جندول(نمائندہ خبریں ) جندول لوئر دیر تحصیل میدان میں ڈکیتی کے بعد دو بھائی قتل،ملزمان فرار ہونے میں کامیاب عوام سرپایا احتجاج، ملزمان کی گرفتاری کا مطالبہ۔تفصیلات لوئر دیر تھانہ حیاسیئرء کے حدود علاقے کمر کوٹکے میدان میں نامعلوم مسلح افراد ڈکیتی کے بعد فائرنگ سے دو تاجر بھائی جاں بحق،پولیس فورس جائے وقوعہ پر پہنچ کر مقدمہ درج کرنے کے بعد سرچ آپریشن شروع کرلی۔تااہم مقامی لوگوں اور جماعت اسلامی کے رہنماں، تاجروں اور میدان کے مقامی لوگوں نے لاشیں چوک میں رکھ کر احتجاج کیا اور ملزمان کی فوری گرفتاری کا مطالبہ کیا ہے۔ مقتولین کی شناخت ناصر خان اور سلیم خان، پسران عمر خان، ساکنان کوٹکے ڈھیری، میدان کے نام سے ہوئی ہے۔ڈی ایس پی بخت جمال خان کے مطابق دونوں بھائی ہفتہ اور اتوار کی درمیانی شب بٹخلہ سے اپنی گاڑی میں گھر واپس جا رہے تھے کہ حیا سیرئی کے کمر کوٹکے بائی پاس روڈ پر نامعلوم مسلح افراد نے ان پر فائرنگ کردی، جس کے نتیجے میں دونوں موقع پر جاں بحق ہوگئے اور ایک شخص جو معجزانہ طور بچ نکلنے میں کامیاب ہوا ہے جسکے بعد مقامی پولیس اور سیکیورٹی فورسز نے علاقے میں سرچ آپریشن شروع کردیا ہے اور ملزمان تک پہنچانے کی کوشش بدستور جاری ہے ۔واقعے کے بعد علاقے میں شدید غم و غصہ پایا گیا اور اتوار کو سینکڑوں افراد نے کمبڑ بازار چوک میں مقتولین کی لاشیں رکھ کر احتجاجی مظاہرہ کیا۔ مظاہرین میں جماعت اسلامی کے مقامی رہنما عتیق الرحمن اور حفیظ اللہ خاکسار سمیت دیگر افراد بھی شامل تھے۔مقررین نے واقعے کی مذمت کرتے ہوئے حکومت اور قانون نافذ کرنے والے اداروں سے مطالبہ کیا کہ قتل میں ملوث عناصر کو جلد از جلد گرفتار کرکے قانون کے کٹہرے میں لایا جائے اور واقعے کی غیرجانبدارانہ تحقیقات کو یقینی بنایا جائے۔مظاہرین کا کہنا تھا کہ اس واقعے سے علاقے میں خوف و ہراس پھیل گیا ہے اور اگر ملزمان کو گرفتار نہ کیا گیا تو احتجاج کا دائرہ وسیع کیا جائے گا۔بعض مقامی ذرائع کا دعوی ہے کہ حملہ آور واردات کے دوران بڑی مقدار میں نقد رقم بھی ساتھ لے گئے، تاہم لوٹی گئی رقم، واقعے کے محرکات اور دیگر تفصیلات کی آزاد ذرائع سے تصدیق نہیں ہوسکی۔دریں اثنا، ڈسٹرکٹ پولیس آفیسر (ڈی پی او) سید طلال احمد نے ایک بیان میں کہا کہ واقعہ رات تقریبا 12 بج کر 5 منٹ پر تھانہ حیا سیرئی کی حدود میں پیش آیا۔انہوں نے بتایا کہ صدیق اللہ اپنے ساتھیوں ناصر خان اور سلیم خان کے ہمراہ سفر کر رہے تھے کہ نامعلوم مسلح افراد نے مبینہ طور پر سڑک پر پتھر رکھ کر ان کی گاڑی روکی اور فائرنگ کردی۔ واقعہ تھانے سے تقریبا پانچ سے چھ کلومیٹر کے فاصلے پر پیش آیا۔ڈی پی او کے مطابق فائرنگ کے نتیجے میں ناصر خان اور سلیم خان موقع پر جاں بحق ہوگئے جبکہ صدیق اللہ محفوظ رہے۔ انہوں نے کہا کہ مدعی کے مطابق اس کے پاس تقریبا 52 لاکھ روپے نقد موجود تھے، جبکہ مقتولین کے پاس موجود رقم کے بارے میں تاحال حتمی معلومات دستیاب نہیں ہیں۔سید طلال احمد نے کہا کہ ملزمان مبینہ طور پر نقد رقم لے کر فرار ہوگئے۔ پولیس نے نامعلوم افراد کے خلاف مقدمہ درج کرلیا ہے جبکہ واقعے کی تفتیش، ملزمان کی شناخت و گرفتاری اور لوٹی گئی رقم کی برآمدگی کے لیے ان کی نگرانی میں خصوصی تحقیقاتی ٹیم (ایس آئی ٹی) تشکیل دے دی گئی ہے۔انہوں نے کہا کہ ملزمان کی گرفتاری اور واقعے کے محرکات معلوم کرنے کے لیے کارروائیاں جاری ہیں۔
