پنجاب بھرمیں ٹریفک حادثات میں 35 فیصد کمی ریکارڈ

لاہور(کرائم رپورٹر) ٹریفک پولیس پنجاب نے سال 2026ء کے پہلے 09 ماہ کے ٹریفک حادثات اور ٹریفک قوانین کی خلاف ورزیوں کے اعداد و شمار جاری کر دیئے، جن کے مطابق صوبے بھر میں جان لیوا ٹریفک حادثات میں 35 فیصد کمی ریکارڈ کی گئی، جبکہ غیر مہلک حادثات میں بھی نمایاں کمی سامنے آئی ہے۔ ترجمان ٹریفک پولیس پنجاب کے مطابق مجموعی جان لیوا حادثات میں سے 76 فیصد میں ڈرائیوروں کی غفلت شامل رہی۔ تیز رفتاری، بے احتیاطی سے ڈرائیونگ اور غلط اوور ٹیکنگ حادثات کی بڑی وجوہات بنیں۔ اعداد و شمار کے مطابق پنجاب میں رجسٹرڈ گاڑیوں میں موٹر سائیکلوں کا تناسب 84 فیصد ہے جبکہ رواں سال کے پہلے 9 ماہ کے دوران 39 فیصد ٹریفک حادثات موٹر سائیکلوں سے متعلق رپورٹ ہوئے۔ ٹرکوں اور بسوں کے باعث 14 فیصد، ٹریکٹر ٹرالیوں سے 10 فیصد جبکہ چنگ چی اور لوڈر رکشوں کے باعث 6 فیصد ٹریفک حادثات پیش آئے۔ ترجمان کے مطابق جنوری 2026ء سے اب تک صوبے میں 67 لاکھ سے زائد ڈرائیونگ لائسنس جاری کیے جاچکے ہیں جبکہ ٹریفک قوانین کی خلاف ورزیوں پر ڈیڑھ کروڑ سے زائد چالان کیے گئے ہیں۔ ٹریفک پولیس پنجاب کا کہنا ہے کہ ٹریفک حادثات میں مزید کمی لانے، شہریوں کی جان و مال کے تحفظ اور سڑکوں پر ٹریفک کی روانی بہتر بنانے کے لیے اقدامات جاری ہیں۔ شہریوں سے اپیل کی گئی ہے کہ وہ ٹریفک قوانین کی پابندی کریں، تیز رفتاری اور غلط اوور ٹیکنگ سے گریز کریں اور دورانِ ڈرائیونگ احتیاطی تدابیر اختیار کریں۔