انہار افسران کی سر پرستی پانی چوری عروج پر ٹیل کے کسان رل گئی

ملتان(عبداللہ طارق سہو) پنجاب کی نہروں میں پانی چوری عروج پر، ساہیوال، خانیوال ، ملتان اور وہاڑی سر فہرست ہیں۔رات کی تاریکی میں غیر قانونی ٹیوبیں نصب، موگے توڑ کر پانی چوری کیے جانے کی شکایات، ٹیل کے کاشتکار پانی کی بوند بوند کو ترسنے لگے۔پنجاب کے مختلف علاقوں میں محکمہ انہار کی زیرِ نگرانی چلنے والی نہروں سے مبینہ طور پر پانی چوری کا سلسلہ زور پکڑنے لگا۔ رات کی تاریکی میں نہروں پر غیر قانونی ٹیوبیں نصب کرنے اور موگے توڑ کر پانی کا رخ اپنی زمینوں کی جانب موڑنے کی شکایات سامنے آنے لگی ہیں۔ ساہیوال، خانیوال ،ملتان اور وہاڑی کے علاقے اس حوالے سے نمایاں بتائے جا رہے ہیں، جہاں نہری پانی کی غیر منصفانہ تقسیم کے باعث ٹیل پر واقع زمینوں کے کاشتکار شدید مشکلات سے دوچار ہیں۔ذرائع کے مطابق سہو مائنر، راجباہ چوپڑ ہٹہ،وہاڑی لوئر ویسٹرن ٹھینگی سب ڈویژن واں والا کی نہر 11۔ایل اور ساہیوال سیکشن کی نہروں سے مبینہ طور پر دھڑلے سے پانی چوری کیاجا رہا ہے۔ رات کے اوقات میں غیر قانونی طریقوں سے پانی حاصل کرنے کے باعث نہری نظام کے آخری حصوں تک پانی کی مطلوبہ مقدار پہنچنے میں مشکلات پیدا ہونے کی شکایات ہیں۔ اس صورتِ حال سے ان کاشتکاروں کو نقصان پہنچ رہا ہے جو قانونی طریقے سے اپنے حصے کے نہری پانی کے منتظر رہتے ہیں ۔کاشتکاروں کا کہنا ہے کہ نہری پانی کی منصفانہ تقسیم زرعی معیشت کے لیے بنیادی اہمیت رکھتی ہے، لیکن اگر بااثر افراد غیر قانونی ذرائع سے پانی حاصل کرتے رہیں تو ٹیل کے کسانوں کی فصلیں متاثر ہونے کا خدشہ بڑھ جاتا ہے۔ پانی کی کمی کے باعث فصلوں کی بروقت آبپاشی متاثر ہوتی ہے، جس سے زرعی پیداوار اور کاشتکاروں کی آمدن پر بھی منفی اثرات مرتب ہو سکتے ہیں۔علاقہ مکینوں اور کاشتکاروں کی جانب سے مطالبہ کیا جا رہا ہے کہ محکمہ انہار کے متعلقہ افسران نہروں، مائنرز اور راجباہوں کی ہنگامی بنیادوں پر نگرانی کریں، پانی چوری کی شکایات کی غیر جانب دارانہ تحقیقات کرائیں اور غیر قانونی ٹیوبیں نصب کرنے یا موگے توڑنے میں ملوث پائے جانے والے افراد کے خلاف قانون کے مطابق کارروائی عمل میں لائیں۔متاثرہ کاشت کاروں کا کہنا ہے کہ اگر نہروں کی نگرانی اور پانی کی تقسیم کا نظام موجود ہے تو پھر مبینہ طور پر رات کی تاریکی میں پانی چوری کی شکایات کا سدباب کیوں نہیں ہو رہا؟ ۔کیا متعلقہ حکام ان شکایات کا نوٹس لے کر ٹیل کے کاشتکاروں کو ان کے حصے کا پانی فراہم کر سکیں گے؟۔کاشتکاروں نے اعلیٰ حکام سے مطالبہ کیا ہے کہ نہری پانی کی چوری روکنے، پانی کی منصفانہ تقسیم یقینی بنانے اور محکمہ انہار کی نگرانی کے نظام کو مؤثر بنانے کے لیے فوری اقدامات کیے جائیں تاکہ کسانوں کو ان کے جائز حق سے محروم نہ ہونا پڑے۔
پانی چوری
محکمہ انہار پنجاب کی نہروں سے ٹیوبیں لگاکر پانی چوری کیا جارہا ہے۔