پاک فوج ملکی دفاع اور استحکام کی مضبوط علامت ہے، عمر مغل

اسلام آباد(نامہ نگار خصوصی )مسلم لیگ(ن) حلقہ این اے 48 کے صدر عمر مغل نے کہا ہے کہ پاکستان کی سلامتی، خودمختاری اور قومی استحکام کے تحفظ میں پاک فوج کا کردار بنیادی اہمیت رکھتا ہے۔ موجودہ دور میں قومی دفاع کے ساتھ ساتھ دہشت گردی کے خلاف کارروائیوں، ملکی معیشت کے استحکام اور قومی اداروں کے درمیان مثر رابطہ کاری کی ضرورت پہلے سے کہیں زیادہ ہے۔
قومی اسمبلی میں خطاب کرتے ہوئے عمر مغل نے کہا کہ پاک فوج ملکی دفاع اور سلامتی کے تقاضوں کے مطابق اپنی ذمہ داریاں ادا کر رہی ہے۔ دہشت گردی کے خلاف جنگ میں افواج پاکستان اور دیگر قانون نافذ کرنے والے اداروں کے اہلکاروں اور افسران کی قربانیوں کے لیے باعثِ احترام ہیں۔ پاکستان کی معاشی مضبوطی بھی قومی سلامتی کا اہم حصہ ہے۔انہوں نے کہا کہ معاشی استحکام، سرمایہ کاری کے فروغ، کاروباری سرگرمیوں میں اضافے، روزگار کے مواقع اور ملکی وسائل کے مثر استعمال کے لیے سازگار ماحول پیدا کرنا پوری قوم کی مشترکہ ذمہ داری ہے۔ پاکستان کی دفاعی سفارت کاری میں دوست اور برادر ممالک کے ساتھ تعاون، مشترکہ مشقیں اور دفاعی روابط کا فروغ بھی قابلِ تحسین ہے۔عمر مغل نے کہا کہ دفاعی تعاون اور دفاعی استعداد بڑھانے کے باعث پاکستان کے روایتی تعاون سمیت بین الاقوامی سطح پر دفاعی روابط کو تقویت مل رہی ہے۔ مسلم لیگ (ن) حلقہ این اے 48 اور تنظیم مسلم لیگ پاکستان کے صدر کا کہنا تھا کہ قومی دفاع صرف سرحدوں کی حفاظت تک محدود نہیں بلکہ امن، معاشی استحکام، قومی یکجہتی اور اداروں کے باہمی تعاون کی بھی بنیادی ضرورت ہے۔
انہوں نے کہا کہ پاکستان کو مضبوط ریاست بنانے کے لیے سیاسی اختلافات کو اپنی جگہ رکھتے ہوئے ملکی سلامتی، خودمختاری اور قومی مفاد جیسے معاملات پر پوری قوم کا اتحاد ضروری ہے۔