لاہور( این این آئی)وفاقی وزیر برائے قومی
غذائی تحفظ و تحقیق رانا تنویر حسین نے کہا ہے کہ قدرتی آفات زراعت، مویشیوں، دیہی آبادی اور غذائی سپلائی کے نظام کو شدید متاثر کرتی ہیں،ڈیزاسٹر رسپانس کے ساتھ بروقت انخلاء ، فصلوں اور مویشیوں کا تحفظ اور متاثرین کی فوری بحالی ضروری ہے۔ ان خیالات کا اظہار انہوںنے نیشنل ریسکیو چیلنج 2026 کی اختتامی تقریب سے خطاب کرتے ہوئے کیا ۔وفاقی وزیر رانا تنویر حسین نے کہا کہ نیشنل ریسکیو چیلنج میں شریک ہر ریسکیور پاکستان کا چمپئن ہے،ریسکیورز اپنی صلاحیتیں انسانی جانوں کے تحفظ اور دکھی انسانیت کی خدمت کے لیے وقف کیے ہوئے ہیں، نیشنل ریسکیو چیلنج تجربات، مہارتوں اور پیشہ ورانہ صلاحیتوں کے تبادلے کا اہم قومی پلیٹ فارم ہے۔ انہوںنے کہا کہ قدرتی آفات اور موسمیاتی تبدیلی کے بڑھتے اثرات نے پیشگی تیاری اور موثررسپانس کی اہمیت مزید بڑھا دی ہے، قومی سلامتی صرف سرحدوں کا تحفظ نہیں، عوام کی جان، صحت، خوراک اور معاشی تحفظ بھی اس کا بنیادی حصہ ہیں، ریسکیو سروسز اور وفاقی و صوبائی اداروں کے درمیان مضبوط رابطہ محفوظ اور مستحکم پاکستان کے لیے ناگزیر ہے، ریسکیو 1122 نے عوام کو مشکل کی گھڑی میں فوری امداد کی فراہمی کا قابلِ اعتماد ماڈل فراہم کیا ہے۔ انہوںنے کہا کہ ریسکیورز کی اصل کامیابی ٹرافی نہیں بلکہ مشکل گھڑی میں انسانی جان بچانا ہے۔
