اسلام آباد(نیوز ایجنسیاں)نائب وزیراعظم اور وزیر خارجہ اسحاق ڈار نے ایم ٹی آنر 25کے
مزید 3 پاکستانی کریو ارکان کی وطن واپسی کا اعلان کردیا۔دفترخارجہ سے جاری بیان کے مطابق اسحاق ڈار نے کہا کہ عمران علی، حسین یوسف اور محمد یاسین ادیس ابابا سے کراچی پہنچ رہے ہیں ، جہاں تینوں پاکستانی کریو ارکان اپنے اہلخانہ سے دوبارہ مل سکیں گے۔نائب وزیراعظم نے بتایا کہ پاکستانی سفیر نے تینوں کریو ارکان سے ملاقات کی اور انہیں ضروری سہولیات فراہم کیں، حکومت نے تمام پاکستانی کریو ارکان کی محفوظ وطن واپسی کیلئے بھرپور کوششیں کیں۔اسحاق ڈار نے کہا کہ وزیراعظم شہباز شریف کی قیادت میں کریو ارکان کی بحفاظت واپسی کے لئے تمام ممکنہ اقدامات کئے گئے، انہوں نے ایم ٹی آنر 25 کے پاکستانی کریو ارکان کی بحفاظت واپسی میں معاونت کرنے والے تمام افراد اور اداروں کا شکریہ بھی ادا کیا۔اسحاق ڈار نے کہا کہ پاکستان سمندری راستوں اور بحری کارکنوں کی سلامتی یقینی بنانے کے لئے عالمی تعاون جاری رکھنے کے عزم پر قائم ہے۔انہوں نے کہا کہ پاکستان بحری قزاقی کے خلاف عالمی شراکت داروں کے ساتھ تعاون جاری رکھنے کے لئے پرعزم ہے۔دریں اثناء نائب وزیراعظم اسحاق ڈار نے کمانڈر نیشنل اسٹریٹجک کمانڈ جنرل عامر رضا کو نئی تعیناتی پر مبارکباد دیتے ہوئے ان کیلئے نیک خواہشات کا اظہار کیا ہے۔ترجمان دفترخارجہ کے مطابق اسلام آباد میں نائب وزیراعظم ووزیرخارجہ اسحاق ڈار سے کمانڈر نیشنل اسٹریٹجک کمانڈ جنرل عامررضا نیملاقات کی،نائب وزیراعظم اورکمانڈر نیشنل اسٹریٹجک کمانڈ نے قومی سلامتی کے امور اورعلاقائی و بین الاقوامی پیش رفت پر تبادلہ خیال کیا۔ملاقات میں قومی مفادات کے تحفظ اورعلاقائی امن و سلامتی کیلئے قریبی ادارہ جاتی ہم آہنگی پر اتفاق کیا گیا۔
اسحق ڈار
