، ہمیں شرمندہ کیا جاتا ہے، میں نے کبھی کسی مرد اداکار کو یہ کہتے نہیں سنا کہ وہ بوڑھا ہو گیا ہے لیکن خواتین کو بہت کچھ سننا پڑتا ہے، عمر کو نیچا دیکھنے کا رجحان عام ہے، مجھے ایک مرتبہ ایک راؤنڈ ٹیبل گفتگو سے باہر کر دیا گیا، وجہ یہ دی گئی کہ یہ خاص عمر کے لوگوں کے بارے میں تھی۔

منیشا کا آخری پروجیکٹ

منیشا کو آخری بار سنجے لیلا بھنسالی کی ویب سیریز’ ہیرا منڈی: دی ڈائمنڈ بازار‘ میں دیکھا گیا۔

یہ تاریخی ڈراما بھارت کی آزادی کی تحریک کے دور میں لاہور کے علاقے ہیرا منڈی میں قائم کوٹھوں کی زندگی پر مبنی ہے۔

اس سیریز میں سوناکشی سنہا، ادیتی راؤ حیدری، رچا چڈھا، سنجیدہ شیخ، شارمین سیگل، اور طحٰہ شاہ بدوشہ جیسے اداکار شامل تھے۔

یہ سیریز مئی 2024 میں نیٹ فلکس پر ریلیز ہوئی اور جون 2024 میں اس کا دوسرا سیزن بھی منظور کر لیا گیا تھا، فی الحال منیشا نے کسی نئے پروجیکٹ کا اعلان نہیں کیا۔

کرشمہ کپور کے سابق شوہر اور سونا کومسٹار کے چیئرمین سنجے کپور کی آخری تصویر سوشل میڈیا پلیٹ فارم پر سامنے آئی ہے۔

فوٹو اینڈ ویڈیو شیئرنگ پلیٹ فارم انسٹاگرام پر سوجن انڈین ٹائیگرز پولو ٹیم نے یہ تصویر شیئر کی، تصویر میں سنجے خآصے پرجوش اور خوش دکھائی دے رہے تھے، انہوں نے گہرے نیلے رنگ کی جرسی پہن رکھی تھی اور وہ مسکراتے ہوئے ساتھی جیسل سنگھ کی گردن میں بازو ڈالے نظر آئے۔

اس تصویر کے کیپشن میں لکھا گیا کہ ‘آج ہم اپنے پیارے دوست سنجے کپور کی یاد میں کارٹیئر ٹرافی کا فائنل کھیل رہے ہیں، جن کا کچھ روز قبل میدان میں افسوسناک طور پر انتقال ہو گیا تھا، ہمارے کپتان اور سرپرست، جیسل سنگھ بھی اپنے پیارے پرانے دوست سنجے کے اعزاز میں ایک منٹ کی خاموشی اختیار کرنے کے لیے ٹیم کے ساتھ میدان میں کھڑے ہوں گے لیکن بطور احترام وہ میچ میں شرکت نہیں کریں گے۔

نوٹ میں بتایا گیا کہ ‘سنجے اور جیسل کی یہ تصویر کچھ دن پہلے سیمی فائنل کھیلنے کے لیے تیار ہونے سے چند لمحے قبل لی گئی تھی، سنجے؛ آپ بہت یاد آئیں گے، آپ کے انتھک جوش اور سرپرستی کو پوری پولو کمیونٹی ہمیشہ کے لیے یاد رکھے گی’۔

اس پوسٹ پر ردعمل ظاہر کرتے ہوئے، ایک شخص نے لکھا کہ ‘پولو کے لیے زبردست جذبہ رکھنے والا ایک سچا شریف انسان، انہیں بہت یاد کیا جائے گا’ ایک اور تبصرے میں لکھا تھا کہ سنجے، آپ کے بغیر زندگی پہلے جیسی نہیں ہوگی’۔

خیال رہے کہ 53 سالہ سنجے کپور کا انتقال 12 جون کو پولو کھیلتے ہوئے انگلینڈ میں ہوا تھا۔

ان کے دوست سہیل سیٹھ نے نیوز ایجنسی اے این آئی سے بات کرتے ہوئے ان کی موت کے بارے میں بتایا تھا کہ صنعتکار کی موت دل کا دورہ پڑنے سے ہوئی جس کی وجہ کھیل کے دوران ان کے منہ میں جانے والی شہد کی مکھی بنی۔

خیال رہے کہ 2003 میں شادی کرنے والے سنجے اور کرشمہ کپور 2005 میں بیٹی سمیرا اور 2011 میں بیٹے کیان کے والدین بنے تھے۔

2014 میں کرشمہ اور سنجے نے باہمی رضامندی سے طلاق کے لیے درخواست دائر کی اور ان کی طلاق 2016 میں طے پائی۔ علیحدگی کے بعد سنجے نے پریا سچدیو سے شادی کرلی تھی جن سے ان کا ایک بیٹا ہے۔

