سلام آباد(نامہ نگار خصوصی )چیئرمین پیپلز پارٹی بلاول بھٹو زرداری کے بیان پر وفاقی وزیر مواصلات عبدالعلیم خان نے اگلے ماہ سکھر حیدرآبادا
موٹروے ایم 6 کی تعمیر کے آغاز کی خوشخبری دے دی ہے جس کے لیے ابتدائی کام تیزی سے جاری ہے اور نومبر میں ایم 6 کی تعمیر کا باقائدہ سنگ بنیاد رکھا جائے گا۔ ایکس پر جاری اپنے بیان میں وفاقی وزیر مواصلات عبدالعلیم خان نے کہا ہے کہ30 برسوں سے التوا میں پڑی ہوئی موٹروے کی تعمیر شروع ہونے جا رہی ہے اور اللہ تعالی کا کرم ہے کہ ایم 6 موٹروے جیسے تاریخی منصوبے کو عملی شکل دینے کا موقع مل رہا ہے۔عبدالعلیم خان نے مزید کہا کہ موٹروے ایم 6 سندھ سمیت پاکستان بھر میں تجارتی سرگرمیوں کو نئی رفتار دے گی،جبکہ یہ موٹروے ملک کی معاشی ترقی اور علاقائی رابطوں کے فروغ میں بھی اہم کردار ادا کرے گی۔وفاقی وزیر مواصلات عبدالعلیم خان نے کہا کہ صدر مملکت آصف علی زرداری،وزیراعظم محمد شہباز شریف اور چیئرمین پیپلز پارٹی بلاول بھٹو زرداری کو سکھر حیدرآباد موٹروے کی سنگ بنیاد کی تقریب میں خصوصی طور پر مدعو کریں گے جبکہ وزیر اعلی سندھ اور ان کی صوبائی کابینہ کے معزز اراکین کو بھی اس موقع پر شرکت کی خصوصی دعوت دی جائے گی۔وفاقی وزیر مواصلات عبدالعلیم خان نے ایکس پر اپنے پیغام میں موٹروے ایم 6منصوبے کو صوبہ سندھ اور پاکستان کی ترقی کے لیے اہم سنگ میل قرار دیا ہے۔
