پنجاب کے تمام تعلیمی بورڈز کے فاضل فنڈز حکومت پنجاب کو منتقل کرنیکی تیاری کا انکشاف

لاہور (جنرل رپورٹر) پنجاب کے تمام تعلیمی بورڈز کے فاضل فنڈز حکومت پنجاب کو منتقل کرنے کی مبینہ تیاری کا انکشاف ہوا ہے۔ پنجاب ایجوکیشن بورڈز ایمپلائز ویلفیئر ایسوسی ایشن کے مطابق حکومت پنجاب، بورڈز کے فاضل فنڈز کسی بھی سرکاری محکمہ، ادارے، اتھارٹی یا حکومتی ملکیتی بورڈ کو منتقل کرنے کے لیے پنجاب بورڈز ایکٹ کی دفعات 22 اور 23 کے درمیان نیا سیکشن A-22 شامل کرنے کی سمری تیار کر رہی ہے۔ ایسوسی ایشن نے مجوزہ ترمیم کی شدید مخالفت کرتے ہوئے کہا ہے کہ پنجاب کے تمام تعلیمی بورڈز بورڈ آف انٹرمیڈیٹ اینڈ سیکنڈری ایجوکیشن ایکٹ 1976 کے تحت خودمختار ادارے ہیں اور حکومت سے کوئی مالی گرانٹ نہیں لیتے بلکہ اپنی آمدنی سے اخراجات پورے کرتے ہیں۔ بورڈز نے سالہا سال کی محنت اور بچت سے اپنے فاضل فنڈز جمع کیے ہیں۔ ایسوسی ایشن کا کہنا ہے کہ فاضل فنڈز کی منتقلی سے بورڈز کی مالی خودمختاری متاثر ہونے کا خدشہ ہے جس کے نتیجے میں امتحانات کے انعقاد، نتائج کی بروقت اشاعت، ملازمین کی تنخواہوں و پنشن اور اساتذہ کے معاوضوں کی ادائیگی سمیت دیگر معاملات میں مشکلات پیدا ہوسکتی ہیں۔ ایسوسی ایشن نے سوال اٹھایا ہے کہ جو تعلیمی بورڈز حکومتی گرانٹ کے بغیر اپنے اخراجات چلا رہے ہیں، ان کی سالہا سال کی بچت سرکاری سطح پر منتقل کرنے کی ضرورت کیوں پیش آئی؟ ایسوسی ایشن نے حکومت سے مطالبہ کیا ہے کہ مجوزہ ترمیم واپس لی جائے اور بورڈز کی مالی و انتظامی خودمختاری برقرار رکھی جائے۔