بگ باس 17 سے شہرت حاصل کرنے والی بھارتی اداکارہ منارا چوپڑا کے والد رمن رائے ہنڈا  72 برس کی عمر میں چل بسے۔

بھارتی میڈیا رپورٹ کے مطابق عالمی شہرت یافتہ اداکارہ پریانکا چوپڑا اور پرینیتی چوپڑا کے انکل اور انکی کزن منارا چوپڑا کے والد آج بروز 16 جون انتقال کرگئے جو گزشتہ کئی روز سے شدید علیل تھے۔

والد کے انتقال کی افسوسناک خبر منارا چوپڑا نے خود فوٹو اینڈ ویڈیو شیئرنگ ایپ انسٹاگرام پر اسٹوری کی صورت میں دی جہاں انہوں نے والد کی تصویر کیساتھ انکے انتقال پر غم کا اظہار کیا اور اُن کے آخری رسومات کی تفصیلات بھی شیئر کیں۔

منارا نے اپنی اسٹوری میں لکھا کہ،‘بے حد دکھ اور افسوس کے ساتھ ہم اطلاع دے رہے ہیں کہ ہمارے پیارے والد 16 جون 2025 کو ہمیں چھوڑ کر خالقِ حقیقی سے جا ملے۔ وہ ہمارے خاندان کا مضبوط سہارا تھے۔’

انہوں نے والد کی آخری رسومات کے بارے میں آگاہ کرتے ہوئے مزید یہ بھی لکھا کہ،‘ آخری رسومات 18 جون 2025 کو امبولی، اندھیری ویسٹ کے شمشان گھاٹ میں ادا کی جائیں گی۔’

والد کو کھودینے کے بعد منارا چوپڑا اور ان کے اہلِ خانہ اس وقت غم کی کیفیت میں مبتلا ہیں کیونکہ وہ اپنے والد کے اچانک انتقال کا صدمہ جھیل رہے ہیں۔

واضح رہے کہ رامن رائے ہنڈا دہلی میں اپنے اہلِ خانہ کے ساتھ مقیم تھے اور  گزشتہ کچھ دنوں سے علیل تھے اور اب انکے انتقال کرجانے کے بعد سوگوران میں بیوی کامنی چوپڑا اور بیٹیاں منارا اور متیلی ہیں۔

 اگرچہ اُن کی موت کی اصل وجہ تاحال سامنے نہیں آئی، لیکن اس افسوسناک خبر نے مداحوں اور قریبی لوگوں کو گہرے صدمے میں مبتلا کردیا ہے۔

منارا چوپڑا کون؟

یاد رہے کہ منارا چوپڑا نے بھارت کے سب سے بڑے ریئلٹی شو ’بگ باس 18’ میں شرکت کے بعد بے پناہ مقبولیت حاصل کی،کیونکہ اس شو میں انکے خوش مزاج اور دوستانہ انداز نے لاکھوں لوگوں کو گرویدہ بنایا۔

بگ باس میں شرکت سے قبل، منارا کئی تامل، تیلگو، ہندی اور کنڑا فلموں میں اداکاری کر چکی ہیں۔

علاوہ ازیں حال ہی میں، وہ ریئلٹی شو لافٹر شیفس میں ایک کنٹسٹنٹ کے طور پر نظر آئیں، تاہم انہوں نے شو کے درمیان میں ہی شو کو چھوڑ دیا اور مکمل سیزن کا حصہ نہیں بن سکیں۔

منارا چوپڑا کس سے شادی کریں گی؟

منارا چوپڑا نے حال ہی میں فلمی گیان کو ایک انٹرویو دیا، جس میں ان سے سوال کیا گیا کہ آپ کی کزن بہن پریانکا کی شادی ہو گئی اور میرا بھی جلد شادی کے بندھن میں بندھنے والی ہیں تو آپ کب تک شادی کرنے کا ارادہ رکھتی ہیں؟

سوال کا جواب دینے سے پہلے منارا کھلکھلا کر ہنسی اور کہنے لگیں کہ میرا تو ابھی شادی کا کوئی ارادہ نہیں لیکن ہاں یہ سوال بگ باس کے دوران اور بگ باس کے بعد اتنا پوچھا گیا ہے کہ اب میں اس کا جواب دینا چاہتی ہوں کہ ‘میں اس شخص سے شادی کروں گی جو عقل مند ہو اور دنیا جہان کی  معلومات ہو’۔

اپنی بات کی وضاحت پیش کرتے ہوئے انہوں نے کہا کہ میری شخصیت بھی ایسی ہی ہے کہ مجھے جتنی زبانیں بولنا آتی ہیں ، اگر کوئی اس زبان کے بولنے والا شخص مل گیا تو میں اس سے اس ہی کی مادری زبان میں گفتگو کرتی ہوں جیسا کہ بگ باس میں تہلکا بھائی سے پنجابی میں اور ارون سے تلگو میں اکثر ہم کلام ہوا کرتی تھی۔