ریاض ، صنعا، اسلام آباد( نیوز ایجنسیاں) سعودی اتحادی افواج اور یمنی فورسز کے حوثی ملیشیا کے خلاف جاری آپریشن فجر الیمن میں تعز شہر میں حوثی ملیشیا کے 250جنگجو ہلاک اور متعدد زخمی ہو گئے،جبکہ حوثیوں کے فوجی ترجمان نے دعویٰ کیا ہے کہ گروپ نے سعودی دارالحکومت ریاض میں کنگ خالد ائیرپورٹ اور رابغ میں آرامکو کی ریفائنری کو نشانہ بنایا ہے ۔ادھر وزیردفاع خواجہ آصف نے کہا ہے کہ اس وقت یمن میں لڑائی سعودی فوجیں لڑرہی ہیں جب کہ ترکیے اور پاکستان کی افواج سپورٹ کا کردار ادا کررہی ہیں۔ عالمی میڈیارپورٹس کے مطابق سعودی اتحادی افواج اور یمنی فورسز کا حوثی ملیشیا کے خلاف آپریشن فجر الیمن جاری ہے، تعز شہر میں حوثی ملیشیا کے 250جنگجو ہلاک اور متعدد زخمی ہو گئے ۔سعودی اتحادی افواج نے کہا ہے کہ صعدہ شہر میںحوثی ملیشیاکے بیلسٹک میزائلوں کے ذخیرے کو تباہ کر دیا، دارالحکومت صنعا میں بیلسٹک میزائل لانچر کو بھی تباہ کر دیا۔اتحادی افواج نے بتایا کہ حملوں کا مقصد باب المندب میں بحری آمدورفت کا تحفظ یقینی بنانا ہے، حوثی ملیشیا کے اسلحہ ڈپو،کشتیوں کے گودام اور سمندری بارودی سرنگیں بھی تباہ کر دیں۔سعودی اتحادی افواج نے کہا کہ الحدیدہ گورنریٹ میں بھی فوجی کارروائی کی، جنوبی بحیرہ احمر کے آبی راستوں پر ممکنہ حملوں کی سازش ناکام بنا دی گئی۔ادھر یمنی فورسز نے دعویٰ کیا ہے کہ حوثیوں نے ماریب صوبے جانے والے ایک امدادی ٹرک کو ڈرون حملے کا نشانہ بنایا جس کے نتیجے میں اس کا پاکستانی ڈرائیور ہلاک ہو گیا۔پاکستانی حکام کی جانب سے تاحال اس بارے میں کوئی بیان سامنے نہیں آیا ۔اس دوران سعودی عرب کے محکمہ ہوا بازی نے کہا ہے کہ نجران اور جازان کے ہوائی اڈوں کو نشانہ بنایا گیا جس کے نتیجے میں تین افراد زخمی ہوئے۔عرب نیوز کے مطابق منگل کو سول ایوی ایشن اتھارٹی کی جانب سے جاری ہونے والے بیان میں کہا گیا ہے کہ حملوں میں کچھ املاک کو بھی نقصان پہنچا جبکہ جو افراد زخمی ہوئے ان کے زخموں کی نوعیت معمولی ہے۔ دوسری جانب یمنی گروپ حوثیوں کے فوجی ترجمان نے دعوی کیا ہے کہ گروپ نے سعودی دارالحکومت ریاض میں کنگ خالد ائیرپورٹ اور رابغ میں آرامکو کی ریفائنری کو نشانہ بنایا۔حوثی فوجی ترجمان کے مطابق سعودی عرب کے ابہا ائیرپورٹ، خمیس مشیط ائیربیس اور نجران و جازان صوبوں میں بھی مختلف مقامات کو نشانہ بنایا گیا۔دریں اثناء وزیردفاع خواجہ آصف نے کہا ہے کہ اس وقت یمن میں لڑائی سعودی فوجیں لڑرہی ہیں جب کہ ترکیے اور پاکستان کی افواج سپورٹ کا کردار ادا کررہی ہیں۔ ایک انٹرویو میں وزیر دفاع نے کہا کہ اس وقت یمن میں حوثیوں نے پسپائی اختیار کی ہوئی ہے، یمن کی فوج نے کئی علاقوں کا کنٹرول واپس حاصل کرلیا ہے۔خواجہ آصف نے بتایا کہ مکہ دفاعی اتحاد کی میٹنگ یمن سے متعلق نہیں تھی، دفاعی اتحاد کے آرگنائزیشنل اسٹرکچر کو فارمولائز کیا گیا۔ ان کا کہنا تھا کہ پاکستان اور ترکیہ کی یہاں موجودگی ہے مگر اس وقت یمن میں لڑائی سعودی عرب کی فوجیں لڑرہی ہیں۔خواجہ آصف کا کہنا تھا کہ سعودی عرب کو جس قسم کی مدد کی ضرورت ہے مہیا کی جارہی ہے، اس وقت ترکیے اور پاکستان کی افواج سپورٹ کا کردار ادا کررہی ہیں۔
حوثی ہلاک
