پینٹاگون کا ایران پر نئے حملوں کا منصوبہ طویل جنگ کیلئے تیار ہیں تہران کا جواب

واشنگٹن ، تہران ( نیوز ایجنسیاں)امریکی اخبار نے دعویٰ کیا ہے کہ پینٹاگون نے ایران کے خلاف 3روزہ فضائی حملوں کا منصوبہ تیار کیا ہے جس میں ایران کے میزائل اور ڈرون ذخائر، توانائی کی تنصیبات اور فوجی کمانڈ مراکز کو نشانہ بنانے کےامکانات شامل ہیں۔ادھر ایران نے اپنے دشمن کو خبردار کیا ہے کہ طویل جنگ جاری رکھنے کیلئے ہمارے پاس اسلحے کی وافر پیداواری صلاحیت موجود ہے۔دوسری جانب آبنائے ہرمز کے جنوبی حصے میں زوردار دھماکوں کی اطلاعات موصول ہوئی ہیں۔امریکی اخبار نے دعویٰ کیا ہے کہ پینٹاگون نے ایران کے خلاف 3روزہ فضائی حملوں کا منصوبہ تیار کیا ہے جس میں ایران کے میزائل اور ڈرون ذخائر، توانائی کی تنصیبات اور فوجی کمانڈ مراکز کو نشانہ بنانے کے امکانات شامل ہیں۔امریکی اخبارکی رپورٹ میں نام ظاہر نہ کرنے والے امریکی حکام کے حوالے سے بتایا گیا ہے کہ صدر ڈونلڈ ٹرمپ نے محکمہ دفاع کو یہ منصوبہ تیار کرنے کی ہدایت کی تھی۔امریکی عہدیدار کا کہنا تھا کہ گزشتہ ہفتے کیمپ ڈیوڈ میں نائب صدر کی زیرِ قیادت اعلیٰ حکام نے ان منصوبوں پر غور کیا تھا۔ادھرایرانی میڈیا کا کہنا ہے کہ آبنائے ہرمز کے جنوبی راستے میں کئی زوردار دھماکے ہوئے ہیں۔ خبر رساں ایجنسی فارس نے نامعلوم فوجی ذرائع کے حوالے سے بتایا کہ غیر مجاز راستوں سے گزرنے والے تیل بردار بحری جہاز ممکنہ طور پر سمندر میں بچھائی گئی بارودی سرنگوں سے ٹکرا گئے۔رپورٹ کے مطابق یہ دھماکے آبنائے ہرمز میں بڑھتی ہوئی کشیدگی کے دوران ہوئے ہیں، جہاں ایران نے بحری جہازوں کو تہران کی جانب سے اجازت نہ دیے گئے راستوں سے گزرنے سے خبردار کیا ہے۔دریں اثناء ایران نے اپنے دشمن کو خبردار کیا ہے کہ طویل جنگ جاری رکھنے کیلئے ہمارے پاس اسلحے کی وافر پیداواری صلاحیت موجود ہے۔یہ بات ایران کی وزارت دفاع کے ترجمان رضا طلائی نیک نے کہی ۔سرکاری ٹیلی ویژن کو انٹرویو میں رضا طلائی نیک نے کہا کہ ملک میں اسلحہ تیار کرنے کی صلاحیت ایک طویل اور مسلسل جنگ کی ضروریات پوری کرنے کے لیے کافی ہے۔ ایران کے پیداواری نظام میں اس وقت طویل جنگ جاری رکھنے کے لیے درکار اسلحہ تیار کرنے کی صلاحیت موجود ہے۔انہوں نے بتایا کہ جنگ کے دوران اسلحے کی پیداوار جنگ سے پہلے کی سطح کے مقابلے میں ڈھائی گنا بڑھ گئی۔ ان کے مطابق ایران نے پہلے ہی متبادل اور محفوظ پیداواری مقامات تیار کر رکھے تھے اور فوجی سازوسامان کی پیداوار ایک دن کے لیے بھی نہیں رکی۔قبل ازیںایرانی پاسدارانِ انقلاب کی بحریہ کے نائب کمانڈر علی محمدی نے کہا ہے کہ ایرانی فورسز آبنائے ہرمز میں ہر رات ان جہازوں کے خلاف کارروائیاں کرتی ہیں جنہیں تہران اپنے قواعد کی خلاف ورزی کرنے والا سمجھتا ہے۔ایرانی خبر رساں ادارے فارس سے گفتگو کرتے ہوئے علی محمدی نے کہا کہ جنگ کے پہلے روز سے آبنائے ہرمز کی مکمل نگرانی کی جا رہی ہے اور جارحانہ و دفاعی کارروائیاں جاری رہیں گی۔انہوں نے امریکی صدر ڈونلڈ ٹرمپ اور میڈیا کی جانب سے آبنائے ہرمز سے روزانہ 30 لاکھ سے 80 لاکھ بیرل تیل گزرنے کے اعداد و شمار کو غلط قرار دیتے ہوئے کہا کہ یہ محض قیاس آرائیاں ہیں جن کا مقصد تیل کی قیمتیں کم کرنا اور عالمی منڈی پر اثر انداز ہونا ہے۔علی محمدی نے دعوی کیا کہ ایرانی بحریہ آبنائے ہرمز میں کسی بھی مقام پر قواعد کی خلاف ورزی کرنے والے جہازوں کے خلاف کارروائی کر سکتی ہے۔علاوہ ازیںایرانی وزیر خارجہ عباس عراقچی نے جنگ بندی کے لیے امریکی تجاویز کا جواب اگلے چند روز میں دینے کا عندیہ دیا ہے۔عباس عراقچی نے کہا کہ فی الحال امریکی تجاویز کا جائزہ لے رہے ہیں، اگلے چند دنوں میں اپنا جواب دے دیں گے۔ ایرانی خبر ایجنسی سے گفتگو میں عراقچی نے کہا کہ امریکا کے ساتھ جنگ کے خاتمے کے لیے مذاکراتی عمل جاری ہے اور ثالثوں کے ذریعے پیغامات کا تبادلہ ہو رہا ہے۔
پینٹاگون