بسنت 2027، مینوفیکچررز کو لائسنس کا اجراء جاری،درخواستوںکی بھرمار

لاہور (این این آئی)لاہور میں بسنت 2027ء سے قبل پتنگ اور ڈور سازی کے لائسنس
کے حصول کے لئے درخواستوں کا انبار لگ گیا ۔ ڈی سی آفس کو مینوفیکچرنگ لائسنس کے لئے 6ہزار سے زائد درخواستیں موصول ہوچکی ہیں، جن میں سے 5ہزار 200درخواست گزاروں کو لائسنس جاری کر دیئے گئے ہیں۔ذرائع کے مطابق تقریباً 500درخواست گزاروں کی تصدیق کا عمل تاحال جاری ہے جبکہ مختلف وجوہات کی بناء پر تقریباً 300درخواست گزاروں کی لائسنس کے لئے درخواستیں مسترد کردی گئی ہیں۔لائسنس جاری ہونے کے بعد مینوفیکچررز کو قواعد و ضوابط کے مطابق پتنگیں اور ڈور تیار کرنے کی اجازت ہوگی۔ پتنگ اور ڈور سازوں میں لائسنس کے حصول کیلئے دوڑ تیز ہوگئی ہے، جبکہ ڈی سی آفس میں درخواستوں کی بڑی تعداد موصول ہونے کے بعد جانچ پڑتال کا عمل بھی جاری ہے۔گزشتہ سال پتنگ اور ڈور سازی کے مینوفیکچرنگ لائسنس کیلئے ایک ہزار 605افراد نے درخواستیں جمع کرائی تھیں، جن میں سے ایک ہزار 337افراد کو لائسنس جاری کیے گئے تھے۔ اس سال موصول ہونے والی درخواستوں کی تعداد گزشتہ سال کے مقابلے میں نمایاں طور پر زیادہ ہے۔