اسرائیلی فوج کی زیرِ حراست فلسطینی شہری دل کا دورہ پڑنے سے جاں بحق، 2 فلسطینی بچے گرفتار

غزہ (آئی این پی )مقبوضہ مغربی کنارے
میں فلسطینی شہری اسرائیلی فوجی چیک پوسٹ پر وران حراست دل کا دورہ پڑنے سے جاں بحق ہوگیا جبکہ اسرائیلی فورسز نے نابلس کے مغرب میں واقع گائو ں دِیر شرف پر چھاپہ مار کر دو فلسطینی بچوں کو گرفتار کرلیا۔فلسطینی ہلالِ احمر کے مطابق 45 سالہ رفت خیری ابو خلیل کو طولکرم کے مشرق میں واقع عناب چیک پوسٹ پر روکا گیا تھا، جہاں ان کی طبیعت بگڑ گئی، ان کی میت کو طولکرم کے سرکاری ہسپتال منتقل کر دیا گیا۔فلسطینی خبر رساں ادارے وفا کے مطابق ابو خلیل اریحا میں فلسطینی ملٹری ٹریننگ اتھارٹی میں کپتان کے عہدے پر تعینات تھے، ان کی موت ایسے وقت میں ہوئی جب مقبوضہ مغربی کنارے میں فلسطینیوں کی نقل و حرکت پر بڑھتی پابندیوں پر تشویش میں اضافہ ہو رہا ہے۔اقوام متحدہ کی خصوصی نمائندہ فرانسسکا البانیزے کے مطابق چیک پوسٹوں، دروازوں اور سڑکوں پر رکاوٹوں کا بڑھتا نظام فلسطینیوں کی ملازمت، علاج، تعلیم اور خاندانی زندگی تک رسائی متاثر کر رہا ہے۔ادھر فلسطینی خبر رساں ادارے وفا کے مطابق اسرائیلی فورسز نے پیر کی صبح گائو ں میں داخل ہوکر متعدد گھروں کی تلاشی لی اور دو کمسن بچوں کو حراست میں لے لیا۔وفا کے مطابق گرفتار کیے جانے والے بچوں کی شناخت کریم مرعی موسی اور فاروق انمار نوفل کے نام سے ہوئی ہے۔