تح جنگ(بیورو رپورٹ) پیرا فورس کی مبینہ کارروائیاں عروج پر پہنچ گئیں، لاکھوں روپے ٹیکس اور کرایہ ادا کرنے والے تاجر خود کو بے یار و مددگار محسوس کرنے لگے، جبکہ شہر میں سڑکوں، فٹ پاتھوں اور عوامی گزرگاہوں پر قابض ریڑھی اور ٹھیہ مافیا کے خلاف مؤثر کارروائی نہ ہونے پر شہریوں میں بھی شدید تشویش پائی جاتی ہے۔ دوسری جانب تمام
سیاسی قیادت کی خاموشی نے تاجروں اور شہریوں کی مشکلات میں مزید اضافہ کر دیا ہے۔ سابقہ انتظامیہ کی ہدایت پر شہر کے تاجروں نے اپنی دکانوں کے سامنے ٹف ٹائلیں لگوا کر گزرگاہوں کو خوبصورت اور عوام کیلئے سہولت بخش بنایا تھا، تاہم موجودہ انتظامیہ کی جانب سے مبینہ طور پر انہی ٹف ٹائلوں کی توڑ پھوڑ کے باعث گزرگاہیں کھنڈرات کا منظر پیش کرنے لگی ہیں۔ تاجروں کا کہنا ہے کہ انہوں نے سرکاری ہدایات پر لاکھوں روپے خرچ کرکے دکانوں کے سامنے جگہ کو بہتر بنایا، مگر اب بغیر کسی واضح متبادل انتظام کے اسے خراب کیا جا رہا ہے۔تاجروں کے مطابق پیرا فورس دکانوں کے باہر لگے بورڈز اور چھجوں کو ہٹانے کیلئے بھی سرگرم ہے، حالانکہ یہ بورڈز اور چھجے سابق اسسٹنٹ کمشنر کی جانب سے پنجاب حکومت کی ہدایات کے تحت مخصوص طریقہ کار کے مطابق لگوائے گئے تھے۔ تاجروں کا سوال ہے کہ اگر سابقہ انتظامیہ نے سرکاری ہدایات کے مطابق یہ انتظامات کروائے تھے تو موجودہ انتظامیہ انہیں ختم کرنے سے قبل تاجروں کو اعتماد میں کیوں نہیں لے رہی؟شہریوں اور تاجروں کا کہنا ہے کہ ایک طرف باقاعدگی سے لاکھوں روپے ٹیکس، کرایہ اور دیگر سرکاری واجبات ادا کرنے والے دکانداروں کو مختلف کارروائیوں کا سامنا ہے، جبکہ دوسری طرف سڑکوں، فٹ پاتھوں اور عوامی گزرگاہوں پر ریڑھیوں اور ٹھیلوں کے باعث ٹریفک کی روانی اور پیدل چلنے والوں کو شدید مشکلات کا سامنا ہے۔ تاجروں نے مطالبہ کیا ہے کہ تجاوزات کے خلاف کارروائی کسی مخصوص طبقے تک محدود رکھنے کے بجائے بلاامتیاز اور یکساں بنیادوں پر کی جائے۔تاجروں کا مزید کہنا ہے کہ شہر کے مسائل کے حل کیلئے منتخب نمائندوں اور سیاسی قیادت کو اپنا کردار ادا کرنا چاہیے تھا، مگر افسوس کہ عوام بالخصوص دکانداروں کو انتظامیہ کے رحم و کرم پر چھوڑ دیا گیا ہے۔ انہوں نے ڈپٹی کمشنر اٹک اور دیگر اعلیٰ حکام سے مطالبہ کیا ہے کہ فتح جنگ میں تجاوزات اور انتظامی کارروائیوں کا ازسرنو جائزہ لیا جائے، ٹف ٹائلوں کی مبینہ توڑ پھوڑ کا نوٹس لیا جائے، تاجروں کو اعتماد میں لیا جائے اور سڑکوں و فٹ پاتھوں پر قائم تجاوزات کے خلاف بلاامتیاز آپریشن کیا جائے۔
