الحاق شدہ نرسنگ کالجوں کے نرسنگ ایجوکیشن ڈیپارٹمنٹس کو مسلسل فیڈ بیک کے نظام کے طورپر استعمال کیاجائے، پروفیسر سہیل صابر

لاہور (جنرل رپورٹر) وائس چانسلر میجر جنرل (ر) پروفیسر سہیل صابر نے ہدایت کی کہ الحاق شدہ
نرسنگ کالجوں کے نرسنگ ایجوکیشن ڈیپارٹمنٹس کو مسلسل اکیڈمک فیڈبیک کے موثر نظام کے طور پر استعمال کیا جائے۔ انہوں نے کہا کہ نصابی اصلاحات، تدریسی طریقہ کار اور امتحانی و اسسمنٹ نظام کے بارے میں باقاعدگی سے فیڈ بیک حاصل کیا جائے اور اسے اعدادو شمار، اکیڈمک ڈیٹا اور شواہد کے ساتھ پیش کیا جائے۔ پروفیسر سہیل صابر نے کہا کہ تعلیمی اصلاحات کے حقیقی اثرات جانچنے کیلئے فیصلے محض رائے کی بجائے اعدادو شمار، شواہد اور طلبہ کے حقیقی تعلیمی نتائج کی بنیاد پر ہونے چاہئیں۔ انہوں نے کہا کہ اس نظام کے ذریعے یونیورسٹی یہ جان سکے گی کہ نصاب، تدریس اور اسیسمنٹ میں کی جانے والی تبدیلیاں طلبہ کی تعلیمی کارکردگی پر کس حد تک اثرانداز ہو رہی ہیں۔ وائس چانسلر نے یو ایچ ایس اور الحاق شدہ نرسنگ کالجوں کے درمیان قریبی رابطے پر بھی زور دیا تاکہ امتحانات بروقت منعقد ہوں طلبہ کی تعلیمی پیشرفت میں غیر ضروری تاخیر نہ ہو اور نرسنگ تعلیم کے معیار میں مسلسل بہتری لائی جاسکے۔