محکمہ آبپاشی پنجاب سرکاری گاڑیوں کے نام پر پٹرول، ڈیزل دیگر کروڑوں کے اخراجات پر پر سوالات اٹھ گئی

لاہور (خبر نگار) محکمہ آبپاشی پنجاب میں سرکاری گاڑیوں کے نام پر پٹرول، ڈیزل اور دیگر POL کروڑوں روپے کے اخراجات کا معاملہ سنگین سوالات کی زد میں آگیا۔ آڈیٹر جنرل پاکستان کی سرکاری آڈٹ رپورٹ نے محکمہ آبپاشی میںPOL سمیت مختلف اشیا کی خریداری میں قواعد کی خلاف ورزی، خریداری کو ٹکڑوں میں تقسیم کرنے اور بعض اثاثوں کے ریکارڈ سے غائب ہونے جیسے معاملات کی نشاندہی کر دی جس کے بعد سرکاری گاڑیوں کے نام پر جاری ہونے والے کروڑوں روپے کے پٹرول و ڈیزل کی مکمل فرانزک جانچ کا مطالبہ زور پکڑنے لگا۔ آڈٹ رپورٹ کے مطابق محکمہ آبپاشی میں سٹیشنری، کمپیوٹر سٹیشنری اور دیگر اشیا کی خریداری کے فریم ورک کنٹریکٹس کے دوران مشترکہ تصدیق میں بعض اثاثے غائب پائے گئے جبکہIT آلات، سافٹ ویئر، پلانٹ و مشینری اور Petroleum, Oil & Lubricants (POL) کی خریداری میں PPRA قواعد کی خلاف ورزی کرتے ہوئے خریداری کو تقسیم کرنے کی نشاندہی ہوئی۔ ذرائع کا کہنا ہے کہ آڈٹ کی اس نشاندہی نے محکمہ آبپاشی کے وسیع فلیٹ، چیف انجینئرز، سپرنٹنڈنٹ انجینئرز، ایکسینز، ایس ڈی اوز اور دیگر فیلڈ افسران کے زیر استعمال سرکاری گاڑیوں کے ماہانہ فیول استعمال پر بھی بڑے سوالات کھڑے کر دیئے ہیں۔ سوال یہ ہے کہ کتنی گاڑیاں واقعی فیلڈ میں چل رہی ہیں، کتنی گاڑیوں کا فیول محض کاغذوں میں استعمال ہو رہا ہے اور کتنی گاڑیوں کی لاگ بکس، اوڈومیٹر ریڈنگ اور پٹرول پمپ کے بل آپس میں مطابقت رکھتے ہیں؟ مزید تشویشناک امر یہ ہے کہ محکمہ آبپاشی کا نظام صوبہ بھر میں وسیع فیلڈ نیٹ ورک پر مشتمل ہے۔ اگر ہر ڈویژن میں سرکاری گاڑیوں کے POL اخراجات کا آزادانہ فرانزک آڈٹ کیا جائے تو مبینہ طور پر بڑے مالی تضادات سامنے آنے کا خدشہ ہے۔ تاہم اس حوالے سے حتمی رقم کا تعین گاڑی وار لاگ بکس، POL رجسٹر، پٹرول پمپس کے بل، ادائیگی واچرز اور گاڑیوں کی اصل مائلیج کا تقابلی جائزہ لینے کے بعد ہی ممکن ہوگا۔ اصل سوال یہ ہے کہ سرکاری گاڑی ایک ماہ میں جتنے کلومیٹر چلتی ہے، اس کے مقابلے میں کتنے لٹر پٹرول یا ڈیزل جاری کیا جاتا ہے؟ اگر لاگ بک میں چند سو کلومیٹر سفر درج ہو اورPOL ہزاروں لیٹر ظاہر کیا جائے تو یہ معمولی دفتری بے قاعدگی نہیں بلکہ قومی خزانے پر بوجھ ڈالنے والا انتہائی سنگین معاملہ بن سکتا ہے۔