ہارٹ اٹیک خطرات کم کرنیوالی اہم دوا کے 10 بیچ غیرمعیاری نکل آئے

لاہور (جنرل رپورٹر) پنجاب میں مریضوں کو خون کے لوتھڑے بننے سے بچانے اور ہارٹ اٹیک و سٹروک کے خطرات کم کرنے کے لیے استعمال ہونے والی اہم دوا کے 10 بیچ غیر معیاری نکل آئے جس پر ڈائریکٹوریٹ آف ڈرگز کنٹرول پنجاب نے مذکورہ بیچز کی دوا کے استعمال پر پابندی عائد کر دی۔ ذرائع کے مطابق متعلقہ دوا کے نمونوں کی ڈرگ ٹیسٹنگ کے دوران مقررہ معیار پر پورا نہ اترنے کی نشاندہی ہوئی جس کے بعد محکمہ ڈرگز کنٹرول نے مخصوص بیچ نمبرز کی دوا کو فوری طور پر استعمال، فروخت اور تقسیم سے روکنے کی ہدایات جاری کی ہیں۔ دوا دل کے مریضوں سمیت ایسے افراد میں استعمال ہوتی ہے جنہیں خون کے لوتھڑے بننے کا خطرہ ہوتا ہے، اس لیے غیر معیاری بیچز کا مارکیٹ میں پہنچنا مریضوں کی جانوں سے متعلق سنگین سوال بن گیا ہے۔ ذرائع کا کہنا ہے کہ پابندی مخصوص بیچز تک محدود ہے تاہم معاملہ اس لحاظ سے اہم ہے کہ ایسی ادویات میں معیار کی معمولی خرابی بھی مریض کے علاج کے نتائج پر اثرانداز ہوسکتی ہے۔ سوال یہ بھی ہے کہ غیر معیاری دوا مارکیٹ تک پہنچنے سے پہلے معیار کی جانچ کے نظام میں خامی کہاں پیدا ہوئی اور ذمہ دار کون ہے ڈرگ کنٹرول حکام کی جانب سے متعلقہ بیچز کو مارکیٹ سے واپس اٹھانے اور ان کی سپلائی روکنے کے اقدامات کیے جا رہے ہیں، تاہم ماہرین کے مطابق صرف پابندی عائد کرنا کافی نہیں، بلکہ غیر معیاری دوا مارکیٹ میں پہنچنے کی ذمہ داری، سپلائی چین اور متعلقہ کمپنی کے خلاف کارروائی بھی شفاف طور پر سامنے لانا ضروری ہے۔