سپین (بیورو چیف) سپین میں ندائے کشمیر کے زیراہتمام کشمیر بنے گا پاکستان کانفرنس منعقد ہوئی، جہاں مقررین نے کشمیری عوام سے یکجہتی اور آزاد
کشمیر کی موجودہ صورتحال کو مذاکرات کے ذریعے حل کرنے پر زور دیا۔ کانفرنس کی صدارت قونصل جنرل آف پاکستان مراد علی وزیر نے کی جبکہ او پی ایف کے چیئرمین سید قمر رضا شاہ مہمانِ خصوصی تھے۔ تقریب کا آغاز تلاوتِ قرآنِ پاک اور نعتِ رسولِ مقبولۖ سے ہوا، جس کی سعادت محمد شوکت ایویسی نے حاصل کی۔ نقابت کے فرائض ندائے کشمیر سپین کے صدر اور میزبانِ کانفرنس راجہ مختار سونی نے ادا کیے۔ تقریب سے او پی ایف کے چیئرمین سید قمر رضا، قونصل جنرل آف پاکستان مراد علی وزیر، چیئرمین پاکستان بزنس فورم یورپ سردار ظہور اقبال اور فرانس سے آئے ہوئے مہمان زاہد ہاشمی سمیت دیگر مقررین نے خطاب کیا۔ ان میں ملک محمد شریف، حاجی راجہ اسد حسین، حافظ عبدالرزاق صادق، محمد شفیق تبسم، راجہ نامدار خان ایڈووکیٹ، محمد اقبال چوہدری، فیض اللہ ساہی، راجو الیگزینڈر، ڈاکٹر حامد خان المشرقی، ملک اویس، چوہدری عبدالغفار مرہانہ اور چوہدری ساجد گوندل شامل تھے۔ مقررین نے کشمیر بنے گا پاکستان کے عزم کا اعادہ کیا اور پاکستان و کشمیر کے لیے پاک فوج کی قربانیوں کو خراجِ تحسین پیش کیا۔ انہوں نے حکومتِ پاکستان اور متعلقہ اداروں سے اپیل کی کہ آزاد کشمیر کی موجودہ صورتحال بات چیت کے ذریعے حل کی جائے اور عوام کے جائز مطالبات پورے کیے جائیں۔کانفرنس ہال پاکستان زندہ باد اور کشمیر بنے گا پاکستان کے نعروں سے گونجتا رہا۔
