پشاور، کابل ( نیوز ایجنسیاں) سکیورٹی فورسز نے شمالی وزیرستان میں آپریشن کے دوران فتنہ
الخوارج کے 7دہشت گردوں کو جہنم واصل کردیا ، ادھر پاک فوج کے ہاتھوں ہلاک خارجی دہشت گرد کیلئے افغانستان میں تعزیتی تقریب کا انعقاد کیا گیا جو پاکستان میں سرحد پار دہشت گردی کا ایک اور واضح ثبوت ہے۔ سکیورٹی فورسزکی خیبرپختونخوا میں عزم استحکام ویژن کے تحت فتنہ الخوارج کے خلاف جاری بھرپور کارروائیوں میں فتنہ الخوارج کے مزید 7دہشت گرد ہلاک ہوگئے ۔سکیورٹی ذرائع کے مطابق سکیورٹی فورسز نے شمالی وزیرستان میں انٹیلی جنس بیسڈ آپریشن کیا جس کے دوران فتنہ الخوارج کے 7خارجی جہنم واصل کیے گئے۔سکیورٹی فورسزکی موثرکارروائی کے دوران ہلاک دہشت گردوں سے بھاری مقدار میں اسلحہ، گولہ بارود بھی برآمد ہوا، فتنہ الخوارج کے متعدد ٹھکانے بھی تباہ کر دیئے گئے۔ذرائع کے مطابق عزم استحکام ویژن کے تحت بیرونی حمایت یافتہ دہشت گردی کے خاتمہ تک کارروائیاں جاری رہیں گی۔دریں اثنا صدرِ مملکت آصف علی زرداری اور وزیر اعظم شہبازشریف نے دہشت گردوں کے ٹھکانوں کی تباہی اور بھاری مقدار میں اسلحہ و گولہ بارود برآمد کرنے پر سکیورٹی فورسز کی موثر کارروائی کو سراہا ہے۔ادھر پاک فوج کے ہاتھوں ہلاک ہونے والے خارجی دہشتگرد کی افغانستان میں تعزیتی تقریب کا انعقاد کیا گیا ہے۔رپورٹ کے مطابق افغانستان سے پاکستان میں جاری سرحد پار دہشتگردی کا ایک اور واضح ثبوت سامنے آگیا۔ افغان طالبان رجیم پاکستان سمیت ہمسایہ ممالک میں دہشت گردوں کی مکمل سرپرستی اور پشت پناہی کررہی ہے۔افغان میڈیا رپورٹس کے مطابق پاک فوج کے ہاتھوں ہلاک خارجی افغان دہشت گرد صفت اللہ کی افغانستان میں تعزیتی تقریب کاانعقاد کیا گیا۔ پاکستان میں دہشت گردی کے مکروہ عمل میں ملوث خارجی دہشت گرد کوافغانستان میں ہیروکمانڈرکا لقب بھی دیا گیا۔افغان میڈیا کے مطابق ہلاک خارجی افغان دہشتگرد کی تعزیتی تقریب میں فتنہ الخوارج کے جھنڈے والے پوسٹرزآویزاں کئے گئے ہیں۔افغانستان میں ان دہشت گردوں کی تعزیتی تقریبات اورفتنہ الخوارج کے جھنڈوں کی نمائش افغان طالبان اور فتنہ الخوراج کے گٹھ جوڑ کاواضح ثبوت ہے۔
دہشت گرد
