لاہور (این این آئی)چیف جسٹس لاہور ہائی کورٹ جسٹس مس عالیہ نیلم کی خصوصی ہدایات پر رجسٹرار لاہور ہائی کورٹ عبدالرحیم نے عدالت عالیہ لاہور کا تفصیلی دورہ کیا۔ اس موقع پر لاہور ہائی کورٹ کے ڈائریکٹر جنرل ایسٹیبلشمنٹ رفاقت علی قمر بھیہمراہ تھے۔صبح08 بجکر40منٹ پر شروع ہو نے والا دورہ 2گھنٹے سے زائد وقت تک جاری رہا۔ تفصیلی دورے کے دوران رجسٹرار لاہور ہائی کورٹ نے عدالت عالیہ کے تمام جوڈیشل و ایڈمن ونگز، دفاتر، برانچز، ریکارڈ رومز، کاپی برانچ، ڈائریکٹوریٹ آف ڈسٹرکٹ جوڈیشری، سنٹرل ایگزامینیشن سیکرٹریٹ اور ڈسپنسری کی مینجمنٹ، صفائی ستھرائی اور سٹاف کی حاضری و یونیفارم چیک کیا۔دورانِ دورہ فاضل رجسٹرار نے ارجنٹ سیل، رٹ برانچ، ویری فیکیشن برانچ اور کاپی برانچ میں موجود سائلین سے بھی ملاقات کی اور کسی بھی قسم کی مشکلات سے متعلق آگاہی حاصل کی، سائلین نے مقدمات کی دائرگی، بائیومیٹرک ویری فیکیشن اور دیگر تمام عدالتی امورپر مکمل اطمینان کا اظہار کیا اورچیف جسٹس لاہور ہائی کورٹ کی جانب سے جلد اور معیاری انصاف کی فراہمی کے لئے کئے جانے والے اقدامات کو بھی سراہا۔
