راولپنڈی (سٹی رپورٹر)راولپنڈی کے تھانہ بنی کی حدود میں شاہ اللہ دتہ روڈ پر نشے کی حالت میں ہونے والے جھگڑے کے نتیجے میں ایک شخص جاں بحق جبکہ دوسرا معمولی زخمی ہو گیا۔ پولیس نے فوری کارروائی شروع کر دی ۔ذرائع کے مطابق شاہ اللہ دتہ روڈ پر دو نشئی افراد کے درمیان دورانِ نشہ کسی بات پر تلخ کلامی ہوئی جو دیکھتے ہی دیکھتے ہاتھ پائی اور خونریز لڑائی میں تبدیل ہو گئی۔ اس جھگڑے کے دوران ایک نشئی شدید زخمی ہو کر موقع پر ہی دم توڑ گیا، جبکہ دوسرا ملزم معمولی زخمی ہوا۔ واقعے کے بعد قاتل نشئی موقع سے فرار ہونے میں کامیاب ہو گیا۔واقعے کی اطلاع ملتے ہی ایس ایچ او تھانہ بنی پولیس فورس کے ہمراہ فوری طور پر جائے وقوعہ پر پہنچ گئے۔ پولیس نے قانونی کارروائی کرتے ہوئے مقتول کی لاش کو ہسپتال منتقل کیا اور فرار ملزم کی تلاش کے لیے فوری طور پر ٹیمیں تشکیل دے دی گئی۔پولیس حکام کا کہنا ہے کہ واقعہ کے تمام پہلوں کا باریک بینی سے جائزہ لیا جا رہا ہے۔ جائے وقوعہ اور گردونواح میں لگے سی سی ٹی وی کیمروں کی فوٹیج حاصل کی جا رہی ہے تاکہ لڑائی کی اصل وجوہات اور پس منظر کو سامنے لایا جا سکے۔ پولیس نے مزید تفتیش شروع کر دی ہے۔
