DIG آپریشنز فیصل کامران کا روزانہ کھلی کچہری کا سلسلہ جاری

لاہور (کرائم رپورٹر) ڈی آئی جی آپریشنز فیصل کامران کی جانب سے شہریوں کی سہولت کے لیے روزانہ کھلی کچہری کا سلسلہ جاری ہے، جہاں شہریوں کی جانب سے پیش کی جانے والی درخواستوں پر فوری احکامات جاری کیے جا رہے ہیں۔ کھلی کچہری میں خاتون نے بیرون ملک مقیم شوہر کی جانب سے خرچہ نہ دینے کی شکایت کی، جس پر ڈی آئی جی آپریشنز نے ایس ایچ او شاہدرہ کو فریقین میں مصالحت کروانے کی ہدایت کی۔ پلاٹ پر قبضے کی شکایت پر ایس ایچ او ہیر کو قانونی کارروائی، وراثتی جائیداد میں حصہ نہ ملنے کی درخواست پر ایس ایچ او نولکھا کو مصالحت جبکہ رقم ادا کرنے کے باوجود گروی مکان نہ ملنے کی شکایت پر ایس ایچ او بھاٹی گیٹ کو کارروائی کا حکم دیا گیا۔ ایک شہری کی جانب سے ڈیڑھ کروڑ روپے ادا کرنے کے باوجود زمین نہ ملنے کی شکایت پر ایس ایچ او مناواں کو قانونی کارروائی کی ہدایت کی گئی۔ اسی طرح سود خوری کی شکایت پر ایس ایچ او فیکٹری ایریا کو بھی قانونی کارروائی کا حکم دیا گیا۔ ڈی آئی جی آپریشنز فیصل کامران نے کہا کہ شہریوں کے مسائل کا بروقت حل پولیس کی اولین ترجیح ہے، ہر درخواست پر میرٹ اور قانون کے مطابق کارروائی یقینی بنائی جا رہی ہے۔ شہری بلاخوف اپنی شکایات پیش کریں، انہیں فوری ریلیف فراہم کیا جائے گا۔