ہاتھ سے بنے قالینوں کی عالمی نمائش آج سے لاہور میں شروع ہوگی

لاہور (این این آئی) ٹریڈ ڈویلپمنٹ اتھارٹی پاکستان (ٹڈیپ) اور پاکستان کارپٹ مینو فیکچررز
اینڈ ایکسپورٹرز ایسوسی ایشن کے زیراہتمام ہاتھ سے بنے قالینوں کی تین روزہ عالمی نمائش آج (منگل) سے لاہور کے مقامی ہوٹل میں شروع ہو گی۔ 6 سے8 اکتوبر تک جاری رہنے والی عالمی نمائش میں دنیا کے مختلف ممالک سے 100سے زائد خریدار شرکت کریں گے۔ چیئرمین ایگزیبیشن ریاض احمد کے مطابق نمائش میں ہاتھ سے بنے قالینوں کے مینو فیکچررز اور ایکسپورٹرزکی جانب سے انتہائی معیاری اور دیدہ زیب ڈیزائنوں سے مزین ہاتھ سے بنے قالینوں اور دیگر مصنوعات کے سٹالز لگائے جائیں گے۔ انہوں نے کہا کہ عالمی خریداروں، پاکستانی مینو فیکچررز اور برآمد کنندگان کے درمیان بی ٹو بی ملاقاتوں کا خصوصی اہتمام کیا جائے گا تاکہ برآمدی آرڈرز کے حصول اور نئی عالمی منڈیوں تک رسائی کے امکانات کو بڑھایا جا سکے۔