راولپنڈی(خصوصی رپورٹر)انسداد دہشت گردی راولپنڈی کی خصوصی عدالت نے تھانہ پیرودھائی کے مشہور سدرہ عرب قتل کیس میں
پراسیکیوشن کی جانب سے 10 ملزمان کی ضمانت منسوخی کی درخواستوں پر محفوظ فیصلہ 7 اکتوبر تک موخر کر دیا ہے گزشتہ روز سماعت کے موقع پر اجمل خان، ضیا الرحمان، خیال محمد، محمد سہیل، عبدالسلام، ثنا اللہ، عرب گل، گل بادشاہ، امیر خان اور سکندر پر مشتمل 10 ملزمان اپنے وکلا کے ہمراہ عدالت میں پیش ہوئے جبکہ مقدمہ کے تفتیشی افسر سمیت پراسیکیوشن ٹیم بھی عدالت میں موجود تھی پراسیکیوشن نے 10 ملزمان کی ضمانت منسوخی کے لئے عدالت سے رجوع کیا تھا عدالت نے فریقین کے وکلا کے دلائل اور سماعت مکمل ہونے پر فیصلہ محفوظ کیا تھا تاہم پیر کے روز عدالت نے ملزمان کی حاضری لگانے کے بعد دوسری مرتبہ فیصلہ موخر کردیا امکان ہے کہ فیصلہ اب 7 اکتوبر کو سنایا جائے گا جواں سال سدرہ عرب کو غیرت کے نام پر جرگے کے حکم پر قتل کر کے لاش رات کے اندھیرے میں دفنا کر قبر کے نشانات بھی مٹا دئیے گئے تھے پولیس نے مقدمہ میں جرگے کے سربراہ و مقامی مسلم لیگی رہنما کے علاوہ مقتولہ کے والد، بھائی اور چچا سمیت دیگر ملزمان کو نامزد کیا تھا جبکہ ملزمان نے ماتحت عدالت سے ضمانتیں حاصل کر رکھی تھی بعد ازاں مقدمے میں دہشت گردی کی دفعات شامل ہونے پر مقدمہ عدالت میں منتقل ہوا تھا جس پر پراسیکیوشن نے تمام ملزمان کی ضمانتیں منسوخ کر کے گرفتاری کے لئے عدالت سے رجوع کیا تھا۔
