لاہور(کرائم رپورٹر) انڈسٹریل سٹیٹ کے علاقے میں ڈکیتی کی کوشش کے دوران قائداعظم انڈسٹریل سٹیٹ فورس اور ڈاکوئوں کے درمیان فائرنگ کا تبادلہ ہوا، جس کے نتیجے میں ایک ڈاکو ہلاک جبکہ سکیورٹی فورس کا اہلکار تین گولیاں لگنے سے زخمی ہوگیا۔ پولیس کے مطابق دو مسلح ڈاکو کیک بنانے والی فیکٹری کی گاڑی روک کر واردات کر رہے تھے کہ ان کا سامنا انڈسٹریل سٹیٹ فورس سے ہوگیا۔ فائرنگ کے تبادلے میں ایک ڈاکو موقع پر مارا گیا جبکہ دوسرا فرار ہونے میں کامیاب ہوگیا۔ پولیس نے ہلاک ڈاکو کی لاش تحویل میں لے کر مردہ خانے منتقل کردی جبکہ زخمی سکیورٹی اہلکار کو طبی امداد کے لیے ہسپتال منتقل کردیا گیا۔ پولیس نے واقعے کا مقدمہ درج کرکے فرار ہونے والے ڈاکو کی تلاش اور مزید تفتیش شروع کردی۔
