اسلام آباد، محسن نقوی کا ترقی یافتہ، خوبصورت متحرک دارالحومت کا ویژن

اسلام آباد (نمائندہ خصوصی) پاکستان کا وفاقی دارالحکومت ہونے کے ساتھ ساتھ ملک کی شناخت میں بھی ایک منفرد مقام رکھتا ہے۔ مارگلہ کی پہاڑیوں کے دامن میں آباد یہ شہر اپنی سرسبزی، کشادہ شاہراہوں، قدرتی حسن اور منظم شہری منصوبہ بندی کے باعث ہمیشہ سے نمایاں رہا ہے۔ آج کیپٹل ڈویلپمنٹ اتھارٹی (سی ڈی اے) ان خصوصیات کو مزید مستحکم کرنے کے لیے وسیع البنیاد اقدامات کر رہی ہے، جن کے ساتھ ساتھ شہری انفراسٹرکچر کو جدید بنانا، شہری سہولیات کو بہتر کرنا، عوامی مقامات کا تحفظ، سیاحت، سرمایہ کاری اور معاشی سرگرمیوں کے لیے سازگار ماحول پیدا کرنا بھی ترجیحات میں شامل ہے۔ وفاقی وزیر داخلہ سید محسن رضا نقوی کے ویژن اور ہدایات، جبکہ چیئرمین سی ڈی اے و چیف کمشنر اسلام آباد سہیل اشرف کی موثر اور فعال نگرانی میں سی ڈی اے نے اسلام آباد کو مزید ترقی یافتہ، صاف، سرسبز، خوبصورت، محفوظ، ماحول دوست اور شہری دوست دارالحکومت بنانے کے لیے اپنی سرگرمیاں مزید تیز کر دی ہیں۔ سی ڈی اے کی موجودہ حکمت عملی میں انفراسٹرکچر کی ترقی کے ساتھ ساتھ شہر کی خوبصورتی، ماحولیاتی تحفظ، میونسپل سروسز میں بہتری، قوانین و ضوابط پر عملدرآمد اور تفریحی و سیاحتی سہولیات کے فروغ کو بھی یکساں اہمیت دی جا رہی ہے۔ ترقیاتی منصوبوں اور جدید انفراسٹرکچر میں تیزی۔ اسلام آباد کی تبدیلی کے ایجنڈے کا ایک نمایاں پہلو شہر بھر میں ترقیاتی اور انفراسٹرکچر منصوبوں کو تیز کرنا ہے۔ سڑکوں، انٹرچینجز، انڈر پاسز، پیدل چلنے والوں کی سہولیات، سروس روڈز اور دیگر شہری انفراسٹرکچر کو جدید خطوط پر استوار اور اپ گریڈ کیا جا رہا ہے تاکہ شہری رابطوں، آمدورفت اور ٹریفک کی روانی کو مزید بہتر بنایا جاسکے۔ اسلام آباد ایکسپریس وے سروس روڈ ایسٹ کا منصوبہ اسی ترقیاتی حکمت عملی کی ایک اہم مثال ہے۔ حالیہ فیلڈ معائنے کے دوران چیئرمین سی ڈی اے نے منصوبے پر جاری کام کی رفتار اور معیار کا جائزہ لیا اور متعلقہ فارمیشنز کو ہدایت کی کہ تعمیراتی معیار پر سمجھوتہ کیے بغیر منصوبے کی تکمیل کو مزید تیز کیا جائے۔ اس منصوبے سے اسلام آباد میں رابطہ کاری مزید بہتر ہونے، ٹریفک کی روانی میں بہتری اور سڑکوں کی استعداد میں اضافے کی توقع ہے۔ اسلام آباد کے مختلف سیکٹرز اور دیگر اہم علاقوں میں بھی ترقیاتی سرگرمیاں جاری ہیں۔ سی ڈی اے کی قیادت کی جانب سے منصوبوں کی بروقت تکمیل، تعمیراتی معیار اور دستیاب وسائل کے موثر استعمال پر مسلسل زور دیا جا رہا ہے تاکہ شہریوں کو غیر ضروری تاخیر کے بغیر بہتر انفراسٹرکچر اور سہولیات فراہم کی جاسکیں۔