آئرس پورٹل پر کم از کم ٹیکس فارمولے کے غلط اطلاق نے مشکلات پیدا ہو رہی ہیں، پاکستان ٹیکس بار

لاہور (این این آئی) پاکستان ٹیکس بار ایسوسی ایشن نے کہا ہے کہ آئرس پورٹل پر کم از کم ٹیکس کے فارمولے کے غلط اطلاق نے ٹیکس دہندگان کے لیے سنگین مشکلات پیدا کر دی ہیں جس کا فوری ازالہ ضروری ہے، ٹیکس کی ذمہ داری کا تعین متعلقہ قانون اور مقررہ طریقہ کار کے مطابق ہونا چاہیے کسی بھی تکنیکی یا فارمولہ جاتی غلطی کے نتیجے میں ٹیکس دہندہ پر ایسی اضافی ذمہ داری عائد نہیں ہونی چاہیے جو قانون کے مطابق قابل وصول نہ ہو۔ صدر شیخ احسان الحق، جنرل سیکرٹری طاہر محمود بٹ، سینئر نائب صدر شیخ یاسین، نائب صدور عامر حنیف، شہباز قادر، رانا منظور حسین نے چیئرمین ایف بی آر کے نام لکھے گئے خط میں کہا ہے کہ ٹیکس بارز کی جانب سے متعدد مرتبہ اس معاملے کو ایف بی آر کے علم میں لایا گیا، زوم اجلاس اور متعلقہ دفاتر میں ملاقاتیں بھی ہوئیں جبکہ بورڈ کی جانب سے ٹیکس برادری کے موقف سے آگاہی کے باوجود تاحال موثر اصلاح نہیں کی گئی۔ عہدیداران نے کہا کہ صورتحال کا قانونی پہلو بھی انتہائی اہم ہے کیونکہ اگر آئرس میں غلط فارمولے کے باعث ٹیکس ذمہ داری غلط طور پر بڑھ رہی ہے تو متاثرہ ٹیکس دہندگان کو اعتراض اور قانونی دادرسی کا حق حاصل ہے۔ ایف بی آر کو چاہیے کہ پہلے ہی مرحلے پر نظام کی خامی دور کرکے غیرضروری تنازعات اور اضافی قانونی کارروائی سے بچا جائے۔ انہوں نے کہا کہ مسئلہ ابھی جمع نہ ہونے والے کاروباری آمدن کے تقریباً ہر دوسرے ریٹرن کو متاثر کر رہا ہے، جس سے ٹیکس ریٹرنز کی بروقت تکمیل میں رکاوٹ اور ٹیکس دہندگان میں شدید ابہام پیدا ہو رہا ہے۔ خط میں اس امر پر بھی تشویش ظاہر کی گئی ہے کہ غلط اطلاق کے باعث قومی خزانے کو نقصان پہنچنے کا خدشہ ہے۔ چیئرمین ایف بی آر سے مطالبہ ہے کہ کم از کم ٹیکس فارمولے کی فوری تصحیح، متاثرہ ریٹرنز کے لیے واضح طریقہ کار اور باضابطہ تحریری فیصلہ جاری کیا جائے۔