نئی دہلی (نیوز ایجنسیاں )بھارتی دارالحکومت
نئی دہلی میں الیکشن کمیشن کے خلاف اپوزیشن جماعتوں کے احتجاج کے دوران پولیس نے اپوزیشن رہنما راہول گاندھی کو حراست میں لے لیا تاہم کچھ دیر بعد انہیں چھوڑ دیا گیا۔غیر ملکی میڈیا رپورٹس کے مطابق بھارت میں ووٹرز فہرستوں میں تبدیلی کے خلاف چیف الیکشن کمشنر کے استعفے کے لیے احتجاج جاری ہے۔کانگریس کے رہنما راہول گاندھی اور پریانکا گاندھی سمیت اپوزیشن ارکان نے پارلیمنٹ سے الیکشن کمیشن تک احتجاجی مارچ کی کوشش کی۔ پولیس نے الیکشن کمیشن ہیڈکوارٹرز کی طرف جانے والے راستے بند کر دئیے، جس پر اپوزیشن کے مظاہرین نے رکاوٹیں ہٹانے کی کوشش کی، جبکہ راہول گاندھی رکاوٹوں پر چڑھ گئے ۔ پولیس نے مظاہرین کو روکنے کے لیے راہول گاندھی اور پریانکا گاندھی کو حراست میں لے لیا لیکن تھوڑی دیر بعد دونوں کو چھوڑ دیا گیا۔ مظاہرین الیکشن کمیشن کے سربراہ کے استعفے کا مطالبہ کر رہے ہیں اور ووٹر فہرستوں کی نظرثانی کے دوران مبینہ بے ضابطگیوں کے الزامات عائد کر رہے ہیں۔
بھارت احتجاج
